इब्रानियों 1 - लाहौली बाइबिल

परमेश्वरो योहू स्वाभाव

¹ तुहई जुगारिंङ परमेश्वरे भविष्यवक्तातु दोरच़ी हेंदु बाह मेमेतंङ साते महस फेरा शत्‌ह-शत्‌ह तरीका रंङ साते गप्पा लहरी।

² पर दि अन्तिम ध्याड़ारिंङ ञेंहच़ी हेंदु योह दोरच़ी गप्पा लहरिन। परमेश्वरे एनोह योह दोरच़ी भत्ते संसारो रचना लहरी दंङ दोबि भत्ते चीज़ा तु वारिस बणाके च़रति।

³ दू योह ए परमेश्वरो महिमा ओ छंङी दंङ हर तरफे परमेश्वरो ठ्रोह तोह। दंङ भत्ते संसारा बि दंङ एनोह शाक्तिशाली बचनो दोरच़ी, भत्ते संसारा बि खड़े लहज़ी तहज़ा। दोई मीहतिंङ दोतु पापो दोरच़ी शुद्ध लेह च़रति, दंङ दोऊ थल स्वर्गारिंङ महिमामय परमेश्वरो सुचंङ हासी विराजमान शुहचे इलि।

⁴ झांह लेह परमेश्वरे योह बि इच्च़ा झांह ठ्रोह मिन रें च़रति अंऊ स्वर्गदूता बे महस मोह्ड़े तोह, अतु दोरच़ी ञेंहच़ी खांई तरपोंई कि योह दोतंङ बे महस मोह्ड़े तोह।

परमेश्वरो योहू यीशु स्वर्गदूता बे मोह्ड़े

⁵ पवित्र शास्त्रारिंङ अपेहल अच़िया माह कंड्रीर कि परमेश्वरे दू भत्ते अरिया स्वर्गदूता तु हखा कुई, अंऊ दोई एनोह योह हखा कुई, “काह गिऊ योह शुनाह; तोग गेह घोषणा लहज़ातग कि काह गिऊ योह शुनाह” “दंङ, दोई झांह एनोह अरिला स्वर्गदूतो हखा माह कुई” “कि गेह दोऊ बाह बणेक्पोग, दंङ दू गिऊ योह बणेंके योतो।”

⁶ दंङ अपेहल दोई एनोह आदरो जोगे योह बि संसारारिंङ च़रति, दंङ दोई कुई, “परमेश्वरो भत्ते स्वर्गदूत दोबि फ्यग लोहर।”

⁷ दंङ स्वर्गदूता तु पाहठी दि कुट्रा, “कि दोई एनोह स्वर्गदूत लन्न तु बणाएषी, दंङ एनोह सेवक धधकती मेहू ठ्रोह बणाके तरच़ा।”

⁸ पर योह पाहठी कुट्रा, “कांह परमेश्वर शुनाह, कनु राज हमेशा तचेक बणेंके बंङज़ोतो, काह केनोह राजारिंङ धर्मिकता रंङ साते राज लोहतो।

⁹ केई रूठे कमा रंङ साते दाह ए मदम कमारंङ साते बैर लहरिन; झांह लेह गेह, कांह परमेश्वरे, कनिंङ अंङषी चरच़तो, दंङ कांह भत्ते साथी बे कनिंङ महस आदर रांहषी ततो दंङ खुशी मनाएच़ी ततो।”

¹⁰ दंङ पवित्रशास्त्रे ला कुट्रा कि, “हे प्रभु, भत्ते बे मुण्डा केई धरती बणाएकातन, दंङ स्वर्ग कनु गुह्ट्रो कारीगरी शुह।

¹¹ दोरे ता नाश शुहचे योर पर कांह हमेशा श्रींङी बंङज़ोन दंङ दोरे भत्ते खमज़ेतु ठ्रोह युई शुहचे योर,

¹² दंङ केई दोतिंङ चादरो ठ्रोह ज़िल्पोन, दंङ दोरे खमज़ेतु ठ्रोह लेक्सा योरे; पर काह अपेहल ला लेहक्सन माह दंङ कांह जीवनो अपेहल ला अंत माह शोतो।”

¹³ दंङ परमेश्वरे एनोह स्वर्गदूतातु बिचंङ ज़ि दोई अपेहल कुहतो, काह गिऊ सुचंङ हासी बंङज़ु, कि “काह गिऊ सुचंङ आदरो ठाहरीरिंङ बंङज़ु, अपेहल तचेक कि गेह कनु बैरीतिंङ कांह वशारिंङ लेह माहकेग?”

¹⁴ दोथर स्वर्गदूतातु शुहबिमी छि मकसद तोह? दोरे सिर्फ परमेश्वरो सेवक शुरे, परमेश्वरे दोतिंङ दू मीहतु देखभालो थल्जी च़रच़ा अंऊ दोतिंङ उद्धार खोकसा।