गलातियों 6 - लाहौली बाइबिल

इदि-अईदिऊ मदत लंहि

¹ हे गिऊ प्यारे साथी विशवासी रे, अगर केतिंङ दि पता शोतो कि अरिया मीह छा अपराध लहसी ततो, दंङ केरे अंऊ आत्मिक तोतोंई, दोबि नम्रतारंङ साते सही अमरिंङ वापिस हपिमी थल्जी दोऊ मदत लंहि, ध्यान तंही कि केरे ला दुह पापा रिंङ पढेक्पि माह जूंस।

² अपेहल हेंदु बिचंङ अरिया मुसीबता रिंङ शोतो ता, दंङ हेंदिंङ इदि-अई दिऊ मदत लेह जूंशी तोह, दंङ झांह लेह हेनर मसीहू कानूनो भाषे लहज़ातंई।

³ छना कुचे अगर केहच़ी ञेंहच़ातंई कि अतुआ मदत लहज़िमी थल्जी केरे महस खास शुई दंङ केरे सिर्फ केनातिंङ ए मुर्ख बणाएच़ातोंई केरे धोंण ला खास माह शुई।

⁴ पर हर इच्च़ा मीह एनोह कम खमतो छि दू रूठे तोह आ, दंङ दू एनोह कमरिंङ घमण्ड लेह तरपोतो। पर दोबि एनोह कमो बराबरी ऊई मीहतंङ साते लेह माह जूंस।

⁵ छना कुचे भत्ते मीहरे एनोह कमो थल्जी ज़िमेवार तोतोर।

जीवन रिह एच़िमी ठ्रोह तोह

⁶ अंऊ मीहतिंङ परमेश्वरो बचनो शिक्षा रंड्रातोर, दंङ दोतु फर्ज़ बणेक्पा, कि छिल्ला धिर दोतु कछंङ तोह, दू मीहतंङ साते फासि जूंस अंऊ दोतिंङ सिखाएच़ातोर।

⁷ अगर हेंज़ी दि सोचेक्पोंई कि हेनर परमेश्वरा बि धोखा रें तरपोंई, दंङ हेनर हेंदिंङ धोखा रंड्रातंई। छना कुचे मीह अंऊ धिर एपोतो दू ए ब्लज़ोतो।

⁸ छना कुचे अंऊ मीह दू ए लहज़ा अंऊ दोऊ पापी स्वाभाव जुंज़ा, दंङ दोई खमतो कि दि दोऊ थल्जी मौत रेंज़ा हपतो। पर अंऊ मीह परमेश्वरो आत्माओ हिटी पूरा लहज़ा दोई खमतो कि आत्मा दोबि अनंत जीवन रमतो।

⁹ हेनर रूठे कम लहज़िमी रंङ साते परेशान शुहबी माह जूंस, छना कुचे अगर हेनर परेशान माह शोंई, दंङ परमेश्वरो ठीक टेमारिंङ ईनाम खोकपोंई।

¹⁰ झांह लेह अंऊर तचेक मोका खोकसोतो हेनर भत्ते मीहतंङ साते भलाई लोहनि; खास लहज़ी साथी विशवासी तंङ साते।

अन्तिम खबरदार ए नमस्ते

¹¹ ध्यान रांई कि छना मोह्ड़े, मोह्ड़े अक्षरंङ गेह केतिंङ घेंङौ गुह्ट्रे दि च़ेहसी तातग।

¹² अंऊ मीहरे ऊई यहुदी तिंङ खुश लहज़ी जुंज़ातोर, दोरे ए केतिंङ खतना लहज़िमी थल्जी दबाब केओर। दोरे दि सिर्फ दिऊ थल्जी लहज़ातोर ताकि मीहरे दोतिंङ दि प्रचार लहज़िमी वहज़ा ज़ि सताएपोर कि मसीह क्रूसो टोहकठे सिए इलि।

¹³ देर तचेक कि दोरे यहुदी विशवासी ला मूसा ओ कानूनो भाषे माह लहज़ातोर, पर दोच़ी जुंज़ातोर कि केहतु खतना शुहबी जूंस ताकि दोरे ऊई यहुदी तु तुईज़ी घमण्ड रंङ साते दि कंज़े तरपोर कि केहतु खतना दोतु वहज़ा ज़ि शुई।

¹⁴ अगर गेह घमण्ड लहज़ातग ता सिर्फ दि गप्पो टोईच़ी घमण्ड लोहग कि हेंदु प्रभु यीशु मसीह हेंदु थल्जी क्रूसो टोईच़ी सिए इलि। छना कुचे दोऊ सिमी थल, गेह एंतेग संसारो हिटी ओ गुलाम माह तोहग दंङ एंतेग दितु बिचंङ अंऊला चीज़ो दोर्तिंङ गिऊ टोईच़ी हुकुम लहज़िमी शाक्ति माह।

¹⁵ अतुआ खतना शुचि शुह आ माह शुह आ, दि छल्ले मतलब माह तहज़ा, पर परमेश्वरे दोरच़ी इच्च़ा खरकोई मीह बणेषी ए मलतब तहज़ा।

¹⁶ परमेश्वर दू इस्राएलो भत्ते तिंङ एनोह शांति रमतो दंङ दोतु टोहकठे दया लोहतो अंऊ दि कानूनो भाषे लहज़ातोर, छना कुचे दोरे ए परमेश्वरो दोरच़ी अंङषी मीहरे शुरे।

¹⁷ तुंखा अच़िला गिह्बी दुख था रांही, छना कुचे गिऊ फुकारिंङ अंऊ दाग तोतोर दोच़ी कंड्रातोर कि गेह यीशु मसीहू इच्च़ा प्रेरित शुगाह।

¹⁸ हे गिऊ प्यारे साथी विशवासी रे, गेह प्रार्थना लहज़ातग कि प्रभु यीशु मसीहू मोह्ड़े दाह केरे भत्ते तंङ साते शोतो। अमीन।