गलातियों 5 - लाहौली बाइबिल

आज़ादी बि सोटेगी तंही

¹ मसीह ज़ि हेंदिंङ मूसाओ कानूनो भाषे लहज़िमी दोरच़ी आज़ाद लेह च़रति, ताकि ञेंरे यह्च़ा अपेहला दुह कानूनो गुलाम माह बणेक्पोंई। झांह लेह केनातु आज़ादी रिंङ अटल बंङज़ुंई दंङ केनातिंङ यह्च़ा। गुलाम थाह बड़ेक्तुंई।

² गेह पोलुस, अंऊ गेह केतंङ साते कुट्री जुंज़ातग, दोबि ध्यानारंङ साते रेड्रुंई! अगर केरे परमेश्वरो नज़रारिंङ धर्मी शुहबिमी थल्जी खतना लहज़ातोनि, दंङ मसीह ज़ि छि केहतु थल्जी लहसी ततो, दोऊ छल्ले लस माह केहश्रोतो।

³ गेह यह्च़ा केतिंङ हुकुम रंड्रा कुट्रातग कि अंऊ मीह दि उम्मीदा रंङ साते खतना लहज़ा कि परमेश्वरो तुईज़ी धर्मी सबित शुहचे योतो, दोबि मूसा ओ कानूनो रांहषी हर इच्च़ा हुकुमो भाषे लहज़ी जूंशी तोह।

⁴ केरे ता मूसा ओ कानूनो भाषे लहज़ा दोरच़ी धर्मी साबित शुहबी जुन्ज़ातंई, दंङ केरे मसीहू दोरच़ी केनातु नाता ब्याड़ा लेह चरच़ातंई दंङ परमेश्वरो मोह्ड़े दाह बि योह्च़े चरच़ातंई।

⁵ गेह झांह कुट्री तरच़ातग छना कुचे हेंदिंङ पवित्र आत्माओ दोरच़ी पूरा भरोसा तोह कि परमेश्वर हेंदिंङ धर्मी रूपारिंङ ग्रहण लोहतो छना कुचे हेनर यीशु मसीहू टोहकठे विशवास लहज़ातंई।

⁶ अगर हेनर यीशु मसीहू टोईच़ी विशवास लहज़ातंई दंङ खतना शुहबी ए खतना माह शुहबिमी छल्ले फायदा माह। पर ज़रूरी गप्पा दि तोह कि हेनर मसीहू टोहकठे विशवास लहज़ातंई दंङ परमेश्वर ए ऊई मीहतु थल्जी दाह तहच़ातंई।

⁷ केरे ता केनातु आत्मिक ज़रका रिंङ ला रूठे रंङ ज़रका रैंईनि। अच़ि केतिंङ तुंखा शुहबिमी दोरच़ी रोकेक्सी ततो कि केरे सच्चाई बि था ञेंहनि।

⁸ झांह ठ्रोह शिक्षा परमेश्वरो दोरच़ी माह अपा, अच़ि केहतु एनोह कटुरे शुहबिमी थल्जी अंङे चरच़तो।

⁹ हिद तंही! छना थोड़े अरे सुम त्रुक्क्षी फुकाना रिंङ फेलेके यवात, ध्वांए ए थोड़े अरे हप्सी शिक्षा महसे मीहतिंङ भटकागी च़रच़ा।

¹⁰ पर गेह परमेश्वरो टोहकठे भरोसा लहज़ातोग कि दोई केतिंङ ऊई मीहतु हप्सी शिक्षा ओ टोईच़ी विशवास लहज़िमी दोरच़ी बचाके च़रपोतो। बल्कि केरे गिऊ शिक्षाओ भाषे लोहनि। छना कुचे अंऊ केहतु थल्जी परेशानी पैदा लहज़ा दू अरिला छारिंङ माह शोतो, परमेश्वरो दोरच़ी सज़ा खोकपोतो।

¹¹ हे गिऊ प्यारे साथी विशवासी रे, अगर गेह दि प्रचार लहज़ातग कि मीहतु खतना लेह जूंशी तोह, दंङ गिह्बी मुसीबतो सामना लेह माह पढ़ेक्पोतो। दंङ अगर गेह दि प्रचार माह लोहग ताकि उद्धार सिर्फ मसीहू क्रूसो दोरच़ी ए तोह, दंङ अरिला नाराज़ माह शोतो।

¹² रूठे शुचंङ, कि अंऊ मीहरे केहतु थल्जी परेशानी पैदा लहज़ातोर, दोरे एनाबि नपुंसक बणाके केओर।

¹³ हे गिऊ प्यारे साथी विशवासी रे, केतिंङ परमेश्वरो केतिंङ आज़ाद शुहबिमी अंङे चरच़ाते, झांह लेह केतिंङ मूसा ओ कानूनो भाषे लहज़िमी ज़रूरत माह। केनोह दि आज़ादी बि केनोह फुको हिटी पूरा लहज़िमी ज़रिया थाबणेएक्तुं, पर इदि-अई दिरंङ साते दाह लंहि दंङ इदि-अई दिऊ सेवा लंहि।

¹⁴ छना कुचे भत्ते मूसा ओ कानूनो निचोड़ सिर्फ इच्च़ा गप्पारिंङ ब्याके तोह: “कि काह केनोह पड़ोसीरंङ साते केनोह ठ्रोह दाह लोह।”

¹⁵ पर अगर केरे लगातार इदि-अई दिरंङ साते झगड़ा लहज़ातंई दंङ इदि-अईदि बि परेशान लहज़ातंई ता दंङ खबरदार शुहचे इलांई, केरे केनातिंङ बर्बाद लेह च़रपोंई।

पवित्र आत्माओ दोरच़ी जोज़ि

¹⁶ गेह केतंङ साते कुट्रातग, कि केतिंङ पवित्र आत्माओ अगुवाई हिसाबे श्रींङमी बि ज़रूरत तोह। ताकि केरे पापमय फुको हिटी पूरा लेह मरपोंई।

¹⁷ छना कुचे हेंदु फुको हिटी पवित्र आत्माओ खिलाप तोह, दंङ ध्वांए पवित्र आत्मा पापमय फुको हिटी ऊ खिलाप तोहई, छना कुचे दि झुल्ला इदि-अई दिऊ बैरी तोतोर। झांह लेह केरे हमेशा रूठे कम लेह मरपातंई अंऊ केहच़ी लेह जुंज़ातंई।

¹⁸ अगर केरे पवित्र आत्माओ हिसाबे जीवन श्रींङमातंई दंङ केरे मूसा ओ कानूनो गुलाम माह तोंई।

¹⁹ केहच़ी रूठे रंङ ञेंहच़ातंई कि मीहरे एनोह हिटी ऊ थलेच़ि ज़ोज़तोर, दोरे छि-छि लहज़ातोर, मतलब कुकम, मदम कम, लुचपन,

²⁰ मुर्तिऊ पूजा, जादू टोना, दुश्मनी, झगड़ा, जलन, रोहष, स्वार्थ, फूट केट्री, विधर्म,

²¹ कपट, सरा तुंङे मतवाला बंङज़ा, रंगरलियां मनेक्च़ा, दंङ दीतु ठ्रोह ऊई ला कम तोईरे, अतु पाहठी गेह केतिंङ खबरदार लहज़ातग, छना तुहई ला केतिंङ खबरदार लेह चरच़ातग कि दि कम लहज़ा दोरे परमेश्वरो राजो जोगे माह शोरे।

²² पर अपेहल पवित्र आत्मा हेंदिंङ काबू लहज़ा दंङ दोऊ गुण दि तोह “दाह, खुशी, शांति, धीरज़, दया, भलाई, विशवासो जोगे, नम्रता दंङ हेंदु टोईच़ी काबू लहज़ी।”

²³ झांह ठ्रोह अंऊ ला मूसा ओ कानून माह अंऊ दि गप्पो खिलाप तोह।

²⁴ अंऊ मीहरे यीशु मसीह रंङ साते संबध तहच़ातेर दोरे एनोह पापी स्वाभावो हिसाबे जीवन माह श्रींङमातोर। दिरे झांह ठ्रोह तोतोर छना कि दोच़ी एनोह पापी स्वाभावा बि क्रूसो टोईच़ी चड़ाएगी केहतोर।

²⁵ हेंदिंङ खरकोई जीवन पवित्र आत्माओ दोरच़ी खोकसा, झांह लेह हेंदिंङ पवित्र आत्माओ हिसाबे जीवन श्रींङमी जूंस।

²⁶ हेंदिंङ घमण्ड लेह माह जूंस, दंङ माह ए हेंदिंङ इदि-अई दिरंङ साते जलन लहज़ी जूंशी तोह।