गलातियों 4 - लाहौली बाइबिल

विशवासो दोरच़ी परमेश्वरो कटुरे

¹ गिऊ कुट्रीमी मकसद दि तोह कि अपेहल तचेक कटु नाबलिग तोह, धोंण तचेक दू भत्ते धिरो मालिक शुहचे ला परगरो बराबर शुहबी।

² अपेहल तचेक कि बाहऊ ठहरेसी टेम पूरा शुहचे माह य्वात, धोंण तचेक दू योह रक्षा लहज़ार ए बंदोबस्त लहज़ार तु अधीन बंङज़ा।

³ ध्वांए ठ्रोह परमेश्वरा बि ञेंहच़ी बे तुहई ए हेनर दू रिति-रिवाज़ ए कानूनो गुलाम तोईनी अंऊ दि संसारारिंङ तोह।

⁴ पर अपेहल दू टेम अति अतु योजना परमेश्वरे बणाक्ते, दंङ परमेश्वरे एनोह योह दि संसारारिंङ च़रति, दंङ दू इच्च़ा मीहू रूपा रिंङ जेह्कते। दुह यहुदी जेह्के, मूसा ओ कानूनो अधीन दिऊ थल्जी बंङज़िरी,

⁵ ताकि दोई हेंदिंङ आज़ाद लेह तरपोतो, अंऊ मूसा ओ कानूनो अधीन बंङज़ातेर दंङ दोई हेंदिंङ एनोह कटु रूपा रिंङ गोद लेहपच़ी च़रति।

⁶ छना कुचे हेनर परमेश्वरो कटुरे शुई दिऊ थल्जी परमेश्वरे एनोह योह ऊ आत्माबि हेंदु सेहमरिंङ च़रति, अंऊ परमेश्वरा बि “हे अब्बा, ‘हे बाह’ कुचे ते हाऊष रंड्रातंई।”

⁷ झांह लेह, हेंतेग हेनरे परगर माह शुई, पर हेनरे परमेश्वरो कटुरे शुहचे इलांई। दिऊ थल्जी छना कुचे हेनर परमेश्वरो कटुरे शुई, दंङ दू हेंदिंङ दू भत्ते धिर रमतो अंऊ दोऊ कछंङ दोऊ कटुतु थल्जी तोह।

गलातिया तु थल्जी पोलुसो चिंद

⁸ अपेहल केरे परमेश्वरा बि माह ञेंहच़ातंई, दू मुक्का केरे दोऊ परगर तोईनी, अंऊ हेले रिंङ परमेश्वर माशुहरे।

⁹ पर हेंतेग ता केरे परमेश्वरा बि ञेंहनि, दंङ परमेश्वरे केतिंङ ला ञेंहच़ा, दंङ केरे दू कमज़ोर ए निक्कमा शिक्षा ओ गुलाम शुहबिमी थल्जी छारिंङ यह्च़ी लेहकी तोतोंई? छि यह्च़ा केरे दोबारा दोऊ गुलाम शुहबी जुन्ज़ातंई आ?

¹⁰ गेह थहशे तातग कि केरे मीहरे रे खास ध्याड़ा रे लाह रे मौसम या सालो भाषे लहज़ातंई, दि सोचेके कि दिरंङ परमेश्वरा बि खुशी शवात।

¹¹ छिल्ला धिर केहच़ी लहज़ातंई दोऊ वहज़ा ज़ि गिह्बी बेह्द तोह, कि झांह शुहबी मेस कि अंऊ मेहनत गेह केहतु थल्जी लहसी शुह दुह शुह्के शुचि योतो।

¹² हे गिऊ प्यारे साथी विशवासी रे, गेह केतंङ साते बिनती लहज़ातोग, केरे केनातिंङ कानूनो दोरच़ी आज़ाद लंहि छना गेह लहसी तातग, छना कुचे गेह कानूनो दोरच़ी ध्वांए आज़ाद शुहचे इलोग छना केरे शुचि तोतोंई। केहच़ी गिऊ रूठे देखभाल लहज़ातंई।

¹³ केतिङ हिद शोतो कि बीमारीऊ वहज़ा ज़ि गिह्बी केतिंङ पहला फेरा रूठे खबर सुनाएच़िमी मोका खोकसते।

¹⁴ हालांकि गिऊ बीमारी केहतु थल्जी इच्च़ा परेशानी तोहई, तांला यह्च़ा केहच़ी गेरंङ नफरत माह लहज़ातंई दंङ माह ए गिह्बी इबि रांई। बल्कि केहच़ी गिह्बी झांह ठ्रोह ग्रहण लहरिन, मानो गेह ए परमेश्वरो स्वर्गदूत या एनाह ए यीशु मसीहू शुगाह।

¹⁵ दू मुक्का केरे महस खुश तोतोंई! केहतु दू खुशी हेंतेग अंऊर तोह? गेह हेले रिंङ दि कुट्री तरपोग कि केरे गिऊ थल्जी छिल्ला लहज़िमी थल्जी तेयार तोईनि; अगर शुहचे तरपो ता केहच़ी केनातु टिरा ला हुंच़े गिह्बी रें च़रपोंई।

¹⁶ पर हेंतेग दि छारिंङ तोह कि केरे गिह्बी केनातु बैरी चेहच़ातंई? छि दि गिऊ केतिंङ हेले कंड्रिमी वहज़ा ज़ि शुह आ?

¹⁷ दोरे मीहरे अंऊ यहुदी कानूनो टोहकठे जोर रंड्रातोर, दू केतिंङ एनोह मंडली रिंङ शामिल शुहबिमी थल्जी भत्ते कोशिश लहज़ातोर, पर रूठे मकसदो थल्जी मशत, दोतु मकसद ता केतिंङ गिऊ दोरच़ी शत्‌ह लहज़ी तोह ताकि केरे दोऊ चेला बणेंके योंई।

¹⁸ हमेशा ए रूठे मकसदो थल्जी खुश शुहबी रूठे तोह पर सिर्फ दू टेमारिंङ मशत, अपेहल गेह केहतु बिचंङ मौजूद शवाहतग।

¹⁹ हे गिऊ प्यारे कटुरे, छना ठ्रोह इच्च़ा मेच़िमी लिहक्पिमी मुक्का टेहषी सहन लहज़ा, ध्वांए ठ्रोह गेह यह्च़ा अई इच्च़ा फेरा केहतु थल्जी टेहषी सहन लहज़ी लेहकी तोतोग। गेह दि टेहषीरिंङ दू मुक्का तचेक बंङज़ोग अपेहल तचेक केरे मसीह रिंङ पक्‍का शुहचे माह य्वातंई।

²⁰ गेह महस जुंज़ातग कि गेह एंतेग केतंङ साते बंङज़ोग ताकि गेह केतंङ साते नह्की शुहचे गप्पा लेह तरपोग। छना कुचे गिऊ समझरिंङ अपिमी माह कि गेह केतंङ साते छि कोहग।

सारा ए हाज़िराऊ उदाहरण

²¹ दंङ केरे, अंऊ मूसा ओ कानूनो अधीन शुहबी जुन्ज़ातंई! गिऊ गप्पा रेड्रुंई! गेह केतिंङ कमोग कि पवित्र शास्त्रा रिंङ, मूसा ओ कानूनो कताबा रिंङ छि च़ेहसी तोह।

²² दोरिंङ दि च़ेहसी तोह कि अब्राहमो झुह्ट योह तोईरे, इच्च़ा दासी हाज़िरा रंङ दंङ इच्च़ा आज़ाद मेच़ारंङ साते।

²³ दासी ओ योह, मीहू हिटी ऊ हिसाबे अंऊ ला साधारण मीहू ठ्रोह जेह्कते पर दू कटु अंऊ दोऊ मेच़ो दोरच़ी जेह्कते, दू अब्राहमा रंङ साते परमेश्वरो वाईदा ओ भाषे लहज़िमी रंङ साते जेह्कते।

²⁴ दि झुल्ला मेच़िमी तु बराबरी झुह्ट वाईदा रंङ साते लेह जूंशी तोह। दू वाईदा अंऊ परमेश्वरे इस्राएलो मीहतंङ साते सीने गोह टोईच़ी लाहते, दू दासी हाज़िरा ओ ठ्रोह तोहई।

²⁵ हाज़िरा सीने गोह बि दर्शाएच़ा अंऊ अरब देशा रिंङ तोह। दू तोंखी यरूशलेम शहरो ठ्रोह तोह अंऊ कि मीहरे मूसाओ कानूनो भाषे लहज़िमी दोरच़ी गुलाम तोतोर।

²⁶ पर सारा ओ बराबरी दू यरूशलेम शहरंङ साते लेह तरपोंई अंऊ स्वर्गंङ तोह। दुह आज़ाद मेच़िमी तोह। दंङ दोऊ कटुरे ला आज़ाद तोतोर। दुह कटुरे हेनर भत्तेरें विशवासी शुई, अंऊ दोतु याह सारा शुह।

²⁷ छना यशायाह भविष्यवक्ता ज़ि पवित्र शास्त्रारिंङ च़ेहसी तोह, “हे कटु मेह मेच़िमी, केई अंऊ अपेहल ला कटु बि जेह्कते माह, खुश शुह; केई अपेहला कटु जेह्कपिमी टेहषी महसूस माह लहरिन, खुशी रंङ जय जयकार लोह!” छना कुचे छोड़ेक्सी मेच़िमी ऊ कटुरे ब्याह लहसी मेच़िमी ऊ कटु बे महस तोतोर।

²⁸ हे गिऊ प्यारे साथी विशवासी रे, हेनर इसहाको ठ्रोह तोतोंई, छना कुचे हेनर अब्राहमा रंङ साते परमेश्वरो वाईदाऊ हिसाबे जेह्की शुई।

²⁹ दुह मुक्का छना इश्माएल अंऊ मीहतु योजना ओ हिसाबे जेहक्ते, इसहाका बि सताएच़ाते, अंऊ आत्माओ वाईदा हिसाबे जेहक्ते, ध्वांए एंतेग केतिंङ ला दुह मीहरे सताएच़ातोर, अंऊ दोच़ी जुंज़ातोर कि केरे मूसा ओ कानूनो भाषे लंहि।

³⁰ पर दिऊ पाहठी पवित्रशास्त्र छि कुट्रा? “दासी ए दोऊ योह बि ऊईतार च़चे च़रतुंई, छना कुचे दासी ऊ योह अज़ाद मेच़ो योह रंङ साते बाह ओ जयदातो हकदार वारिस माह शोतो।”

³¹ झांह लेह हे गिऊ प्यारे साथी विशवासी रे, हेनर दासी मेच़िमी मतलब कानूनो कटुरे माह शुई, पर विशवास लहज़िमी रंङ साते अज़ाद मेच़िमी ऊ कटुरे शुई।