गलातियों 3 - लाहौली बाइबिल

कानून ए विशवास

¹ हे नासमझ, गलातिया शहरो विशवासी रे, गेह ता साफ रूपा रिंङ ए रूठे रंङ केतिंङ समझाएक्च़ा, कि यीशु मसीह केहतु थल्जी क्रूसो टोईच़ी छारिंङ सिए इलि। दंङ केरे छारिंङ दोऊ दोरच़ी ऊईतार शुचि इलि? अच़ि केरे भटकागी च़रतिर?

² गेह केतंङ साते इच्च़ा सवाल लहच़ी तातग: छि केतिंङ पवित्र आत्मा मूसा ओ कानूनो भाषे लहज़ी रंङ साते खोकसते आ? माह! बिल्कुल ला माह! केतिंङ पवित्र आत्मा दिऊ थल्जी खोकसते छना कुचे केहच़ी दू रूठे खबरो टोहकठे विशवास लहज़ातंई अंऊ केहच़ी यीशु मसीहू पाहठी रेड्री तातंई।

³ छि केरे धोंण नासमझ तोतोंई आ? केहच़ी पवित्र आत्मो ज़रिये मसीह रंङ साते केनातु खरकोई जीवन शुरू च़ुकातंई, छि दोबि एंतेग मीहतु कमो दोरच़ी योह्च़ी जुंज़ातंई आ?

⁴ छि केहतु भत्ते दुख अंऊ केहच़ी विशवासी बणेंके थल सहन लहज़ातंई बेकार शुहचे इलदोर आ? गेह हेलेरिंङ उम्मीद लहज़ातग कि दिरे बेकार माह तोईरे।

⁵ परमेश्वर महस रंङ साते केतिंङ पवित्र आत्मा रंड्रा। दंङ केतिंङ चमत्कार ला लहज़ा, छि दि दिऊ पाहठी तोह कि केहच़ी मूसा ओ कानूनो भाषे लहज़ातंई, या दि दिऊ पाहठी तोह कि केहच़ी मसीहू रूठे खबर थाशातेंई दंङ दोऊ टोहकठे विशवास लहज़ातंई।

⁶ हेंतेग अब्राहमो पाहठी ता सोचेक्तुंई “कि अब्राहमे परमेश्वरो दोरच़ी कुहषी गप्पो टोईच़ी विशवास लहरी दिऊ वहज़ा ज़ि दुह परमेश्वरो नज़रारिंङ धर्मी शुहचे इलि।”

⁷ केतिंङ दि समझेक्सी जूंस कि अंऊ मीहरे अब्राहमो ठ्रोह परमेश्वरो टोहकठे विशवास लहज़ातोर, दोरे ए अब्राहमो हेले ओ कटुरे शुरे।

⁸ दंङ पवित्रशास्त्र रिंङ महस तुहई दि च़ेहसी तोहई कि, “कि परमेश्वर ऊईजाति तु दोतिंङ विशवासो हिसाबे धर्मी ठहराएपोतो, दिए वहज़ा तोह कि पवित्र शास्त्रारिंङ, अपेहल परमेश्वरे तुहई ए अब्राहमा बि दि रूठे खबर रंदे कि दंङ दोई दोरंङ साते कुई” “कनु दोरच़ी, गेह दि संसारो भत्ते मीहतिंङ आशीष रमोग।”

⁹ परमेश्वरे अब्राहमा बि दोऊ विशवासो दोरच़ी आशीष रांई, ध्वांए ठ्रोह अंऊ ला यीशु मसीहू टोहकठे विशवास लोहतो दू पक्‍का अब्राहमो रंङ साते परमेश्वरो दोरच़ी आशीष खोकपोतो।

¹⁰ झांह लेह अंयों मीहरे मूसा ओ कानूनो कमो टोईच़ी विशवास तहच़ातेर, दोरे परमेश्वरो शापो अधीन तोतोर, छना कुचे पवित्र शास्त्रारिंङ च़ेहसी तोह, “अंऊ मूसा ओ कानूनारिंङ च़ेहसी भत्ते गप्पो भाषे माह लहज़ातोर, दोरे परमेश्वरो शापो अधीन तोतोर।”

¹¹ दि गप्पा ता साफ तोह कि अरिला मीह मूसा ओ कानूनो भाषे लहज़िमी रंङ परमेश्वरो तुईज़ी धर्मी माह शोतो, छना कुचे सिर्फ दू ए हेले रिंङ श्रींङे बंङज़तो अंऊ विशवासो दोरच़ी परमेश्वरारंङ साते धर्मी शोतो।

¹² पर मूसा ओ कानूनो भाषे लहज़ा श्रींङमी ए दंङ परमेश्वरो टोहकठे विशवास लहज़ी श्रींङमी इच्च़ा ठ्रोह माह। छना कि पवित्र शास्त्रारिंङ च़ेहसी तोह, “अंऊ मूसा ओ कानूनो भत्ते गप्पो भाषे लोहतो, दोबि मूसा ओ कानूनो दोरच़ी ए जीवन खोकसोतो।”

¹³ मसीह हेंदु थल्जी क्रूसो टोईच़ी सिए इलि दंङ दोई शाप एनोह टोहकठे कुरच़े हेंदिंङ मूसा ओ कानूनो शापो दोरच़ी मुक्त लेह च़रति। छना कुचे पवित्र शास्त्रारिंङ दि च़ेहसी तोह कि “शापित तोह दू अंऊ क्रूसो टोहकठे सच़ी चरच़ातोर।”

¹⁴ मसीह दि दिऊ थल्जी लहरी ताकि ऊईजाति तिंङ दोऊ आशीष खोकसोतो अतु वाईदा परमेश्वरे अब्राहमा रंङ साते यीशु मसीहू दोरच़ी लाहते। दंङ मसीह रिंङ विशवासो दोरच़ी, हेनर पवित्र आत्मा खोकपोंई अतु वाईदा दोई हेन्दिंङ रंड्रीमी थल्जी लाहते।

कानून ए वाईदा

¹⁵ हे गिऊ प्यारे साथी विशवासी रे, गेह केरे मीहतिंङ साधारण जीवनो उदाहरण रंड्रा कुट्रातग। अपेहल झुह्ट मीहरे एनोह बिचंङ वाईदा लहज़ातोर, दंङ माह ए अच़िया दोबि टालेके तरपोतो दंङ माह दोरिंङ छा बेहच़ी तरपोतो।

¹⁶ ध्वांए ठ्रोह परमेश्वरे एनोह वाईदा अब्राहम ए दोऊ खानदाना बि रेंई। पवित्र शास्त्र दि माह कुट्रा कि, “कांह खानदाना बि,” छना महसे तु पाहठी कुहषी तोह, पर दि इच्च़ा मीहू पाहठी गप्पा लहज़ा कि, “कांह खानदान,” दंङ दू मीह मसीह तोह।

¹⁷ अंऊ गेह कुट्रातग दोऊ मतलब दि तोह कि, “परमेश्वरे अब्राहमा रंङ साते वाईदा लहसी तहरे दोबि पुरा लहज़िमी कसम लहसी तहरे। वाईदा लहज़िमी पि राह ए निंज़ो सा सालो थल मूसा ओ कानूने माह ता परमेश्वरो वाईदा योह्च़ी तरपोतो दंङ माह ए परमेश्वरो वाईदा बि ध्यांए लेह च़रच़ा।”

¹⁸ परमेश्वरे हेंदिंङ आशीष दिऊ थल्जी माह रांई कि हेंज़ी मूसा ओ कानूनो भाषे लहज़ातंई, पर अब्राहमा बि दिऊ थल्जी रांई, छना कुचे दोबि रंड्रीमी वाईदा लाहते।

¹⁹ दंङ परमेश्वरे छना ठ्रोह इस्राएलो मीहतिंङ मूसा ओ कानून रांई? दूता अपराधो वहज़ा ज़ि थले रें च़रति, कि मूसाऊ कानून दू मुक्का तचेक बणेंके बंङज़ाते अपेहल तचेक कि अब्राहमो दू खानदान अच़ा माह अति, अतु पाहठी कि परमेश्वरे वाईदा लाहते। परमेश्वरे एनोह कानून स्वर्ग दूता तु दोरच़ी मूसा बि रांई, मूसा परमेश्वर ए मीहतु बिचंङ बिचवाई तोहई।

²⁰ अपेहल झुह्ट मीहतु बिचंङ समझोता शवाह, दोहपल बिचवाई ओ ज़रूरत शुहबी। पर अपेहल परमेश्वरे अब्राहमा रंङ साते वाईदा लहरी दंङ दोई अंऊ ला बिचवाई ओ इस्तेमाल माह लहरी, छना कुचे परमेश्वर इच्च़ा ए तोह।

कानूनो मकसद

²¹ दंङ छि दिऊ मतलब दि तोह कि मूसा कानून परमेश्वरो वाईदाओ खिलाप तोह? माह! बिल्कुल ला माह! छना कुचे झांह ठ्रोह कानून अंऊ जीवन रें तरपोर, दंङ मूसा ओ कानूनो भाषे लहज़िमी रंङ साते अनंत जीवन खोकच़ी तरपोंई।

²² पर पवित्र शास्त्र हेंदिंङ कंड्रा कि हेनर भत्तेर पापी शुई, भत्ते संसार पापो शाक्ति ओ अधीन। झांह लेह अच़िला यीशु मसीहू टोईच़ी विशवास लहज़ा, परमेश्वरो वाईदा दुह मीहतु थल्जी ए शोतो।

²³ पर मसीहू अपिमी ए दोऊ टोहकठे विशवास लहज़िमी बे तुहई हेनर यहुदी मीहरे मूसाओ अधीन तोईनी, दंङ मूसा ओ कानून हेंदु रखवाली ला लहज़ाते, दंङ मूसा ओ कानूने हेंदिंङ दू मुक्का तचेक कैदी ऊ ठ्रोह तहरि अपेहल तचेक कि परमेश्वरे हेंदु टोईच़ी मसीह प्रगट माह लहरी।

²⁴ मसीहू अपिमी तचेक कानून हेंदिंङ हेंदु मार्गदर्शन ए हेंदु देखभाल लहज़िमी थल्जी रेंई, ताकि हेनर यीशु मसीहू टोईच़ी विशवास लहज़िमी रंङ साते परमेश्वरो तुईज़ी धर्मी ठहरसोर।

²⁵ पर हेंतेग कि मसीह अच़ा अंजा दंङ हेनर दोऊ टोहकठे विशवास लेह तरपोंई दंङ हेंतेग हेंदिंङ मार्गदर्शनो थल्जी ए हेंदु देखभालो थल्जी कानूनो ज़रूरत माह।

^26-27 अपेहल केहच़ी मसीहू मिंदिंङ बपतिस्मा लेहपच़ातेंई, दंङ केहच़ी मसीहू खरकोई जीवन लेहकी चरच़ातंई। झांह लेह, अपेहल केहच़ी यीशु मसीहू टोईच़ी विशवास लाहतंई, दोहपल केरे भत्तेर परमेश्वरो कटुरे बणेंके इलोंई।

²⁸ दंङ हेंतेग माह ए अरिया यहुदी तोह दंङ माह ए ऊई जाति, माह अरिया दास तोह दंङ माह ए अरिया आज़ाद, ए स्वतंत्र, माह ता अरिया गंङमी दंङ माह ए मेच़िमी, केरे भत्तेर यीशु मसीह रिंङ इच्च़ा शुहचे इलजी तोतोंई।

²⁹ छना कुचे केरे भत्तेर यीशु मसीह रिंङ इच्च़ा शुहचे इलजी तोतोंई, दंङ हेंतेग केरे अब्राहमो परिवारो हिस्सा शुई, दंङ केतिंङ भत्ते धिर खोकसोतो, अतु परमेश्वरे अब्राहमो हखा वाईदा लहसी तहरे।