गलातियों 2 - लाहौली बाइबिल

ऊई प्रेरितो दोरच़ी पोलुसो आदर

¹ सपि सालो थल गेह बरनबास रंङ साते यरूशलेमो शहरो हखा इलिगा, दंङ तीतुसा बि ला साते रेंज़ा शिलिगा।

² गेह दोर दिऊ थल्जी इलिगा छना कुचे परमेश्वरे गिह्बी इबिमी थल्जी कुहते। दंङ अपेहल गेह दोर तोईग दंङ गेह अगुवा तंङ साते सामटे ठ्रोह दोहरिगा दंङ दोतिंङ दू रूठे खबरो पाहठी कंड्रीगा अंऊ गेह ऊईजाति तु बिचंङ प्रचार लहज़ी लेहकी तोईगा। ताकि झांह शुहबी मेस, कि गिऊ दि टेमो या थलेकी दू मेहनत शुहके शोतो।

^3-5 दोर्तिंङ रें मीहरे तोईरे अंऊ एनोह बचाएच़िमी थल्जी सिर्फ यीशु मसीहू टोहकठे विशवास माह लहज़ातेर पर यहुदी कानूनो टोहकठे ला विशवास लहज़ातेर। दोरे जासूसो ठ्रोह तोतोर दोरे ब्याके ठ्रोह अतिर ताकि हेंदु श्रींङमी तरीका ओ पाहठी ञेंहच़ोर छना कुचे मसीह हेंदिंङ आज़ाद लेह चरच़तो। हेले दू हेंदंङ यहुदी कानूनो भाषे लोहवा ते हेंदिंङ गुलाम बणाएषी जुंज़ातोर। पर हेंज़ी इच्च़ा मुक्का ला दोतु मांग स्वीकार माह लहरिन ताकि केरे रूठे खबरो सच्चाई रिंङ विशवास लहज़ी ज़ारी तोहनि। दोच़ी कुईर कि गिऊ साथी तीतुस ऊई जाति शुह, झांह लेह दोऊ खतना लेह जूंशी तोह। पर थल मुखंङ, अगुवा ज़ि दोबि खतना लहज़िमी थल्जी मज़बूर माह लहरिर।

⁶ यरूशलेमो कलीसिया ओ दू अगुवा ज़ि, अंऊ खबरा रिंङ सिखाएच़ातेर दोबि लहसिमी थल्जी गेह मज़बूर माह लहरिर। गिह्बी दि गप्पो दोरच़ी छल्ले फर्क माह पढेक्पी कि दोरे अगुवा अंयों खास तोतोर, छना कुचे परमेश्वर धकते कि रूप खंड्रा अपेहल ला न्याय माह लहज़ा।

⁷ दिऊ बदलारिंङ अगुवा ज़ि ञेंए च़रतिर कि गिह्बी ध्वांए ठ्रोह ऊईजाति तु बिचंङ रूठे खबरो प्रचार लहज़िमी कम रांहषी तोह, छना ठ्रोह पतरसा बि यहुदी मीहतु बिचंङ रूठे खबर प्रचार लहज़िमी कम रांहषी तोहई।

⁸ छना कुचे अंऊ परमेश्वरे पतरसा बि यहुदी तु प्रेरित बणाके दोऊ दोरच़ी सेवा कम लहरी, दोई ए गिह्बी ऊईजाति तु प्रेरित बणाके गिऊ दोरच़ी सेवा ओ कम लहरी।

⁹ अंऊ मीहरे कलीसिया ओ अगुवा समझेक्च़ातंई, मतलब याकूब, बरनबास, कैफा ए यूहन्ना, दोच़ी मोह्ड़े दाह ओ दू वाईदा सेहच़ी चरच़ातोर अंऊ गिह्बी खोकसा तोह। दोच़ी हेंदंङ साते गुह्ट्र मिलाके दि कंङातोर कि दोरे हेंदंङ साते राजी तोईरे। दोरे दि गप्पो थल्जी राजी शुईरे कि हेनर ऊईजाति तु कछंङ रूठे खबर सुनाएच़िमी थल्जी योंई दंङ दोरे यहुदी तु कछंङ।

¹⁰ दोच़ी हेंदंङ साते सिर्फ दि विनती लहरिर कि, कि हेनर यरूशलेम गरीब विशवासी तु मदत लोहनि, ठीक दि ला गे जुंज़ातेग।

अन्ताकिया शहरारिंङ पोलुसो दोरच़ी पतरसो विरोध

¹¹ अपेहल इच्च़ा ध्याड़ा पतरस अन्ताकिया शहरो हखा अति, दंङ गेह मीहतु तुईज़ी दोबि रैहच़ी लेहतिगा, छना कुचे छि दोई लहज़ाते दू गलत तोहई।

¹² पतरस दू विशवासी तंङ साते बगत ज़ोवा ते अंऊ यहुदी माह तोईरे। पर अपेहल याकूबो दोरच़ी च़रसी रें विशवासी यरूशलेम शहरंङ ज़ि अतिर, दंङ दू एनाबि ऊईजातिऊ दोरच़ी शत्‌ह तहच़ि लेहती दंङ दोतंङ साते बगत माह ज़ोवाते छना कुचे दू, दू यहुदी तंङ साते वेवाते अंऊ दोच़ी जुन्ज़ातेर कि भत्ते ऊईजातितु खतना लेह जूंशी तोह।

¹³ दंङ दोतंङ साते, अन्ताकिया शहर रंङ रें यहुदी विशवासी ज़ि कपट लहरिर, देर तचेक कि बरनबास ला दोतंङ साते वेवाते दंङ दोई ऊईजातिरंङ साते मेल-जोल तहच़ि बंद लेह केई।

¹⁴ पर अपेहल गेह खंईगा कि दोरे हेले रिंङ दुह सच्चाई ओ भाषे माह लहज़ातेर अंऊ रूठे खबर सिखाएच़ा दंङ गेह मीहतु तुईज़ी पतरसो हखा कुईग, “अपेहल काह इच्च़ा यहुदी शुहचे ला, ऊईतु जाति ओ रिति-रिवाज़ो भाषे माह लहज़ातन, दंङ काह ऊईजाति बि हेनर यहुदी तु रिति-रिवाज़ो भाषे लहज़िमी थल्जी दबाब छारिंङ केट्रातन?”

विशवास ए कम

¹⁵ हेनर अंऊ जेहक्पी बे यहुदी तोतोंई, दंङ ऊईजाति तु ठ्रोह पापी माह तोंई, छना कि हेंज़ी दोतिंङ कुट्रातंई।

¹⁶ तांला हेनर यहुदी विशवासी ञेंहच़ातंई कि मूसा ओ कानूनो भाषे लहज़ा अरिला मीह परमेश्वरो तुईज़ी धर्मी साबित माह शोतो, पर सिर्फ मसीहू टोहकठे विशवास लेह रंङ साते धर्मी ठहरेसोतो। झांह लेह ञेंहच़ी हेंज़ी ला यीशु मसीहू टोईच़ी विशवास लहरिन, कि हेनर कानूनो कमो दोरच़ी मशत, पर मसीहू टोईच़ी विशवास लहज़िमी रंङ साते धर्मी शोंई; छना कुचे कानूनो भाषे लहज़ा ते अरिला मीह धर्मी माह ठहरेसोतो।

¹⁷ रे यहुदी मीहच़ी चेहच़ातोर कि हेंज़ी पाप लहसी शुई, छना कुचे हेनर कानूनो भाषे लहज़िमी वहज़ा यीशु मसीहू टोहकठे विशवास लहज़ातंई। छि दिऊ मतलब दि तोह कि यीशु मसीह ज़ि हेंदु दोरच़ी पाप लेह लहतो आ? माह! बिल्कुल ला माह!

¹⁸ गेह अंऊ कानूनो भाषे अस्वीकार लाहतेग, अगर यह्च़ा दुह कानूनो भाषे लहज़ी स्वीकार लहज़ातग कि, दंङ गेह हेले इच्च़ा पापी शुगाह।

¹⁹ अपेहल गेह कानूनो भाषे लहज़िमी कोशिश लहरिगा, दंङ कानूने गेह दोषी ठहरागी च़रति। दिऊ थल्जी ञेंई कि कानूनो थल्जी गेह सिए इलिगा ताकि गेह परमेश्वरो थल्जी श्रींङी बंङज़ोग।

²⁰ गेह ञेंहनि मसीह रंङ साते क्रूसो टोईच़ी सिए इलिगा, एंतेग गेह श्रींङी माह केहश्रिगा। दंङ गेह फुका रिंङ एंतेग श्रींङी तोतोग; दंङ सिर्फ परमेश्वरो योह टोहकठे विशवास रंङ साते श्रींङे तोतोग, अंऊ दोई गेरंङ साते धोंण दाह लहज़ा कि गिऊ थल्जी एनोह जहान रें च़रति।

²¹ गेह दि गप्पो दोरच़ी इंकार लेह मरपोग कि परमेश्वरे एनोह मोह्ड़े दाह ओ दोरच़ी हेंदिंङ बचाके तहच़ा। छना कुचे अगर मीहरे मूसा ओ कानूनो भाषे लहज़ा धर्मिकता खोकच़ातोर, दंङ यीशु मसीह बि सिमी छल्ले ज़रूरत माह तोहई।