गलातियों 1 - लाहौली बाइबिल

नमस्ते

¹ गेह, पोलुस, केतिंङ दि डाक च़ेहच़ी लेहकी तोतोग। गेह इच्च़ा प्रेरित शुगाह, गेह माह अरिया मीहू दोरच़ी प्रेरित बणेंके शुगाह, पर यीशु मसीह ए परमेश्वर बाह ओ दोरच़ी, अंङषी शुगाह, अच़ि यीशु बि सिऊ दोतु बिचंङ ज़ि श्रींङमी लहसी शुह।

² गेह दि गेरंङ साते देरतिंङ अंयों विशवासी न्वा-रिंङ रे तोतोर, गलातिया प्रदेशो भत्ते कलीसिया ओ भत्ते विशवासी तिंङ नमस्कार कुट्रातोर।

³ गेह प्रार्थना लहज़ातग कि हेंदु परमेश्वर बाह ए प्रभु यीशु मसीहू दोरच़ी केतिंङ मोह्ड़े दाह ए शांति खोकसा लोहतो।

⁴ हेंदु परमेश्वर ए बाह ओ हिटीऊ हिसाबे यीशु मसीह ज़ि एनाबि हेंदु पापो वहज़ा ज़ि बलिदान लेह च़रति ताकि दोई हेंदिंङ दू मदम शाक्ति ओ दोरच़ी बचाके च़रपोतो अंऊ तोग दि संसारारंङ कम लहच़ी लेहकी तोह।

⁵ गेह प्रार्थना लहज़ातग कि परमेश्वरो महिमा युगानयुग शुहवा लोहतो। अमीन।

ऊई छल्ले रूठे खबर माह

⁶ गिह्बी दि गप्पो हेरानी शवाह, कि अंऊ परमेश्वरे केतिंङ मसीहू मोह्ड़े दाह ओ हिसाबे एनोह मीहरे शुहबिमी थल्जी बुलाएती, दोरंङ केरे धोंण युरनाह भटकेगी अई शत्‌ह शिक्षा ओ टोईच़ी विशवास लहज़ी लेहकी तोतोंई।

⁷ सिर्फ इच्च़ा हेले ए रूठे खबर तोह, पर गप्पा दि तोह कि, रेह मीहरे मसीहू पाहठी रूठे खबर बि खावाएच़ि जुंज़ातोर, दंङ दू मीहच़ी केतिंङ धोखा रंड्रातोर।

⁸ पर अगर हेंदु बिचंङ ज़ि अरिया स्वर्गदूत ला दू रूठे खबर छोड़ेके अंऊ ञेंहच़ी केतिंङ सुनाच़ी तातंई, अरिया अई शत्‌ह शिक्षा ओ टोईच़ी विशवास लहज़ी लेहकी तोतोंई। दंङ परमेश्वरे दोबि शाप रमतो।

⁹ छना ञेंहच़ी तुहई कुहषी तातंई, ध्वांए गेह हेंतेग कुट्रातग, कि दू रूठे खबर छोड़ेकी अंऊ केहच़ी ग्रहण लहसी तातंई, अगर अच़िया ऊई शत्‌ह खबरो पाहठी प्रचार लोहर ता दंङ दोऊ रूठे खबर शुहबिमी दावा लोहतो, दंङ परमेश्वर दोतिंङ शाप रमतो।

¹⁰ साफ तरीका रंङ, गेह मीहतिंङ खुश लहज़िमी कोशिश माह लहज़ातग, पर गेह बाह परमेश्वरा बि खुश लहज़ी तातग। अगर गेह एंतेग तचेक मीहतिंङ ए खुश लहज़ा शुचंङ ता गेह मसीहू सेवक माह शुचंङ।

पोलुस छना प्रेरित बणेक्ति

¹¹ हे गिऊ प्यारे साथी विशवासी रे, गेह केतिंङ दि कंड्रीमी तातग, कि अंऊ रूठे खबर गेह सुनाएच़ातग, दुह मीहतु दोरच़ी मश्त।

¹² छना कुचे गेह दू घेंङौ बाह-मेमे ओ दोरच़ी सिखेसी माह शुगाह दंङ माह ए अच़िया धर्मिक ज्ञानी ज़ि गिह्बी सिखासी शुह। पर एनोह ए यीशु मसीह ज़ि दोबि गिऊ टोईच़ी प्रगट लहरी।

^13-16 न्वारे केहच़ी ञेंहच़ातंई कि अपेहल गेह यहुदी धर्मो भाषे ए लहज़ातेग, दंङ छना श्रींङमातेग। गिऊ महसे साथी अंऊ गिऊ उम्रो तोईरे, पर गेह दुह भत्ते बे तुंखा तोईगा। छना कुचे गेह घेंङौ बाह-मेमेतु रिति रिवाज़ो भत्ते सेहमे भाषे लहज़ातग। दू टेमारिंङ यीशु थलेच़ि ज़ोज़ा दोरे अंऊ परमेश्वरो अराधना लहज़ातेर, सताच़िमी थल्जी हुंच़ा तोहई, गेह दू भत्ते तिंङ नाश लहज़िमी कोशिश लहरी। पर दोहपल परमेश्वरे फेंसला लहरी कि एनोह योह बि गिऊ टोईच़ी प्रगट लोहतो, ताकि गेह ऊईजाति मीहतु बिचंङ यीशु पाहठी प्रचार लेह तरपोग। परमेश्वरे ए तोह अच़ि गिह्बी जेह्कपिमी तुहई अंङे चरच़ाते, दंङ एनोह मोह्ड़े दाह ओ दोरच़ी दोई गिह्बी एनोह सेवाओ थल्जी बुलाके चरच़तो, अपेहल यीशु ज़ि एनाबि गिऊ टोहकठे प्रगट लहरी, दंङ दू मुक्का गेह सलाह लेहप्च़िमी थल्जी अतु कछंङ ला मेलिगा।

¹⁷ दंङ अंऊ गिहबे तुहई प्रेरित तोईरे, दंङ दोतंङ साते दोईमी थल्जी गेह यरूशलेम शहर मेलिगा; पर गेह ध्वांए अरब देशो हखा अच़ा इलिगा दंङ दोरच़ी यह्च़ा दमिश्क शहर ओ हखा वापिस अच़ा अतिगा।

¹⁸ दंङ यह्च़ा षुमु सालो थल गेह प्रेरित पतरस रंङ साते दोईमी थल्जी यरूशलेम शहरो हखा इलिगा, दंङ दोऊ कछंङ संङा ध्याड़ा तचेक बंङज़िरी।

¹⁹ दू मुक्का गेह सिर्फ अंऊ ऊई प्रेरिता रंङ साते दोरिगा, दू प्रभु यीशु न्वा याकूब तोहई।

²⁰ दि गप्पो थल्जी परमेश्वर गिऊ गवाह तोह कि गेह छिल्ला धिर अंऊ केतिंङ चेहच़ातग, दोरिंङ छल्ले हप्सी माह।

²¹ यरूशलेम शहर इबिमी थल गेह सीरिया ए किलिकिया ओ प्रदेशो हखा अतिगा।

²² पर दू मुक्का यहुदिया प्रदेशो कलीसिया, अंऊ मसीह रिंङ तोईरे, दोरे गेरंङ साते दोइरे माह।

²³ पर दुह विशवासी ज़ि घड़ी-घड़ी दिए रेड्रीर; कि “इच्च़ा टेमारिंङ अंऊ हेंदु सताएच़ा तोहई, एंतेग यीशु मसीह रिंङ दू ए रूठे खबरो प्रचार लहज़ा, अंऊ दोबि दुह नाश लहज़िमी कोशिश लहज़ाते।

²⁴ झांह लेह परमेश्वरे गेरंङ साते छि लहरी, दोऊ थल्जी दोरे लगातार परमेश्वरो महिमा लहज़ी लेहतिर।”