इफिसियों 6 - लाहौली बाइबिल

याह-बाह ए कटुरे

^1-3 पवित्रशास्त्र कुट्रा: “केनातु याह-बाह तु आदर लोह, दोहपल करंङ साते भत्ते रूठे शोतो, दंङ धरतीऊ टोईच़ी कांह जीवन महसे शोतो।” दि मुन्डो हुकुम तोह अपि परमेश्वरे इच्च़ा वाईदा रंङ साते रंदे। झांह लेह, हे कटुरे, केरे अंऊ प्रभुरिंङ विशवास लहज़ातंई, केहतु थल्जी दि रूठे तोह कि केरे केनातु याह-बाह ओ हुकुम मनेक्तुंई।

⁴ दंङ केहच़ी अंयों ला याह-बाह ए केनातु कटुतिंङ रोहष माह लोहनि, पर प्रभु शिक्षा, ए चेतावनी रंड्रा ते दोऊ पालन-पोषण लंहि।

मालिक ए दास

⁵ दासरंङ साते गिऊ विनती तोह कि अंऊ मीहरे दि संसारारंङ केहतु मालिक तोतोर, दोतु आदर सत्कार सिर्फ दिखावा थल्जी थालंही। केहतु बिचंङ हर इच्च़ा बि बेह्द ए ड्केगी छना कि मसीहू, ध्वांए मालिको ला हुकुमो भाषे लंहि।

⁶ केतिंङ हर टेम केनातु-केनातु मालिका तु भाषे लहज़ी जूंशी तोह, सिर्फ दोहपल ए मशत अपेहल दोच़ी केरे खंड्रातोर। पर मसीहू दास ठ्रोह बणेंके बंङज़ेंई, अंऊ एनोह भत्ते सेहमे दू ए लहज़ातोर अंऊ परमेश्वरे चेहच़ा कि दोच़ी लोहर।

⁷ केरे खुशी रंङ साते केनातु सेवा ओ कम लोहवा लंहि, दि ञेंई कि केरे मीहतु मशत पर परमेश्वरो सेवा लहज़ातंई;

⁸ छना कुचे केहच़ी ञेंच़ातंई, कि अंऊ दू छना रूठे कम लोहतो, चाहे दास शुह, चाहे आज़ाद मीह, दू कमो प्रतिफल दोई प्रभु दोरच़ी ए खोकपोतो।

⁹ दि तरीका रंङ अंऊ मालिक तोतोर, दोरे ला एनोह दास रंङ झांह ठ्रोह व्यवहार ए दोतिंङ बेई लहज़ी ए धमकाएच़ी छोड़ेके च़रतेंई, दंङ दोतंङ साते रूठे बरताव लंहि। छना कुचे केहच़ी ञेंच़ातंई, कि दोतु ए केहतु झुल्लो मालिक स्वर्गारिंङ तोह, दंङ दोई अतंङ साते ला भेद-भाव माह लहज़ी।

आत्मिक लड़ाईऊ हथियार

¹⁰ आखरी गप्पा दि तोह कि केरे प्रभु सामर्थो दोरच़ी आत्मिक तरीका रंङ पक्‍का शुहचे इलांई।

^11-13 हेनर मीहतु खिलाप लड़ाई माह लड़ेक्पातंई। पर हेनर प्रधान ए अधिकारी तु खिलाप ए हन्यारो शाक्ति ए आत्मिक संसारो सामर्थो खिलाप तेंङसी लेहकी तोतोंई। झांह लेह भत्ते हथियार छ़ुह्च़ी च़रतुंई अंऊ परमेश्वरे रंड्रा। ताकि यह्च़ा अपेहल दू मदम ध्याड़ा अपतो, दंङ केरे शेतानो चालो दोरच़ी बचेके बंङज़ुंई। दंङ अपेहल दि लड़ाई योह्सा योतो, तांला केरे पक्‍का शुहचे खड़े बंङज़ी तरपोंई।

¹⁴ झांह लेह परमेश्वरो सच्चाई बि केनोह ऊमतु छिरतु ठ्रोह छ़ुह्च़ी च़रतुंई, दंङ केनातु धार्मिकता बि कवचो ठ्रोह लेहकी च़रतु।

¹⁵ दंङ परमेश्वरो शांति ऊ रूठे खबर सुनाएच़िमी थल्जी सेनिका तु ठ्रोह लड़ाई ओ थल्जी केनातु कोंज़ा रिंङ तेयारी ओ बूटरे लेहकी च़रतुंई।

¹⁶ दि भत्ते तु अलावा, मसीहू टोईच़ी पक्‍का विशवास लहज़ी दोबि ढालो ठ्रोह समान कुरच़ा तेयार बंङज़ुंई ताकि केरे दुह मांज़ी शेतानो भत्ते तीरार सच़ी तरपोंई।

¹⁷ उद्धार मतलब परमेश्वरा बि बचाएच़िमी थल्जी सामर्थो टोबु लगाके तंही। पवित्र आत्माओ तलवार अंऊ परमेश्वरो बचन तोह दोबि कुरच़े च़रतुंई।

¹⁸ दंङ भत्ते मुक्का ए भत्ते पाहठी हेंदिंङ ध्वांए ए प्रार्थना ए बिनती लहज़ी जूंशी तोह। छना पवित्र आत्माज़ि हेंदु अगुवाई लहज़ा। झांह लेह चेहके बंङज़ेंई दंङ भत्ते परमेश्वरो मीहतु थल्जी हमेशा प्रार्थना लोहवा लंहि।

¹⁹ दंङ केरे गिऊ थल्जी ला प्रार्थना लंहि अंऊ कुट्री मुक्का गिह्बी झांह बचन रंड्री जूंस कि, गेह याहब रंङ साते दू रूठे खबरो भेद कंज़े तरपोग।

²⁰ दिऊ थल्जी गेह षंङणी रिंङ छ़ुह्च़ी राजदूतो ठ्रोह सेवा लहज़ातग। प्रार्थना लांहि कि, छना ठ्रोह गिह्बी कुट्री जूंस, ध्वांए गेह हिम्मत रंङ साते रूठे खबरो प्रचार लेह तरपोग।

अन्तिम अभिवादन

²¹ प्रभु संगति रिंङ प्यारे न्वा ए विशवासो जोगे सेवक तुखिकुस केतिंङ दि भत्ते कंज़े च़रपोतो, ताकि केहच़ी ला ञेंई तरपोंई कि गेह छना तोतोग दंङ छि लहच़ी लेहकी तोतोग।

²² दोबि गेह केहतु कछंङ दिऊ थल्जी चरच़ातग, कि केरे ञेंहतु हालात ञेंई तरपोंई, दंङ दोई केहतु सेहमरिंङ याहब रमतो।

²³ गेह‍ प्रार्थना लहज़ातग, कि परमेश्वर बाह ए प्रभु यीशु मसीहू दोरच़ी विशवासी न्वारे तिंङ शांति ए विशवास रंङ दाह खोकसोतो।

²⁴ दंङ गेह दि ला प्रार्थना लहज़ातग, कि परमेश्वर दू भत्ते तु टोईच़ी एनोह मोह्ड़े दाह कंबतो अंऊ हेंदु प्रभु यीशु मसीहरिंङ साते दाह लहज़ातोर। दू दाह अंऊ अपेहल ला योहसिमी माह।