इफिसियों 5 - लाहौली बाइबिलछंङीऊ कटुरे बणेक्तुंई 1 केरे परमेश्वरो कटुरे शुई अतंङ साते दोई दाह लहज़ा, झांह लेह दोऊ ठ्रोह बणेक्पिमी कोशिश लंहि। 2 मसीहू उदाहरणो हिद लहज़ा, ऊईतु थल्जी दाह रंङ साते जीवन श्रींङमा तंई, अच़ि केतंङ साते दाह लहज़ा दंङ केहतु पाप उठाएच़िमी थल्जी एनाबि बलिदान लेह च़रति। दंङ दिरंङ खुश तोहई छना कुचे दू बलिदान दोऊ थल्जी इत्रो ठ्रोह तोह। 3 छना परमेश्वरो मीहतु थल्जी ठीक तोह, ध्वांए केतंङ कुकम, ए अंयों पाहठी अशुद्ध कम, या लालचो गप्पा ला शुहबी मेस। 4 दंङ माह निर्लजता रंङ साते गप्पा लहज़ी, माह मुर्खता ओ गप्पा, दंङ माह ए मज़ाको घटिया गप्पा लहज़ी केहतु थल्जी ठीक तोह, पर केतिंङ दिऊ ठाहरीरिंङ परमेश्वरो धन्यवाद लहज़ी जूंशी तोह। 5 छना कुचे केहच़ी दि रूठे रंङ ञेंच़ातोंई कि अरिला कुकम लहज़ा, मदम कम लहज़ा, या लालची मीह, अंऊ मुर्ति पूजाऊ बराबर तोह, झांह ठ्रोह कम लहज़ा मीहरे अपेहल ला मसीह ए परमेश्वरो राजो हिस्सा माह बणेक्पोर। 6 दिरे मीहतु दोरच़ी मुर्ख था बणेक्तेंई अंऊ दि पापो थल्जी बहाना बणाएषिमी कोशिश लहज़ातंई। छना कुचे दिए कमो दोरच़ी परमेश्वरो रोहष हुकुम माह मनेक्च़ा दोतु टोईच़ी भड़केक्पा। 7 झांह लेह केरे दि पापो कम लहज़ी दोतु सहभागी थाशुंई। 8 तुहई केरे हंयार बंङज़ा मीहतु ठ्रोह तोईनी, पर हेंतेग केरे छंङीरिंङ बंङज़ा मीह शुई छना कुचे केरे प्रभु मीहरे बणेंके इलजी तोतोंई झांह लेह छंङीरिंङ बंङज़ा मीहतु ठ्रोह कम लंहि। 9 छना कुचे अगर अरिया मीह छंङीरिंङ तोह ता, दंङ दोऊ चाल-चलन रूठे ए धर्मिक शुहबी दंङ दोऊ टोहकठे भरोसा लेह तरच़ी। 10 दि सिखेक्च़िमी कोशिश लंहि, कि प्रभुबि छि रूठे च़ेहसी। 11 अंऊ मीहरे पापो कम हंयार रिंङ लहज़ातोर, दोतंङ साते सहभागी थाशुंई, पर मीहतिंङ सिखाएक्तुंई, कि दि कम गलत शुह। 12 छना कुचे दू अविशवासी मीहतु गुप्त कमो गप्पा लहज़ी ला षेहदो गप्पा तोह। 13 अपेहल छा चीज़ो टोईच़ी छंङी चमकेक्पा दंङ भत्ते ज़ि दू खंड्रे तरच़ी कि दू चीज़ छना ठ्रोह तोह, छना कुचे अपेहल छंङी छा चीज़ प्रगट लहज़ा दंङ दू चीज़ एनेह ए छंङी शुहचे इबि। 14 झांह लेह इच्च़ा कहावत तोह, अंऊ दि कंड्रा, “हे इमरिंङ इलज़ा रे, अच़ुई! दंङ मुर्दा तु बिचंङ ज़ि श्रींङे ईला; दंङ मसीह एनोह छंङी कांह टोईच़ी चमकेक्पोतो।” 15 झांह लेह ध्यानारंङ साते खांई, कि केरे छना ठ्रोह जीवन श्रींङमी लेहकी तोतोंई, मुर्खा तु ठ्रोह मशत, पर बुद्धिमानो तु जीवन श्रींङमा तंई। 16 केनोह हर इच्च़ा मोकाऊ इस्तेमाल बुद्धि रंङ साते भलाई लहज़िमी थल्जी लंहि, छना कुचे ध्याड़ा मदम तोह। 17 झांह लेह मुर्ख था बणेक्तुंई, पर दि समझेक्सिमी कोशिश लोह कि प्रभु केतंङ साते छि लहज़ी जुंज़ा। 18 सरो नशारिंङ मस्त शुहचे केनातिंङ नाश थालंही, छना कुचे दिरिंङ मीहरे एनोह सुधबुधो दोरच़ी धकतेखा शुचे यवाह। बल्कि पवित्र आत्माबि केतिंङ एनोह सामर्थे पिंङड्री रांई। 19 दंङ अपेहल केरे ठ्रोका शवातंई, दंङ भजन स्तुतिगान ए आत्मिक गीत कुट्रा लंहि, दंङ केनातु-केनातु सेहमरिंङ प्रभु तुईज़ी गीत कुट्रा ए स्तुति लोहवा लंहि। 20 छिल्ला धिर हेंदु प्रभु यीशु मसीह ज़ि लहसी तोह दोऊ वहज़ा ज़ि हमेशा हेंदु बाह परमेश्वरो भत्ते गप्पातु थल्जी धन्यवाद लोहवा लंहि। 21 मसीहू थल्जी श्रदा ए भक्ति तहज़िमी वहज़ा, केरे इदि-अई दिऊ अधीन बंङज़ुंई। मेच़ा ए गगसा तिंङ हुकुम 22 हे मेच़ारे, केनातु गगसो झांह ठ्रोह अधीन बंङज़ुंई छना केरे प्रभु अधीन बंङज़ातंई। 23 छना कुचे गगसा ता मेच़ो पुंज़ा शुह छना कि मसीह कलीसिया ओ पुंज़ा तोह; दंङ मसीह कलीसिया ओ उद्धारकर्ता तोह, अंऊ कि दोऊ एनोह फुक शुह। 24 छना कलीसिया मसीहू अधीन तोह, ध्वांए मेच़ार ला हर गप्पारिंङ एनोह-एनोह गगसो अधीन बंङज़ुंई। 25 हे गगसा रे केनातु-केनातु मेच़ा रंङ साते दाह तंही, छना मसीह ज़ि ला कलीसिया रंङ साते दाह लहच़ी एनाबि दोऊ थल्जी बलिदान लेह च़रति। 26 ताकि दोरे कलीसिया बि परमेश्वरो बचनो ति रंङ च़िए शुद्ध लेह पवित्र बणाके तरपोर। 27 दू एनोह कलीसिया ओ थल्जी ला सिए इलि ताकि दू एनोह भत्ते मीहतिंङ सिद्ध बणाके तरपोतो दंङ हेंदिंङ एनोह हाज़िर रिंङ हपि तरपोतो, अतु दोर छा दोष या पाप या मदम गप्पा शुहबी मेस; पर दोरे पवित्र ए सिद्ध शुहबी जूंस। 28 ध्वांए गगसा ला एनोह-एनोह मेच़ारंङ साते एनोह फुको बराबर दाह तहज़ा, दू ऐनाहरंङ साते दाह लहज़ा। 29 छना कुचे अच़िया अपेहल ला एनोह फुकारंङ साते बैर माह तहच़ि, पर दोऊ देख-भाल लहज़ा, छना मसीह कलीसिया ओ देख-भाल लहज़ा। 30 छना कुचे हेनर भत्तेरे मसीहू फुको अंङों बराबर शुंई। 31 छना पवित्रशास्त्र ज़ि कुट्रा, “गंङमी एनोह याह-बाह छोड़ेके एनोह मेच़ारंङ साते मिलेकी बंङज़तो, दंङ दोकु झुल्ला इच्च़ा फुका शुहचे बंङज़ोर।” 32 दि महस मोह्ड़े भेद तोह; पर गेह हेले रिंङ मसीह ए कलीसिया ओ बिचंङ नाता ओ पाहठी गप्पा लहज़ातग। 33 पर दि केहतु टोईच़ी ला लागू शवाह कि, केहतु बिचंङ हर इच्च़ा एनोह मेच़ारंङ साते केनोह बराबर दाह तोह, दंङ मेच़ा ला एनोह गगसो आदर लोह। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation