इफिसियों 4 - लाहौली बाइबिल

मसीहू फुकरिङ एकता

¹ झांह लेह अंऊ गेह प्रभु यीशु सेवा लहज़िमी वहज़ा रिंङ जेलारिंङ तोतोग, केतंङ साते बिनती लहज़ातग, कि केरे दू बुलाहट रंङ साते अतंङ परमेश्वर एनोह कटुरे शुहबिमी थल्जी बुलाएक्तो, दोऊ हिसाबे केनातु जीवन श्रींङमातंई।

² मतलब भत्ते दीनता ए नम्रता रंङ साते, दंङ धीरज़ तहच़ि दाह रंङ साते इदि-अई दिऊ व्यवहार सहन लंहि।

³ झांह लहज़िमी कोशिश लंहि ताकि केरे लगातार मेल-मिलाप रंङ साते बणेंके तोंई, छना कुचे केरे परमेश्वरो आत्माओ दोरच़ी इच्च़ा शुहचे इलजी तोतोंई।

⁴ हेनर भत्तेर विशवासी दंङ इच्च़ा ए फुको अंङों ठ्रोह तोतोंई, दंङ हेंदिंङ भत्ते दि इच्च़ा ए पवित्र आत्मा खोकसा तोह। झांह ठ्रोह केतिंङ इच्च़ा उम्मीद रांहषी तोहई, अपेहल केरे परमेश्वरो मीह शुहबिमी थल्जी बुलासी तोतोंई।

⁵ हेंदु भत्ते तु इच्च़ा ए प्रभु तोह, अतु टोहकठे हेंज़ी विशवास लहज़ातंई, दंङ सिर्फ मसीहू मिंदंङ ए हेंदिंङ बपतिस्मा खोकसा तोह।

⁶ दंङ हेनर भत्तेर इच्च़ा ए परमेश्वरो अराधना लहज़ातंई अंऊ हेंदु भत्ते तु बाह तोह। दू हेंदु भत्ते तु टोईच़ी राज लहज़ा, दंङ हेंदु भत्ते तु दोरच़ी कम लहज़ा, दंङ दू हेंदंङ भत्तेतंङ साते बंङज़ा।

⁷ पर मसीह ज़ि हेंदु बिचंङ हर इच्च़ा बि दोऊ कम लहज़िमी थल्जी शत्‌ह-शत्‌ह खास गुण रांहषी ततो। दंङ दोबि अंऊ हिसाबे दोई रांहषी जुंज़ा, दुह हिसाबे रें च़रसी ततो।

⁸ झांह लेह मसीहू पाहठी पवित्र शास्त्र कुट्रा, “अपेहल दू तोरिङखी ठाहरीरिंङ इलि, दंङ दू एनाह रंङ साते ऊई ला कैदीरिंङ रैंज़ा शिली, दोई दंङ मीहतिंङ आशीष रेंईं।”

⁹ अपेहल पवित्र शास्त्र कुट्रा, “दू तोरिखी ठाहरीरिंङ इलि,” दंङ दिऊ मतलब दि तोह कि मसीह तुहई अधोलोकंङ योंखा तक्सा इलि।

¹⁰ मसीह अंऊ योंखा अति, दू, दुह ए शुह अंऊ सर्ग बेहच़ी ला खेका इलि, ताकि दू भत्ते ठाहरिरिंङ शुहबी जूंस।

¹¹ दि मसीह तोहई अच़ि दि ज़िम्मेवारी कलीसिया बि रेंई: दोई रेह तिंङ प्रेरित शुहबिमी थल्जी अंङे च़रति दंङ रेह तिंङ भविष्यवक्ता बणेषिमी थल्जी, दंङ रेह तिंङ रूठे खबर सुनाएच़िमी थल्जी, दंङ रेह तिंङ रखवाली लहज़िमी थल्जी दंङ रेह तिंङ सिखाच़िमी थल्जी अंङे च़रतिर।

¹² अंऊ दिरंङ साते पवित्र मीहरे सिद्ध शुहचे योरे दंङ सेवाऊ कम लोहवा लोहरे मसीहू फुकरिङ तरक्की खोकसोतो।

¹³ दि दोहपल तचेक जारी बंङज़ोतो अपेहल तचेक कि हेनर हेंदु विशवास ए परमेश्वरो योह पाहठी हेंदु समझरिंङ इच्च़ा शुहचे माह योंई। दंङ हेनर सिद्ध शुहचे योंई, छना मसीह शुहचे तोह, दंङ हेनर भत्ते पाहठी दोऊ ठ्रोह शुहचे योंई।

¹⁴ हेंतेग बे हेंदिंङ कटुतु ठ्रोह व्यवहार लेह माह जूंस। झांह लेह हेंदिंङ अपेहल ला धोखेबाज़ मीहतु हप्सी शिक्षा रिंङ माह फसेफी जूंस, अंऊ हेले च़ेहसा। छना कुचे हेनर दू किशतीऊ ठ्रोह माह तोंई अतिंङ छ्वली देखा-नोखा लहज़ा दंङ लन्न ज़ि देखा-नोखा किरज़ी लहज़ा।

¹⁵ पर दाह रंङ हेले कुट्रा भत्तेर गप्पारि मसीह ठ्रोह सिद्ध शुहचे इलांई, अंऊ विशवासी कलीसिया पुंज़ा तोह।

¹⁶ छना ठ्रोह इच्च़ा मीहु फुक दोऊ भत्ते जोड़ो दोरच़ी इच्च़ा साते जुड़ेके बंङज़ा, ध्वांए ठ्रोह मसीह हेंदिंङ भत्ते तिंङ अंऊ दोऊ टोहकठे विशवास लहज़ातंई, एनोह फुको अंङों ठ्रोह जोड़ेके तहज़ा। दंङ, अपेहल फुको भत्ते अंङ रूठे रंङ कम लहज़ातोर दंङ फुक बणेक्पा दंङ पक्‍का शवाह; ध्वांए, अपेहल हेंदु बिचंङ ज़ि इच्च़ा ज़ि दू कम लहज़ा अंऊ मसीह हेंदिंङ रांहषी ततो दंङ हेनर ला सिद्ध ए पक्‍का शुहचे बड़ेकी योंई, दंङ इदि-अई दिरंङ साते ऊई ला महस दाह लोहनि।

मसीह रिंङ खरकोई जीवन

¹⁷ झांह लेह दू अधिकार रंङ साते अंऊ प्रभु ज़ि गिह्बी रांहषी तोह, गेह केतिंङ दि कुट्रातग कि केरे अविशवासी मीहतु ठ्रोह बेकार विचारा रंङ साते केनातु जीवन बरबाद था लंहि।

¹⁸ दोरे ता परमेश्वरो गप्पा समझेकी मरच़ातोर। छना कुचे दोरे परमेश्वरा बि माह ञेंहच़ातोर दंङ ज़िद्दी तोतोर, परमेश्वरो दुह खरकोई जीवन दोतु दोर्तिंङ माह, अंऊ दोई हेंदिंङ रंड्रा।

¹⁹ दोरे हेंतेग मदम कम लहज़िमी थल्जी एनाबि दोषी माह चेहच़ातोर, झांह लेह दोच़ी एनाबि मदम कम लहज़िमी थल्जी रें च़रतिर। दोरे लगातार भत्ते पाहठी मदम कम लहज़ातोर, दंङ दोरे दुह भत्ते चीज़ा तु लालच लहज़ी अपेहल ला बंद माह लहज़ातोर।

²⁰ पर दि दू मह शुह केहच़ी मसीहू शिक्षा ओ दोरच़ी सिखेकतुंई।

²¹ छिल्ला धिर केहच़ी यीशु मसीहू पाहठी रेड्री तातंई दंङ छिल्ला धिर केहतु सिखाएच़ा दोच़ी केतिंङ सिखासी तोह, दू पक्‍का रूपारिंङ दोऊ खबर शुह।

²² केहतु सिखाएच़ा दोच़ी केतिंङ दू तरीका छोड़ेक्च़िमी शिक्षा रेंईर, अतु हिसाबे केहच़ी व्यवहार लहज़ातंई। केहतु मदम हिटी केतिंङ धोखा रें च़रति दंङ केहतु जीवन बरबाद लेह च़रति।

²³ पर पवित्र आत्माबि केनातु विचार ए व्यवहार बि खरकोई लेह रांई।

²⁴ छना कुचे परमेश्वरे केतिंङ इच्च़ा खरकोई स्वाभाव रें च़रति अंऊ बिल्कुल दोऊ एनोह स्वाभावो ठ्रोह तोह। झांह लेह दि खरकोई स्वाभावो हिसाबे हेले रिंङ धर्मी ए पवित्र जीवन श्रींङे च़रतुंई।

²⁵ झांह लेह हप्सी कुट्री छोड़ेके, हर इच्च़ा साथी विशवासारंङ साते हेले कुंई, छना कुचे हेनर भत्तेर इच्च़ा फुको अंङ शुई।

²⁶ अगर केतिंङ रोहष अपतो, दंङ ध्यान तंही कि पाप थालंही; दंङ ञोंकोल शुहतर तचेक केहतु रोहष शांत शुहबी जूंस।

²⁷ दंङ झांह लहच़ी शेतानाबि मौका थारांई, कि दोई केहतु दोरच़ी मदम कम लेह लोहतो।

²⁸ चोरी लहज़ा यह्च़ा चोरी थालोहू; पर दोबि ईमानदारी रंङ साते मेहनत लहज़ी जूंशी तोह, ताकि गरीब मीहतु मदत लहज़िमी थल्जी दोऊ कछंङ छा शोतो।

²⁹ अंऊ ला झखंजी गप्पा केहतु आहच़ि हुंच़ी मेस, पर दू गप्पारे कुंई अंऊ मीहतु थल्जी ज़रूरी तोह, अंऊ कि दोतिंङ विशवास रिंङ पक्‍का लहज़िमी थल्जी मदत लोहतो। दू मुक्का छिल्ला केहच़ी कुंई दू केहतु रेड्रा दोतु थल्जी रूठे शोतो।

³⁰ केनातु कमो दोरच़ी पवित्र आत्माबि दुखी थालंही, अंऊ केहतु छुटकारो थल्जी बयाना ओ रूपारिंङ रांहषी तोह।

³¹ भत्ते पाहठी कड़वाहट ए प्रकोप ए रोहष ए लड़ाई-झगड़ा, दंङ निन्दा भत्ते नफरत केहतु दोरच़ी शत्‌ह लेह चरच़ि।

³² इदि-अई दिऊ टोईच़ी दया, ए करुणामय शुहचे इलांई, दंङ छना परमेश्वरे मसीह रिंङ केहतु गुनाह माफ लहरी, ध्वांए केरे ला इदि-अई दिऊ गुनाह माफ लंहि।