इफिसियों 3 - लाहौली बाइबिल

ऊई जातितु बिचंङ पोलुसो सेवा

¹ झांह लेह, गेह पोलुस केहतु थल्जी प्रार्थना लहज़ातग। गेह जेलारिंङ तोतोग छना कुचे गेह केरे ऊईजाति मीहतिंङ रूठे खबर सुनाके यीशु मसीहू सेवा लहज़ातग।

² केहच़ी पक्‍का रेड्री शोंई, कि परमेश्वरे एनोह मोह्ड़े दाह ओ दोरच़ी गिह्बी रूठे खबर सुनाएच़िमी ज़िम्मेवारी रांहषी ततो।

³ अति गेह दि पाहठी तुहई ए थोड़े अरे च़ेऐ च़रचातेग, कि परमेश्वरे एनेह ए गुप्त भेद बि गिऊ टोईच़ी प्रगट लहरी।

⁴ छना केरे दू डाक पढे़क्पोंई, दंङ केतिंङ दिला ला पता लेहकी योतो कि गेह हेले रिंङ मसीहू गुप्त भेदो पाहठी अंयों रूठे रंङ ञेंहच़ातग।

⁵ दि गुप्त भेद तुहई कि पीढ़ी तु मीहतिंङ कांहषी माह, हेंतेग पवित्र आत्माज़ि एनोह पवित्र प्रेरित ए परमेश्वरो खबर रंड्रा मीहतु टोहकठे प्रगट लहसी ततो।

⁶ भेद दि तोह कि यीशु मसीह रिंङ रूठे खबर दोरच़ी यहुदी तु ठ्रोह ऊईजाति ऊ मीहरे दू ए आशीष खोकपोरे, दंङ दोरे इच्च़ा ए फुको हिस्सा तोतोर, अंऊ परमेश्वरे यहुदी मीहतंङ साते लहसी तते।

⁷ परमेश्वरे गिह्बी एनोह मोह्ड़े दाह ए सामर्थो दोरच़ी रूठे खबरो सुनाएच़िमी थल्जी दोऊ सेवक बणाएक्तो।

⁸ गेह परमेश्वरो भत्ते मीहतु बिचंङ कवचि शुगाह, पर परमेश्वरो मोह्ड़े दाह गिऊ टोहकठे शुई, कि गेह ऊईजाति मीहतिंङ मसीहू महसे आशीषो पाहठी रूठे खबर सुनाएपोग। दि आशीष अंऊ मसीहू दोरच़ी खोकसा, दुह मीहतु समझ बे धकते तोह।

⁹ दंङ गिह्बी दि ब्याके योजना बि भत्ते तिंङ समझाच़िमी थल्जी ला अंङषी तोहई। परमेश्वर अंऊ भत्ते संसारो रचायिता शुह, दोई तुहई शुरूआत बेहच़ी ए दि योजना गुप्त तहसी तते,

¹⁰ ताकि एंतेग कलीसिया ओ दोरच़ी, परमेश्वरो शताह पाहठी ज्ञान दुह प्रधान ए मोह्ड़े अधिकारितु टोईच़ी अंऊ स्वर्गारिंङ तोतोर, प्रगट लोहर।

¹¹ परमेश्वरे एनोह हिसाबे झांह लाहते, अंऊ दोई हेंदु प्रभु यीशु मसीहरिंङ पूरा लहरी।

¹² हेनर मसीहरिंङ विशवास लहज़ातंई, दंङ झांह लेह हेनर हिम्मत ए आत्मविशवास रंङ साते परमेश्वरो कछंङ अपातंई।

¹³ झांह लेह गेह विनती लहज़ातग कि अंऊ दुख केहतु थल्जी गिह्बी शुहबी लेहकी तोह, दोतु वहज़ा ज़ि परेशान शुहबी मेस, छना कुचे दि भत्ते केहतु महिमा ओ थल्जी तोह।

इफिसियों तु थल्जी पोलुसो प्रार्थना

¹⁴ झांह लेह, गेह पोलुस पुष्टू भारे बंङज़ा केहतु थल्जी बाह परमेश्वरो हखा प्रार्थना लहज़ातग,

¹⁵ दू इच्च़ा ए तोह अंऊ विशवासी तु भत्ते टबरातु बाह तोह अंऊ दिरंङ साते सर्गंङ ए धरतीऊ टोईच़ी तोह,

¹⁶ गेह प्रार्थना लहज़ातग कि, परमेश्वर एनोह महिमा दू खज़ाना दोरच़ी केतिंङ दि दान रमतो, कि केरे दोऊ आत्माओ दोरच़ी केनातु-केनातु अंदरेग सामर्थ खोकच़े बलवन्त शुचे योंई।

¹⁷ दोऊ टोहकठे विशवासो लहज़िमी दोरच़ी मसीह केहतु अंदरेग हमेशा बसेकी बंङज़ोतो। दंङ गेह प्रार्थना लहज़ातग कि परमेश्वरो दाह रिंङ केरे पक्‍का शुचि,

¹⁸ भत्ते पवित्र मीहतिंङ साते दि गप्पा बि रूठे रंङ समझेक्सिमी कोशिश लंहि कि मसीहू दाह बेले ए लाम्हे ए रंगीरिंङ, दंङ डुह्गे रिंङ अंयों तोत।

¹⁹ गेह प्रार्थना लहज़ातग कि, केरे मसीहू दि दाह ञेंए तरपोंई, अंऊ मीहु समझ बे धकते तोह, ताकि केहतु स्वाभाव परमेश्वरो स्वाभावो ठ्रोह शुहचे योतो।

^20-21 परमेश्वरो महिमा शुहबी जूंस! दुह झांह ठ्रोह सामर्थी परमेश्वर तोह, अंऊ हेंदु बिनती ए सोचेक्सी ए समझेक्सी बे ला महस लेह तरच़ा। दोई एनोह सामर्थ हेंदु अंदरेग कम लहज़ा। दोऊ महिमा विशवासी तु झुण्डा रिंङ ए मसीह यीशु पीढ़ी बे पीढ़ी तचेक हमेशा-हमेशा शुहवा लोहतो। अमीन।