इफिसियों 1 - लाहौली बाइबिल

नमस्ते

¹ गेह, पोलुस, दि डाक चेह्ची लेहकी तोतग। गेह परमेश्वरो हिटी ऊ हिसाबे यीशु मसीहू प्रेरित शुगाह, गेह दि डाक इफिसुस शहरो बंङज़ा परमेश्वरो मीहतिंङ चेहच़ातग, अंऊ मसीहू यीशु थल्जी वफादार तोह।

² गेह प्रार्थना लहज़ातग कि हेंदु बाह परमेश्वरो ए प्रभु यीशु मसीहू दोरच़ी केतिंङ मोह्ड़े दाह ए शांति खोकसा लोहतो।

मसीह रिंङ आत्मिक आशीष

³ हेंदु परमेश्वर ए प्रभु यीशु मसीहू बाहऊ महिमा शुहबी जूंस, अच़ि हेंदिंङ मसीहू दोरच़ी स्वर्गंङ ज़ि खोकसा, भत्ते पाहठी आशीष रें च़रति। दि मसीहरंङ हेंदु एकता ओ वहज़ा ज़ि शुई।

⁴ परमेश्वरे सर्ग ए धरती बणाएषिमी तुहई, मसीहू दोरच़ी हेंदिंङ एनातु मीह शुहबिमी थल्जी अंङे च़रति। ताकि हेनर दोऊ नज़रारिंङ पवित्र ए निर्दोष शुहबी तरपोंई।

⁵ छना कुचे परमेश्वरे हेंदंङ साते दाह लहरी दंङ दोई महस तुहई फेंसला लेह च़रते कि यीशु मसीह लहसी कमो दोरच़ी हेंदिंङ एनोह कटुरे बणाके च़रपोतो। परमेश्वरे झांह एनोह हिटी ए खुशी ऊ हिसाबे लहरी।

⁶ अंऊ दोरच़ी कि हेनर दोऊ अद्धभुत मोह्ड़े दाह ओ थल्जी दोऊ स्तुति लोंहि, दि मोह्ड़े दाह हेंदिंङ दोऊ प्यारे योह वहज़ा ज़ि मुफ्तारिंङ खोकसिरी।

⁷ मसीहू शुहई बहाएक्च़िमी दोरच़ी हेंदिंङ छुटकारा खोकसिरी, मतलब, हेंदु पाप माफ शुहचे इलि, परमेश्वरो मोह्ड़े दाह महसे महान तोह अंऊ दोई हेंदिंङ महस रांहषी ततो।

⁸ दि मोह्ड़े दाह परमेश्वरे भत्ते ज्ञान ए समझरंङ साते हेंदु टोईच़ी महसे लहरी।

⁹ परमेश्वरे एनोह हिटी ओ भेद हेंदु टोहकठे एनोह रूठे इरादो थल्जी प्रकट लहसी ततो, अंऊ दोई तुहई ए मसीहू दोरच़ी पूरा लहज़िमी ठानेगी च़रसी तहरे।

¹⁰ अपेहल दि हिटी पूरे शुहबिमी टेम अपतो, दंङ परमेश्वर स्वर्ग ए धरतीऊ चीज़ातिंङ मसीहू अधीन लेह च़रपोतो, ताकि मसीह भत्ते चीज़ो मुख्या शोतो।

¹¹ दिऊ अलावा, हेंदिंङ मसीह रिंङ एकता शुहबी साते परमेश्वरो दोरच़ी विरासता रिंङ खोकसा तोह, छना कुचे दोई हेंदिंङ तुहई बेहच़ी अंङषी ततो, दंङ दू एनोह योजना ओ हिसाबे भत्ते कम लहज़ा।

¹² हेनर, यहुदीओ मुण्डो मीह शुई अच़ि मसीहू टोहकठे उम्मीद ततो दंङ हेंदिंङ दिऊ थल्जी अंङे च़रति ताकि हेनर परमेश्वरो महानता ओ थल्जी दोऊ स्तुति लोहवा लंहि।

¹³ अपेहल केहच़ी सच्चाई ओ बचन, केनातु मुक्ति ऊ रूठे खबर, रेड्रीमी थल मसीह रिंङ विशवास लाहतंई दंङ मसीह रंङ साते हेंदु एकता ओ वहज़ा ज़ि, परमेश्वरे हेंदिंङ दू पवित्र आत्मा रांई अपि दोई एनोह मीहतिंङ रंड्रीमी वाईदा लहसी तते। पवित्र आत्मा इच्च़ा निशानो ठ्रोह तोह अंऊ दोई दर्शाएच़ा कि हेनर परमेश्वरो शुई।

¹⁴ परमेश्वर इच्च़ा बयाना ओ ठ्रोह तोह अंऊ हेंदिंङ भरोसा रंड्रा कि परमेश्वर हेंदिंङ दू विरासत रंड्रा अपि रंड्रीमी दोई वाईदा लहसी ततो दंङ दि ला कि दोई एनोह मीहरे शुहबिमी थल्जी च़ुमने चरच़तो। अंऊ दोरच़ी परमेश्वरो महिमा ए स्तुति शोतो।

पोलुसो प्रार्थना

¹⁵ दिए वहज़ा तोह कि गेह ला प्रभु यीशु मसीह बि केहतु विशवास ए परमेश्वरो मीहतु थल्जी केहतु दाह ओ पाहठी रेड्रा,

¹⁶ हमेशा केहतु थल्जी धन्यवाद लहज़ातग, दंङ घेंङौ प्रार्थनारिंङ केतिंङ लगातार हिद लोहवा लहज़ातग।

¹⁷ गेह प्रार्थना लहज़ातग कि परमेश्वर हेंदु प्रभु यीशु मसीहू महिमामय बाह, केतिंङ पवित्र आत्मा रमतो, अंऊ केतिंङ बुद्धिमान बणाके च़रपोतो दंङ परमेश्वरा बि केहतु टोहकठे प्रगट लोहतो, ताकि केहच़ी दू ञेंई तरपोंई।

¹⁸ गेह दि ला प्रार्थना लहज़ातग कि दू सच्चाई बि समझेक्सिमी थल्जी केहतु मदत लोहतो, दंङ दू उम्मीद अंऊ केतिंङ रांहषी ततो अपेहल परमेश्वरे केतिंङ अंङे चरच़ाते। ताकि केहच़ी ञेंई च़रतुंई कि दू आशीष अंयों मोह्ड़े ए महिमामय तोह अतु वाईदा परमेश्वरे एनोह मीहतंङ साते लहसी तहरे।

¹⁹ गेह जुंज़ातग कि केरे दू मोह्ड़े ए शक्तिशाली सामर्थो पाहठी ञेंए च़रतुंई अंऊ परमेश्वरो कछंङ हेंदु थल्जी तोह, अंऊ दू मसीहू टोहकठे भरोसा लहज़ातोर। दि दू ए मोह्ड़े शाक्ति शुह,

²⁰ अच़ि मसीह बि सिऊ दोतु बिचंङ ज़ि श्रींङमी लहरी दंङ दोबि स्वर्गंङ परमेश्वरो सुचंङ हासी आदरो ठाहरीरिंङ बंङज़ी लहरी।

²¹ दू ठहरि भत्ते पाहठी प्रधानता ए अधिकार ए सामर्थ ए प्रभुता रांहषी ततो, दंङ दोऊ ओधा हर इच्च़ा अधिकारी बे मोह्ड़े तोह, अंऊ माह सिर्फ दि लोकारिंङ तोह, पर अंजा लोकारिंङ ला तोह।

²² परमेश्वरे भत्ते चीज़ा तिंङ मसीहू अधिकारो अधीन लेह च़रति, दंङ दोबि कलीसिया ओ भलाई ओ थल्जी हर इच्च़ा चीज़ो मुख्या बणाके च़रति।

²³ कलीसिया मसीहू फुक शुह, मसीह हेंदु बिचंङ एनोह भत्ते सामर्थ इस्तेमाल ध्वांए लहज़ा छना दोई एनोह सामर्थो इस्तेमाल भत्ते ब्रहाम्डारिंङ लहज़ा।