कुलुस्सियों 4 - लाहौली बाइबिल

¹ हे मालिका रे केनातु-केनातु परगर तंङ साते फेंसला ए दंङ इच्च़ा ठ्रोह व्यवहार साते लंहि, दि समझेके कि स्वर्गारिंङ ला केहतु इच्च़ा मालिक तोह।

फोह व्यवहारिक नियम

² लगातार प्रार्थना लोहवा लंहि, दंङ हमेशा धन्यवाद रंङ साते खबरदार शुहचे बंङज़ुंई।

³ दंङ दिरंङ साते ए ञेंहतु थल्जी प्रार्थना लोहवा लंहि कि परमेश्वर हेंदु थल्जी प्रचार लहज़िमी मोका रमतो, कि हेनरे मसीहऊ दुह भेदो पाहठी समझाके तरपोंई, अतु वहज़ा ज़ि गेह कैदारिंङ तोतोग,

⁴ प्रार्थना लंहि कि गेह मसीहू भेदा बि रूठे रंङ ए खुले आम कंज़े तरपोग।

⁵ हर मोका ओ रूठे रंङ इस्तेमाल लंहि दि कंड्रिमी थल्जी कि केरे विशवासी शुई दंङ अंऊ मीहरे यीशु मसीहू टोहकठे विशवास माह लहज़ातोर दोतंङ साते बुद्धिमानी रंङ साते बर्ताब लंहि।

⁶ केहतु गप्पा हमेशा दाह ए सेहमरिङ गमेकी शुहबी जूंस, केतिंङ हर इच्च़ा मीहबी केनातु विशवासो थल्जी ठीक-ठीक जबाब रंड्री अपि जूंस।

अंतिम अभिवादन

⁷ प्यारे विशवासी न्वारे दंङ विशवासो जोगे सेवक, तुखिकुस, अंऊ प्रभुरिंङ गिऊ साथी तोह, गिऊ भत्ते गप्पारे केतिंङ कंङे च़रपोतो।

⁸ दोबि गेह झांह लेह केहतु कछंङ च़रतिग, कि केतिंङ पता लेह्पोतो कि ञेंरे छना तोतोंई। दंङ दोई केतिंङ विशवासारिंङ पक्‍का लोहतो।

⁹ दोरंङ साते उनेसिमुस ला चरच़ातग, अंऊ विशवासो जोगे ए प्यारे विशवासी न्वा दंङ केहतु ए नगरो ओ तोह, दोई केतिंङ देरकि भत्ते गप्पा कमबोतो।

¹⁰ अरिस्तखुर्स अंऊ गेरंङ साते कैदी तोद, दंङ बरनबासो भंई मरकुस केतिंङ नमस्ते कुट्रातोर। अतु पाहठी केतिंङ तुहई ए कांहषी तोहई, कि अगर दुह केहतु कछंङ अपतो, ता दोरंङ रूठेरंङ साते व्यवहार लंहि,

¹¹ दंङ यीशु अंऊ युस्तुस लाह कुट्री, केतिंङ नमस्कार कुट्रातोरे यहुदी विशवासी मीहतु बिचंङ सिर्फ दिरे ए षुम परमेश्वरो राजो थल्जी गिऊ साथी शुहरे अंऊ गिह्बी खुशी रंड्रा।

¹² इपफ्रास, अंऊ केहतु नगरो तोह, दंङ मसीह यीशु दास तोह, केतिंङ नमस्कार कुट्रा। दोई केहतु थल्जी सेहमारंङ प्रार्थना लहज़ा, ताकि परमेश्वर केतिंङ पक्‍का ए सिद्ध बणाके दंङ केरे भत्ते विशवासारंङ साते परमेश्वरो हिटी पूरा लोहवा लोंहि।

¹³ गेह दोऊ गवाह शुगाह, कि दोई केहतु थल्जी ए लौदीकिया ए हियारापुलिस शहरो मीहतु थल्जी सेहमारंङ प्रार्थना लहज़ा।

¹⁴ प्यारे लहरज़े लूकास ए देमास लाह केतिंङ नमस्कार कुट्रातोर।

¹⁵ लौदीकिया शहरो विशवासी न्वातिंङ ए दंङ नुमफास ए दोऊ चुंङ कि कलीसियाबि ला नमस्कार कुंई।

¹⁶ दंङ अपेहल दि डाक केहतु दोर्तिंङ पड़ेगी केओनि, दंङ झांह लंहि कि लौदीकिया शहरो कलीसिया रिंङ ला पढेक्पी जूंस, दंङ दुह डाक अंऊ लौदीकिया ओ कलीसियाओ दोरच़ी अपतो दुह केई ला पढ़ेक्तु।

¹⁷ दंङ अरखिप्पुस ओ हखा कुंई कि “अंऊ सेवा प्रभुरिंङ कनिंङ रांहषी तोह, दोबि रूठे रंङ साते पुरे लोह।”

¹⁸ गेह पोलुस, घेंङौ गुह्ट्र दिह डाकरिंङ केतिंङ नमस्कार चेहच़ातग। हिद तंही कि गेह जेलारिंङ तोतोग दंङ गिऊ थल्जी प्रार्थना लंहि केहतु टोईच़ी परमेश्वरो मोह्ड़े दाह शुहवा लोहतो। अमीन।