कुलुस्सियों 3 - लाहौली बाइबिल

¹ अपेहल केहच़ी बपतिस्मा लेहपच़ातंई, दंङ केरे मसीहू ठ्रोह पथेक्च़ा इलांई दंङ खरकोई स्वाभावा रंङ साते मसीहू ठ्रोह श्रींङमी लेह केहनि, झांह लेह दुह चीज़ा तु खोजारिंङ बंङज़ेंई अंऊ स्वर्गंङ ज़ि केहषी तोह, अंऊर मसीह परमेश्वरो कछंङ महसे आदरो ठाहरीरिंङ बंङज़ा तोह।

² धरतीऊ टोहकठे फुको चीज़ा तु थल्जी पर स्वर्गीय चीज़ो टोईच़ी ध्यान रांई।

³ छना कुचे केरे ता केनातु पापो स्वाभावो दोरच़ी सिए इलजी तोंई दंङ केहतु खरकोई जीवन मसीहरंङ साते परमेश्वरारंङ ब्याके तोह।

⁴ अपेहल मसीह अंऊ केतिंङ खरकोई जीवन रंड्रा, दि धरतीऊ टोहकठे वापिस अपतो, दंङ केरे लाह अपोंई दंङ दोऊ महिमारिंङ सहभागी शोंई।

पुराना जीवन ए खरकोई जीवन

⁵ झांह लेह केरे दुह मांजी कम लहच़ी बंद लेह केहनि अंऊ केहतु पापी स्वाभावारिंङ जुड़ेके तोह। छना कि कुकम, अशुद्धता, मांजी सेहम, मदम लालच लोभ अंऊ मुर्ति पूजा लहसी बराबर तोह।

⁶ मीहच़ी दि मांजी कम लहज़ा तोर, झांह लेह परमेश्वर पक्‍का ए दोतिंङ खरे सज़ा रमतो।

⁷ दंङ केरेला, अंऊ मुक्का दि बुराई ऊ जीवन बिताएच़ातेंई, दंङ केरेला दिए हिटी ऊ हिसाबे जीवन बिताएच़ातेंई।

⁸ पर हेंतेग केरेला दि भत्ते धिर मतलब रोहष, लड़ाई-झगड़ा, बुराई, आहच़ि गह्डी रंड्री दिह भत्ते गप्पारे छोड़ेके च़रतुंई।

⁹ इदि अईदिरंङ साते हप्सी थाकुंई, छना कुचे केहच़ी केनातु युई स्वाभाव ए भत्ते झखंजी स्वाभाव छोड़ेके चरच़ातंई।

¹⁰ दंङ हेंतेग केहच़ी खरकोई स्वाभाव धारण लेह केहतंई, दिह खरकोई स्वाभाव महसे बे महसे एनोह सिरजनहारो ठ्रोह शुहबी लेहकी तोह दंङ दोबि रूठे रंङ समझेक्पोतो।

¹¹ झांह लेह यूनानी मीहतु ए यहुदी तु मीहतु बिचंङ छल्ले भेदभाव माह केहषीरि, माह अरिया खतना दंङ माह ए अरिया खतना मेह मीहतु बिचंङ, माह परदेशी मीहरे, माह बेढंघा मीहरे (असभ्य), माह परगर मीहरे दंङ माह ए आज़ाद मीहतु; पर मसीह ए भत्ते बे मोह्ड़े तोह, दंङ दुह एनोह भत्ते मीहतंङ साते बंङज़ा।

¹² झांह लेह अपेहल केरे परमेश्वरे केतिंङ एनोह पवित्र मीह शुहबिमी थल्जी अंङे चरच़तो, दंङ दोई केतंङ साते दाह लहज़ा, केरे मोह्ड़े दाह ए, दंङ भलाई, दंङ दीनता, नम्रता, दंङ सहनशीलता धारण लंहि।

¹³ दंङ अतिंङ ला अतुआ टोईच़ी दोष लगाच़िमी छा कारण शुई ता, दंङ इदिऊ अईदिऊ सहन लंहि; दंङ इदिऊ ए अई दिऊ गुनाह माफ लंहि: छना परमेश्वरे केहतु गुनाह माफ लहतो, ध्वांए केहच़ी ला लंहि।

¹⁴ दंङ भत्ते बे ज़रूरी अंऊ केतिंङ लेह जूंशी तोह, दुह दिह तोह कि इदि अईदिरंङ साते दाह लंहि, झांह लेह रंङ साते केरे इच्च़ा शुचे योंई।

¹⁵ अंऊ मसीह शांति रंड्रा दोबि केनातु विचार रिंङ काबू लेह रांही छना कुचे केरे भत्तेर इच्च़ा फुको शुई। झांह लेह केतिंङ इदि-अईदिरंङ साते शांतिरिङ बंङज़िमी थल्जी बुलाईसी शुईं दंङ हमेशा परमेश्वरो धन्यवाद लोहवा लंहि।

¹⁶ मसीहू बचन रे केनातु सेहमरिंङ महसे बसेकपि रांई, दंङ सिद्ध ज्ञाना रंङ साते इदि अईदि बि सिखाएतुंई दंङ सलाह रांई, दंङ केनातु सेहमरिंङ धन्यवाद रंङ साते परमेश्वरो थल्जी भजन ए स्तुतिगान दंङ आत्मिक गीत कुंई।

¹⁷ दंङ अंऊ बचन ला केहच़ी कुट्रातंई या छिल्ल ला लहज़ा तंई भत्ते धिर प्रभु यीशु मिंदंङ साते लंहि, दंङ प्रभु यीशु दोरच़ी परमेश्वरो बाहऊ धन्यवाद लंहि।

खरकोई जीवनंङ परिवारो थल्जी नियम

¹⁸ हे मेच़ारे, केतिंङ केनातु गगसो अधीन बंङज़ी जूंशी तोह, छना कुचे प्रभु थले जोज़ा तिंङ ध्यांए लेह रूठे तोह।

¹⁹ हे गगसा रे केनातु-केनातु मेच़ातंङ साते दाह लंहि दंङ दोतंङ साते दीनता रंङ साते बंङज़ुंई।

²⁰ हे कटुरे, भत्ते गप्पारंङ केनातु-केनातु याह बाहऊ हुकुम भाषे लंहि, छना कुचे प्रभु दिरंङ साते खुश शुहबी।

²¹ हे कटुतु ग्राहकि रे, केनातु कटुतिंङ घड़ी-घड़ी रैहच़ी ते तंग थालंही, झांह शुहबी मेस कि दोतु सेहम थाक्शा योतो।

²² हे परगरा रे, अंऊ धरतीऊ टोहकठे केहतु मालिक तोतोरे, दोतु हुकुम भाषे लंहि मीहतिंङ खुश लहज़ा तु ठ्रोह मशत, पर सच्चाई रंङ साते ए परमेश्वरो बेह्दरंङ साते।

²³ दंङ छिल्ल लाह केहच़ी लहज़ा तंई भत्ते सेहमे लंहि, दि समझेके कि मीहतु थल्जी मशत पर प्रभु थल्जी लोहवा तंई।

²⁴ छना कुचे केहच़ी ञेंच़ातंई कि केतिंङ दिऊ बदलारिंङ प्रभु दोरच़ी ईनाम खोकसोतो। केहच़ी अंऊ मालिको सेवा लहज़ा तु दुह मसीह शुह।

²⁵ छना कुचे अच़ि मांजी लोहवा लाह, परमेश्वर दोबि सज़ा रमतो; परमेश्वरे अतु ला भेद भाव माह लेई।