कुलुस्सियों 2 - लाहौली बाइबिल

¹ गेह जुंज़ातोग कि केहच़ी ञेंहई च़रतुंई, कि केहतु ए दोतु अंऊ लौदीकिया नगरंङ तोतोर, दंङ दुह भत्ते तु थल्जी अतंङ साते गेह दोईगा माह, छना मेहनत लहज़ातग।

² गेह मेहनत दिऊ थल्जी लहतेग ताकि दोतु विशवास बणेक्पोतो दंङ दोरे दाह रंङ साते ऐनातु बिचंङ बणेंके बंङज़ोर, गेह जुंज़ातग कि दोतिंङ पूरा भरोसा शुहबी जूंस छना कुचे दोतिंङ परमेश्वरो गुप्त योजना ओ पूरा समझ तोह अंऊ ऐनाह ए मसीह तोह।

³ छना कुचे दुह, दुह ए शुह अच़ि परमेश्वरो बुद्धि ए ज्ञानो पहचान लहज़ा अंऊ दुह, दुह ब्याके खज़ानो ठ्रोह तोह अंऊ ब्याके तोहई।

⁴ दि गेह दिऊ थल्जी कुट्रातग, कि केतिंङ दोतु हप्सी शिक्षा रिंङ विशवास लहज़िमी थल्जी राजी लेह धोखा रंड्री माह जूंस।

⁵ छना कुचे गेह केतंङ साते मातोग, तांला केहतु पाहठी सोचेक्सी लेहकी तोतोग, गेह खुश तोतोग कि केरे ध्वांए ठ्रोह श्रींङमी लेहकी तोतोंई छना केतिंङ श्रींङमी जूंस। दंङ मसीह रिंङ केहतु विशवास पक्‍का तोह।

मसीह रिंङ जीवनो भरपूरी

⁶ दंङ छना केहच़ी मसीह यीशु बि प्रभु लहच़ी ग्रहण लेह केहरिन, ध्वांए लगातार दोऊ थलेच़ि ज़ोजा लंहि,

⁷ दंङ दोरिंङ ए जड़ चुमज़ा ए तुंखा शुहवा लंहि; दंङ छना केतिंङ सिखासी तरेह ध्वांए विशवास रिंङ पक्‍का शुवाह लंहि, दंङ महसे धन्यवाद लोहवा लंहि।

⁸ खबरदार तोहई कि अरिया केतिंङ संसारो ज्ञान ए फालतु धोखा रंड्री माह जूंस, दिह गप्पारे मीहतु परम्परा ए संसारो शिक्षा ओ हिसाबे तोह। माह कि मसीहू दोरच़ी।

⁹ झांह लेह दिह मीहतु दोरच़ी धोखा थाजेंई छना कुचे मसीहू मीह फुकारिंङ परमेश्वरो भत्ते गुण खोकसा।

¹⁰ दंङ मसीह संसारो शाक्ति ए अधिकारो टोहकठे भत्ते बे प्रधान तोह। झांह लेह अगर केरे मसीह रंङ जुड़ेके तोतोंई, दंङ केतिंङ छिल्ला धिरो कमी माह।

¹¹ अपेहल केहच़ी मसीहू टोहकठे विशवास लहतंई, दंङ केहतु खतना मीहतु दोरच़ी माह शुई छना यहुदी मीहच़ी लेह, पर मसीहू दोरच़ी केहतु खतना शुहचे इलि अंऊ केहतु पापी स्वाभाव बि केहतु दोरच़ी शत्‌ह लेह च़रति।

¹² अपेहल केहच़ी बपतिस्मा लेहपच़ातंई, दंङ केरे मसीहू ठ्रोह पथेक्च़ा इलांई दंङ खरकोई स्वाभावा रंङ साते मसीहू ठ्रोह श्रींङमी लेह केहनि। झांह ठ्रोह दिऊ थल्जी शुई छना कुचे केहच़ी विशवास लहज़ा तंई कि परमेश्वरे एनोह सामर्थो दोरच़ी, मसीह बि सिमी थल यह्च़ा श्रींङमी लेह केई।

¹³ दंङ परमेश्वरे केतिंङ, अंऊ पापमय स्वाभाव रिंङ तोईनी शाक्ति रंङ आज़ाद माह तोहनी, मसीह रंङ श्रींङमी लहरी दंङ हेंदु भत्ते गुनाह लाह माफ लहरी।

¹⁴ दिह झांह ठ्रोह तोहई छना परमेश्वरे हेंदु दोष पत्र लाह मिटाके च़रति, अंऊर हेंदु खिलाप दोष च़ेहसी तोहई। अपेहल मसीह क्रूसो टोईच़ी चढ़ाके च़रतिर दुह मुक्का दोई दुह दस्तावेज पूरी तरह शत्‌ह लेह च़रति।

¹⁵ दंङ परमेश्वरे मसीहू क्रूसो टोहकठे सिमी दोरच़ी संसारो प्रधानता ए अधिकार यहरच़े दोतिंङ भत्ते तु तुईज़ी बेइज्ज़त लेह केह, दंङ दोतु टोईच़ी द्रक्शे दोतु खुले आम तमाशा बणाएतिर।

¹⁶ झांह लेह अच़ि लाह केतिंङ दि कुह्चे धोखा रंड्री माह जूंस, कि केतिंङ छि जें ए तुंङमी तोह या त्याहरो मनेक्च़िमी थल्जी ए लचंङों त्याहरो, या अरामो ध्याड़ो थल्जी केहतु फेंसला माह लोहर।

¹⁷ छना कुचे दि कानून सिर्फ इच्च़ा सिलमोग ठ्रोह तोह, पर पक्‍का सच्चाई ता मसीह शुह।

¹⁸ अरिला मीह हप्सी दीनता ए स्वर्गदूता तु पूजा लहज़ा केतिंङ ज़रको ईनामो दोरच़ी वंचित लेह माह जूंस, झांह ठ्रोह मीह दर्शनो गप्पारिंङ लेहकी बंङज़ा पर दिह भत्ते बकवास तोह छना कुचे दोतु सेहम मतलबी हिटी रंङ साते पिंङषा तोह।

¹⁹ दंङ दोरे मीहरे मसीह रंङ साते ठ्रोहका शुहचे माह बंङज़ा तोर अंऊ भत्ते फुको पुंज़ा शुह। छना पुंज़ा भत्ते फुक काबू लहज़ा ध्वांए यीशु मसीह एनोह मीहतिंङ चलाच़ा, ताकि दोरे एनातु बिचंङ ठ्रोहका शुहचे बंङज़ोर दंङ दोरे मसीह रिंङ बणेक्पा लोहर छना फुको भत्ते जोड़ ए नसर भत्ते फुका बि चुमज़ा बंङज़ा तोर दंङ परमेश्वरो दोरच़ी बणेक्पा तोर।

मसीह रंङ साते सी ए श्रींङी

²⁰ छना कुचे केहतु पापो स्वाभाव मसीह रंङ साते सिए इलज़ा, झांह लेह हेंतेग केतिंङ दि संसारो कानून मनेक्च़िमी ज़रूरत माह। दंङ केरे छारिंङ हेंतेग लाह दिह कानूनो भाषे लहज़ातंई, छना कि हेंतेग लाह संसार केतिंङ वशरिंङ लहज़ा।

²¹ दोरे झांह ठ्रोह कानून बणाएच़ातोर छना कि केहच़ी दोबि “गुह्ट्र रिंङ चुमुं था” या “दोबि ज़ेईनि था” देर तचेक कि दोबि थोक्तेंईंन लाह था?

²² दि भत्ते कानून घड़ी-घड़ी मनेके छि लाह फायदा माह। छना कुचे दि मीहतु आज्ञा ए शिक्षाओ हिसाबे तोह।

²³ दि कानून सच्चाई ऊ अमरिंङ जोज़िमी ठ्रोह तंङफा, छना कि एनाबि ए परमेश्वरो तरफे ज़बरदस्ती समर्पण लहज़िमी रंङ साते, हप्सी नम्रता ओ दोरच़ी दंङ एनोह फुका रंङ साते कठोर व्यवहार लहज़िमी रंङ साते, पर हेले रिंङ दि कानून मीहतिंङ दोतु मांजी हिटीर काबू लहच़िमी थल्जी मदत माह लहज़ा।