कुलुस्सियों 1 - लाहौली बाइबिल

नमस्ते

¹ गेह पोलुस, गिऊ साथी विशवासी तीमुथियुस तरफे दि डाक चेहच़ातग। गेह परमेश्वरो हिटी रंङ यीशु मसीहू प्रेरित शुगाह।

² मसीहरिंङ दुह पवित्र ए विशवासो जोगे न्वारे तु मिंदंङ अंऊ कुलुस्सियो शहरारिंङ बंङज़ातेग; ञेंहतु बाह परमेश्वरो दोरच़ी केतिंङ मोह्ड़े दाह ए शांति खोकसा लोहतो।

धन्यवादो प्रार्थना

³ अपेहल ञेंरे केहतु थल्जी प्रार्थना लहज़ातंई, दंङ ञेंरे हेंदु प्रभु यीशु मसीहू बाह परमेश्वरो धन्यवाद लहज़ा तोंई।

⁴ छना कुचे ञेंहच़ी रैहशी तातंई, कि यीशु मसीहू टोहकठे केहतु विशवास तोह, दंङ भत्ते परमेश्वरो मीहतंङ साते दाह लहज़ातंई;

⁵ केहच़ी दिह झांह लेह लहज़ातंई छना कुचे विशवास ए दाह ओ मुयांद दुह उम्मीद तोह अंऊ केहतु थल्जी स्वर्ग रिंङ तहसी तोह, अतु पाहठी केहच़ी दुह रूठे खबर ओ सत्य बचनरिंङ रेड्री चरच़ातंई, अंऊ केहतु कछंङ पिचे तोह।

⁶ दि रूठे खबर भत्ते संसारारिंङ फेलेक्पि लेहकी तोह दंङ महसे मीहरे विशवासी बणेक्पी लेहकी तोतोर। दि हर इच्च़ा ज़िंदगी बदलेक्पि लेहकी तोह, ठीक ध्वांए छना कि केहच़ी मुण्डा फेरा रूठे खबर रेड्रातेंई, दंङ दिह सच्चाई समझेकी चरच़ातंई कि परमेश्वर दुह मीहतु पाप माफ लेह च़रच़ा अच़ि मसीहू टोहकठे विशवास लहज़ातोर।

⁷ दोऊ ए शिक्षा केहच़ी ञेंहतु प्यारे साथी इपफ्रास दोरच़ी सिखेच़ातंई, अंऊ हेंदु थल्जी मसीह विशवासो जोगे सेवक तोह।

⁸ दोई हेंदिंङ ऊई मीहतु थल्जी हेंदु दाह ऊ पाहठी कंङातो अंऊ पवित्र आत्माज़ि केतिंङ रांहषी ततो।

⁹ झांह लेह अपेहल बे ञेंहच़ी दि रैहशी तातंई, दंङ हमेशा ञेंहच़ी केहतु थल्जी प्रार्थना लहज़ा तंई कि परमेश्वरो आत्मा केतिंङ ज्ञान ए समझ रमतो ताकि केहच़ी दोऊ हिटी पुरा रिति रंङ समझेक्पोंई।

¹⁰ दंङ ञेंहच़ी दि प्रार्थना लहज़ातंई ताकि केहच़ी झांह ठ्रोह जीवन श्रींङमोंई छना प्रभु ज़ि जुंज़ा, दंङ केहच़ी भत्ते पाहठी रंङ साते प्रभु बि खुश लोंहई, कि केरे भत्ते पाहठी रूठे कम लोहवा लंहि, दंङ परमेश्वरा बि ञेंहच़िमी थल्जी लगातार बणेक्पा लंहि,

¹¹ ञेंहच़ी प्रार्थना लहज़ातेंई कि परमेश्वर एनोह महिमा ओ शक्ति ऊ हिसाबे केतिंङ महस बलवन्त लोहतो, ताकि केरे सामर्थ ए खुशी रंङ साते केनातु दुख सहन लेह तरपोंई,

¹² दंङ बाह परमेश्वरो धन्यवाद लोहवा लंहि, अच़ि हेनर दि जोगे बणाएक्तो कि स्वर्ग राज्यो पवित्र मीहतंङ जाईदातो हकदार शोंई।

¹³ छना कुचे परमेश्वरे हेनर शैतानो शाक्ति दोरच़ी छुड़ाके एनोह प्यारे योहऊ राज्यरिंङ शामिल लोहतो।

¹⁴ एनोह योह बलिदानो दोरच़ी परमेश्वरे हेनर शेतानो शाक्ति ऊ दोरच़ी आज़ाद लेह केई दंङ हेंदु पाप माफ लेह केई।

मसीह मोह्ड़े प्रधान ए दोऊ कम

¹⁵ अच़िला परमेश्वर बि खंड्री मरपोतो, पर अपेहल दोऊ योह इच्च़ा मीह बणेक्ति, दंङ दोई परमेश्वरा बि मीहतु तुहई ज़ि प्रगट लेह च़रति, अंऊ ला चीज़ा बणेक्पिमी तुहई दुह मौजूद तोहई दंङ भत्ते धरतीऊ टोहकठे भत्ते बे मोह्ड़े दोऊ अधिकार तोह।

¹⁶ छना कुचे मसीहरिंङ ए भत्ते चीज़ो सृष्टि शुई, स्वर्ग शुह या धरतीऊ, तंङषे या माह तंङषे, छि रज्ज़ा, छि प्रधानताऐ, छि अधिकार भत्ते चीज़ा रे दोऊ सेवा ओ थल्जी बणेषी शुह।

¹⁷ छि लाह बणेक्च़िमी बे तुहई, मसीह तुहई बे मौजूद तोहई, दंङ धरतीऊ भत्ते चीज़ारे दोऊ ए मर्ज़ी रें बंङज़ातोर।

¹⁸ मसीह कलीसियाओ अगुवाई ध्वांए ठ्रोह लहज़ा, छना इच्च़ा मीहू पुंज़ा दोऊ फुका बि काबू लाह। दुह ए शुरूआत शुह दंङ सिऊ दोतु बिचंङ श्रींङज़ा दोतु बिचंङ जेठे तोह कि भत्ते गप्पारिंङ दुह ए प्रधान शोतो।

¹⁹ छना कुचे बाह परमेश्वरो खुशी दिरिंङ ए तोह कि परमेश्वरो भत्ते स्वभाव मसीह रिंङ बंङज़ु।

²⁰ परमेश्वरे एनोह योह च़रच़िमी फेंसला लहरी, अच़ि एनोह शुहई बहाएक्ति दंङ क्रूसो टोहकठे सिए इलि। परमेश्वरे झांह ठ्रोह एनोह ए दंङ भत्ते चीज़ा तु बिचंङ मेल मिलाप लहच़िमी थल्जी लहरी। झांह लेह, दोई एनोह ए, भत्ते चीज़ा तु बिचंङ शांति स्थापित लेह च़रति अंऊ स्वर्ग रिंङ तोह दंङ दुह भत्ते अंऊ धरतीरिंङ तोह।

²¹ दिबे तुहई केरे परमेश्वरे बे ऊई तार तोहनि। केरे परमेश्वरो बैरी तोईनी छना कुचे केहतु विचार ए केहतु कम मांजी तोहई।

²² पर परमेश्वरे हेंतेग एनोह योह बि मीह बणाके दंङ दोऊ क्रूसो टोहकठे सिमी दोरच़ी केहतु ला मेल लहच़ी च़रति ताकि केतिंङ एनोह तुईज़ी पवित्र ए निष्कलंक, दंङ निर्दोष लहज़ा हाज़िर लोहतो।

²³ पर केतिंङ विशवासा रिंङ इच्च़ा मुयांदो ठ्रोह पक्‍का शुहबी जूंस, दंङ दुह उम्मीदा बि अंऊ केहतु कछंङ तोह केतिंङ अपेहला छोड़ेक्च़ी माह जूंस अंऊ हेंतेग हेंदु कछंङ तोह छना कुचे हेंज़ी दुह ए रूठे खबरो टोहकठे विशवास लहज़ातंई, अतु प्रचार भत्ते धरतीऊ मीहतु बिचंङ लहसी तोह; दंङ अतु गेह पोलुस, सेवक बणेक्तिग।

कलीसियाओ सेवक-पोलुस

²⁴ दंङ हेंतेग गेह केहतु थल्जी अंऊ दुख सहन लहज़ातग दोऊ वहज़ा ज़ि खुश तोतोग। दंङ गेह लगातार घेंङौ फुको दुख सहन लहज़ातग, छना मसीह सहन लाहते, दंङ दि दुख गेह मसीहू कलीसियाओ थल्जी सहन लहज़ातग अंऊ मसीहू फुक शुह।

²⁵ परमेश्वरे गिह्बी दिऊ थल्जी अंङषी शुह कि दोऊ बचन रूठे रंङ सिखाएपोग दंङ दोऊ थल्जी गेह कलीसियाओ सेवक बणेंके इलिग।

²⁶ मतलब दुह भेद अंऊ दुह जुग ए तुहई पीढ़ी बे गुप्त बंङज़िरी, पर हेंतेग परमेश्वरो दुह मीहतु टोईच़ी प्रगट शुई।

²⁷ छना कुचे परमेश्वरे जुंज़ाते कि दोऊ मीहच़ी दिह ञेंओर कि मसीहू टंगा ढबाह ए दोऊ महिमा केरे ऊईजाति तु थल्जी ला शुह। दंङ भेद दिह तोह कि: मसीह केहतु बिचंङ बंङज़ा। दि केतिंङ दोऊ महिमा रिंङ शामिल शुहबिमी उम्मीद रंड्रा।

²⁸ ञेंरे मसीहू पाहठी प्रचार लहज़ा हर इच्च़ा मीहबी परमेश्वरो दोरच़ी रांहषी बुद्धि रंङ साते शिक्षा रंड्रा हिद दिलाएच़ा तंई ताकि हर इच्च़ा मसीह रिंङ सिद्ध विशवासी शुहबी जूंस अपेहल दोरे परमेश्वरो तुईज़ी खड़े शवाहतोर।

²⁹ झांह लेह दिबी पूरा लहच़िमी थल्जी गेह महस मेहनत लहज़ातग, दुह मोह्ड़े सामर्थो इस्तेमाल लहज़ा ते अंऊ मसीह रंड्रा दंङ अच़ि गिऊ अन्द्रेग कम लहज़ा।