प्रेरित 9 - लाहौली बाइबिल

शाऊल ओ सेहम किरच़ी

¹ दिह ए मुक्का रिंङ शाऊल अंऊ हेंतेग तचेक प्रभु यीशु ऊ चेला तिंङ धमकाएच़ी ए दोती सच़िमी साकिम रिंङ तोहई, यहुदी महापुरोहितो कछंङ इलि।

² दंङ दोतु हखा एनोह परिचय डाक पेट्रीरि दुह हर इच्च़ा दमिश्क शहरो यहुदी सभो घरबारो सेंहणा तु थल्जी। दुह डाकारिंङ शाऊला बि अधिकार रांहषी तोहई ताकि अंऊ मेच़िमी ए गंङमी प्रभु यीशु ऊ कांहषी अमरिंङ जोज़ातोर दोतिंङ बन्दी बणाएके दंङ ज़बरदस्ती यरूशलेम शहरंङ रेंज़ा हतांई ताकि यहुदी अगुवार दोतु न्याय लोहर दंङ दोतिंङ सज़ा रमोर।

³ पर ज़ोजा-ज़ोजा अंऊ मुक्का शाऊल ए दोऊ साथिरे दमिश्क नगरो कछंङ पिरिर ता अचानक सर्गंङज़ि दोऊ पीला हासी छंङी शुई,

⁴ दंङ दुह धरतीऊ टोईच़ी दह्चे इलि, दंङ परमेश्वरो दिह सग रेड्रीर, “हे शाऊल, हे शाऊल, केई गिह्बी छिल्ले तंग लहज़ातन?”

⁵ “शाऊल ए रुहक्ती, हे प्रभु, काह अरि‍ शुना?” दोई कुई, गेह यीशु शुगाह; अपि केई तंग लहज़ातन।

⁶ पर हेंतेग अच़ा ते शहरो हखा इला, अच़िया कनिंङ कंङे च़रपोतो, कि कनिंङ छि लेह तोतआ।

⁷ अंऊ मीहरे शाऊल रंङ साते तोईरे, दोरे चुपे केह्षा इलिर, छना कुचे दोच़ी सिर्फ प्रभु सग रेड्रीर अपेहल प्रभु ज़ि गप्पा लहरी पर अरिला तंङरिर ए माह।

⁸ दोथर शाऊल धरतीऊ टोईच़ी खड़े शुई, पर दोऊ टिरा तगा अल्सी तोहई, दोबि छल्ले माह तंङसिरी, दिऊ थल्जी दोऊ साथीरे दोऊ गुड़ च़ुमने दोबि दमिश्क शहर रैंज़ा शिलिर।

⁹ दंङ दोई षुमु ध्याड़ा तचेक खांई मरति, दंङ माह दोई छा ज़री, दंङ माह छा तुंङरी।

¹⁰ दमिश्क शहरङ हनन्याह मिंदंङ इच्च़ा चेला तोहई, दोरंङ प्रभु यीशु ज़ि दर्शना रिंङ प्रकट शुचि कुई, “हे हनन्याह!” दोई कुई, “हा प्रभु।”

¹¹ दोथर प्रभु यीशु ज़ि दोरंङ साते कुई, अहच़ु दंङ सीधी मिंदंङ गली रिंङ इलज़ा, तरसुस शहरो शाऊला बि रुहक्तु अंऊ हेंतेग यहूदा ओ चुंङ तोह; छना कुचे दुह प्रार्थना लहज़ी लेह्की तोह,

¹² दंङ दर्शनो दोरच़ी गेह शाऊला बि कंङातेग कि हनन्याह मिन्दु इच्च़ा गंङमी तोंखा अपि लेहकी तोह, दंङ दोई एनोह गुह्ट्र दोऊ टोईच़ी केहच़ी ताकि दुह यह्च़ा खंड्री तरपोतो।

¹³ हनन्याह ज़ि जुबाब रेंई, हे प्रभु यीशु, गेह दिह मीहू पाहठी महसे तु आहच़ि रेड्री तातेग कि दिह यरूशलेम शहरंङ कांह कनु मीहतंङ साते अंयों मदम लहसी ततो।

¹⁴ दंङ देर्तिंङ अपिमी थल्जी ला दोबि यहुदी मोह्ड़े पुरोहिता तु दोरच़ी अधिकार खोकसा तोह, कि अंऊ मीहरे कांह टोहकठे बिशवास लहज़ातोर दोतिंङ बन्दी बणाएतु।

¹⁵ पर प्रभु यीशु ज़ि हनन्याह रंङ साते कुई, “काह अच्च़ा ईला; छना कुचे दुह ता ऊईजाति तु दंङ रज्ज़ातु ए इस्राएली मीहतु तुईज़ी गिऊ पाहठी प्रचार लहज़िमी थल्जी अंङषी मीह शुह।

¹⁶ दंङ गेह दोबि कमोग, कि मीहतु बिचंङ गिऊ पाहठी प्रचार लहज़िमी बज़ाहसि दोबि छना-छना ठ्रोह दुख उठाएच़ी लेह्पोतो।”

¹⁷ दोथर हनन्याह खड़े अच़ा दुह चुंङ अति दंङ शाऊला रंङ साते दोहरी दंङ दोऊ टोईच़ी एनोह गुड़ केट्रा ते कुई, “हे न्वा शाऊला, प्रभु यीशु ज़ि, अच़ि कनिंङ देर्तिंङ अपिमी मुक्का दमिशको शहरो इबिमी मुक्का अमरिंङ दर्शन रेंई, दोई ए गिह्बी चरच़तो, कि कांह यच़ाह खांई तरपोन दंङ पवित्र आत्मा रंङ साते परिपूर्ण शुहचे योंई।”

¹⁸ दंङ दोथर ए दोऊ टिरा रंङ च़ि छिलकाऊ ठ्रोह दरिर दंङ दुह खंड्री लेहती, दंङ हनन्याह खड़े शुई दंङ दोबि बपतिस्मा रांई;

¹⁹ दंङ बगत ज़े ते ताकत खोकसिरी। दुह थोड़े अरे टेम तचेक दमिश्क शहरो चेला तंङ साते ए बंङज़िरी।

शाऊल ओ दोरच़ी यीशु मसीहू प्रचार

²⁰ दंङ ध्वांए दमिश्क शहरो यहुदी सभो घरबारङ यीशु ऊ पाहठी प्रचार लहज़ी लेहती, कि यीशु ए परमेश्वरो योह शुह।

²¹ दंङ भत्ते रेड्रा दोरे हेरान शुहचा ते कुट्री लेहतिर, “छि दिह दुह हे मीह माह शुह आ अंऊ यरूशलेम शहरा रिंङ दोतिंङ नाश लहज़ाते अंऊ मसीह यीशु ऊ बिशवासी तोईरे, दंङ देर्तिंङ ला दिऊ थल्जी अंज़े तोहई, कि दोतिंङ बन्दी लहज़ा यहुदी मोह्ड़े पुरोहिता तु कछंङ रेंज़ा शोतो?”

²² पर शाऊल ए ऊई ला महसे सामर्थ रंङ साते प्रचार लेह शुरू लेह च़रति, दंङ दिह गप्पो पाहठी सबूत रंड्रा ते कि यीशु ए मसीह शुह, दमिश्क इलाकंङ बंङज़ा यहुदी मीहतु आह बन्द लोहवा लहरी

²³ अपेहल शाऊला बि दमिश्क शहर बंङज़ा महसे टेम शुहचे इलि, ता यहुदी मीह ज़ि ठ्रोहका शुहचे दोबि सच़िमी थल्जी योजना लहरिर।

²⁴ पर दोतु योजना ओ पाहठी शाऊल बि पता लेहकी इलि: दोरे ता दोबि सच़िमी थल्जी दिन-रात इलाका ओ मोह्ड़े पेतंङ रिंङ पहरा रंड्रा तोईरे। रुमज़ा बंङज़ा तोईरे।

²⁵ पर इच्च़ा रातारिंङ चेलार दोबि दुह रघटु मोह्ड़े भिती रिंङ रेंज़ा शिलिर अंऊ शहरो पिला हासी लेहकी तोहई। दोथर दोच़ी भिती ऊ इच्च़ा अल्सी हिस्सा ओ दोरच़ी रशी रंङ साते इच्च़ा मोह्ड़े टोकरीरङ दोबि योंखा तकशे च़रतिर। झांह लेह दुह दमिश्क शहर बचेके हुंच़ा इलि।

यरूशलेम शहरंङ शाऊल

²⁶ शाऊल यरूशलेम शहरंङ इलि दंङ दोई चेला तंङ साते शामिल शुहबिमी कोशिश लहरी, पर भत्ते दोरंङ साते बेवातेर, छना कुचे दोतिंङ बिशवास माह शवाते कि दुह ला चेला शुह।

²⁷ पर बरनबास शाऊला बि ऐनारंङ साते प्रेरितातु कछंङ शिल्ज़े दोतंङ साते कुंई, कि दोच़ी छना ठ्रोह दमिश्क इलाकाओ हखा इबिमी अमरिंङ प्रभु यीशु बि खांई, दंङ प्रभु ज़ि दिरंङ साते गप्पा लहरी; दोथर दमिश्क शहरंङ दिह छना दोई याहब रंङ साते मीहतिंङ यीशु पाहठी प्रचार लहरी।

²⁸ प्रेरित ज़ि बरनबासो टोहकठे बिशवास लहरिर दंङ दिऊ थल्जी शाऊल दोतंङ साते बंङज़ा इलि। दंङ ऊई विशवासी तंङ साते जुड़ेकी इलि। दंङ यरूशलेम शहरंङ भत्ते ठहरि रिंङ इलि दंङ प्रभु यीशु पाहठी याहबा रंङ साते प्रचार लहज़ी लेहती।

²⁹ दंङ यूनानी भाषा कुट्रा यहुदी मीहतंङ साते कुवाद लहज़ा तोहई, पर दोरे दोबि सच़िमी कोशिश लहज़ी लेहतिर।

³⁰ दंङ ऊई चेला तिंङ दिह गप्पो पाहठी पता लेहका दंङ दोरे शाऊला बि केसरिया शहरंङ रैंज़ा हतिर, दंङ दोर्तिंङ दोरे दोऊ थल्जी समुंद्री जहाज़ंङ च़ि तरसुस शहरो हखा चरच़ि च़रतिर, अंऊ दोऊ एनोह शहर तोहई।

³¹ झांह लेह भत्ते यहुदिया प्रदेश, गलील प्रदेश दङ सामरिया प्रदेशंङ कलीसियाओ मीहतिंङ शांति खोकसिरी, दंङ कलीसियाओ तरक्की शुहवा लहरी; दंङ प्रभु ऊ बेह्द ए पवित्र आत्माओ मदत रंङ साते महसे मीहतिंङ हौंसला खोकसिरी दंङ प्रभु यीशु ऊ टोहकठे बिशवास लहरीर।

ऐनियास ओ अईन शुहबी

³² दंङ झांह शुई कि पतरस दुह भत्ते प्रदेशंङ जोज़ा, दुह परमेश्वरो मीहतु कछंङ दोईमी थल्जी इलि, अंऊ लुद्दा इलाकंङ बंङज़ा तोईरे।

³³ दोर्तिंङ दोबि एनियास मिन्दु नम्क्योंन ओ टेहची इच्च़ा मीह खोकसिरी, अंऊ रेह साल बेहच़ी टेहची एनोह बिस्तरो टोईच़ी तोहई।

³⁴ पतरस ए दोरंङ साते कुई, “हे एनियास! यीशु मसीह कनिंङ ठीक लहज़ा। खड़े शुह केनोह विस्तर उठातु।” दंङ दुह दोहथरे खड़े शुहचे इलि।

³⁵ दंङ लुद्दा ए शारोन प्रदेशंङ बंङज़ा दोरे, महसे मीहच़ी दोबि खांई ते प्रभु यीशु ऊ टोहकठे बिशवास लहरिर।

दोरकास बि जीवनदान

³⁶ याफा शहर, तबीता मतलब दोरकास मिंदंङ इच्च़ा विशवासी मेच़िमी तोहई। दोई महस ए रूठे-रूठे कम ए गरीबा तु मदत लहज़ाते।

³⁷ दुह मुक्का अपेहल पतरस लुद्दा इलाकंङ तोहई, तबीता बीमार शुहचे सीए इलि, दंङ दोच़ी दुह सुहज़ी लहरिर दंङ तोरिंङ कि कमरा रिंङ केहच़ी च़रतिर।

³⁸ दिऊ थल्जी कि लुद्दा इलाका याफा इलाका ओ कछंङ तोहई, चेलाज़ि दिह रेड्रा कि पतरस दोर्तिंङ तोह, झुह्ट मीह च़रच़ा दोरंङ साते बिनती लहरीर, हेंतेग ए ञेंहतु कछंङ अच़ा अता।

³⁹ दोहथर पतरस खड़े शुहचे दोतंङ साते अच्च़ा इलि, दंङ छना ए दुह पिचे इलि, ता दोरे पतरस बि तोरिंङ कि कमरा रिंङ रेंज़ा शिलिर। दंङ भत्ते रंणी मेच़िमी रे क्रपचा दोऊ कछंङ अंज़े खड़े शुईरे, दंङ अंऊ कुर्ती ए खमज़ेर दोरकास ए दोतु थल्जी बणाएकते, कंड्री लेहती।

⁴⁰ दोथर पतरसे भत्ते तिंङ कमराओ धकतेखा हुंच़िमी विनती लहरी, दंङ पुष्टू भारे बंङज़ा प्रार्थना लहरी; दंङ सीए फुको हखा खांई कुंई, “हे तबीता, खड़े शुह।” दंङ दोहथर ए दोई एनोह टिरा अलज़ि च़रति; दंङ पतरस बि खंड्रा खड़े शुहचे बंङज़ा इलि।

⁴¹ दोई गुड़ रेह दुह खड़े लहरी, दंङ पवित्र मीहतिंङ ए रंणी मेच़िमी रे बुलाके दुह श्रींङे कंङे च़रति।

⁴² दिह गप्पा भत्ते याफा शहरंङ फेलेके इलि; दंङ महसे मीहज़ी प्रभु यीशु ऊ टोईच़ी विशवास लहरीर।

⁴³ दंङ पतरस याफा शहरंङ शमौन मिंदंङ अरिया च़मो कम लहज़ा दोऊ दोर्तिंङ महसे ध्याड़ा तचेक बंङज़िरी।