प्रेरित 6 - लाहौली बाइबिल

निह्ज सेवकातिंङ अंङषी

¹ दुह ध्याड़ा रिंङ अपेहल चेला तु गिनती महस शुहबी लेहती। दंङ यूनानी भाषा कुट्रा यहुदी विश्वासिर, इब्रानी भाषा कुट्रा यहुदी विश्वासी तु खिलाप शिकायत लहरिर, कुट्री लेहतिर, कि हर ध्याड़ो सेवा रिंङ ञेंहतु ए रंणी मेच़िमी तु ख्याल माह तहच़ातोर।

² दोहपल दुह सनी प्रेरिता ज़ि यरूशलेम शहरो ऊई बिशवासीतु ठ्रोहका इच्च़ा सभो बुलाएतिर दंङ दोतंङ साते कुड़ी, “ञेंतिंङ चेला तिंङ ञेंहतु टेम परमेश्वरो बचन सिखाएच़िमी थल्जी बिताएच़ी जूंस माह कि ज़ेइमी-तुंङमी सेवा लहज़िमी थल्जी।”

³ दिऊ थल्जी हे बिशवासी न्वारे, केनातु बिचंङ ज़ि निह्ज रूठे गंङमी रे अंऊ पवित्र आत्मा ए बुद्धिरंङ साते परिपूर्ण तोतोर, अंङे च़रतुंई, कि ञेंहरे दोतिंङ दिह कमो ज़िम्मेवारी रें तरपोंई।

⁴ पर हेनर ता प्रार्थना, बचनो प्रचार दंङ शिक्षा रंड्रा लोहनी।

⁵ दिह गप्पा भत्ते मंडली बि रूठे अति, दंङ दोच़ी रेह मीहरे अंङे च़रतिर, दोतु मिन दिह शुह: स्तिफनुस अंऊ विशवास ए पवित्र आत्मा रंङ साते परिपूर्ण तोहई, दंङ फिलिप्पुस, प्रुखुरुस, निकानोर, तीमोन, परमिनास, ए अन्ताकिया शहरंङ बंङज़ा निकुलाउस अंऊ यहुदी धर्माबि मनेक्च़ा ऊई जातिओ मीहरे तोहई।

⁶ दंङ दोतिंङ प्रेरिता तु तुईज़ी हतिर दंङ प्रेरिता ज़ि दोतु थल्जी प्रार्थना लहरिर दंङ दोतु टोईच़ी गुहड़ केह्चे सेवा लहज़िमी थल्जी अधिकार रेंईर।

⁷ दंङ परमेश्वरो बचन फेलेके इलि, दंङ यरूशलेम शहरंङ चेला तु गिनती महस शुहचे इलि दंङ महसे यहुदी पुरोहितज़ि ला यीशु मसीहू टोहकठे बिशवास लहज़िमी दिह शिक्षा स्वीकार लहरिर।

स्तिफनुस ओ गिरफ्तारी

⁸ स्तिफनुस परमेश्वरो मोह्ड़े दाह ए सामर्थ रंङ साते परिपूर्ण शुचे मीहतु बिचंङ मोह्ड़े-मोह्ड़े ए हेरानी ओ कम ए चिन्ह चमत्कार लहज़ाते।

⁹ पर रेह मीहरे स्तिफनुस ओ विरोध लहज़ी लेहतिर। अंऊ दुह यहुदी सभो घरबारो मीहर तोईरे “अतिंङ गुलामी ऊ दोरच़ी आज़ाद मीहतु सभो घर कुट्रा तोईरे” दोरे मीहरे कुरेन ए सिकंदरिया शहरो दंङ किलिकिया ए आसिया प्रदेशंङ च़ि ला तोईरे। दिरे मीहरे स्तिफनुस रंङ साते बहस लहज़ी लेहतिर।

¹⁰ पर स्तिफनुसे छिला धिर कुहते, दोरे मीहरे दोऊ छले जुबाब रेह मरतिर छना कुचे पवित्र आत्माज़ि दोबि महसे समझदारी रंङ साते कुट्रिमी मदत लहरी।

¹¹ दि गप्पो दोरच़ी दुह यहुदी सभो घरबारो रैह मीहच़ी गुप्त रूपारिंङ अंज़े रेह गंङमी तिंङ स्तिफनुस ओ खिलाप हप्सी कुट्रिमी थल्जी लेहतिर, अंऊ कुट्री लेहतिर, “ञेंहच़ी दिह मूसा ए परमेश्वरो खिलाप बुराई ऊ गप्पा लहज़ी रेड्रातंई।”

¹² दि शब्दा तु दोरच़ी स्तिफनुस ओ खिलाप मीहतिंङ, यहुदी सेंहणा तिंङ दंङ यहुदी कानून बि सिखाएच़ा तिंङ भड़काएतिर दंङ दोच़ी इलजे स्तिफनुस बि च़ुमने यहुदी सभा ओ तुई खड़े लहरिर।

¹³ दोर्तिंङ दोच़ी हप्सी गवाह खड़े लहरिर, अंऊ दोच़ी स्तिफनुस ओ टोईच़ी दिह दोष लगाएतिर, “दिह मीह, दिह पवित्र ठहरि ए मूसा ओ कानूनो खिलापे घड़ी-घड़ी कुट्रा।

¹⁴ छना कुचे ञेंहच़ी दिह्बी दिह कुट्री थक्शातन कि दिह ए नासरत नगरो यीशु यहुदी मंदिरा बि दहफी लेह च़रपोतो, दंङ दुह रिति-रिवाज़ लेहके च़रपोतो अंऊ मूसा ज़ि ञेंतिंङ रांहषी ततो।”

¹⁵ दंङ भत्ते मीहज़ी अंऊ यहुदी सभो रिंङ बंङज़ा तोईरे, दोऊ हखा रूठे रंङ खंईर ता दोऊ मोह्द स्वर्गदूता तु मोह्दु ठ्रोह चमकेपी लेहकी तोहई।