प्रेरित 24 - लाहौली बाइबिल

फेलिक्सो तुईज़ी पोलुस

¹ ङा ध्याड़ो थल हनन्याह यहुदी महापुरोहित रे सेंहणा तंङ ए तिरतुल्लुस मिंदंङ अरिया वकील साते रेंज़ा कैसरिया शहर अति; दोच़ी राज्यपाल तुईज़ी पोलुसो खिलाप एनोह दोष लगाएतिर।

² अपेहल पोलुसा बि बुलाच़ी लेहतिर, ता तिरतुल्लुसे दोबि दोषी ठहरा, के कुई; “हे महाप्रतापी फेलिक्स, कांह वहज़ा ज़ि यहुदी मीहतु महस भलाई शुहसी तोह; दंङ एनोह प्रबंधनो दोरच़ी, दि प्रदेशंङ महस बुराई ओ सुधार शुहबी लेहकी तोह।

³ दिबी ञेंरे भत्ते ठहरि रिंङ दंङ भत्ते पाहठी धन्यवाद रंङ साते मनेक्च़ातंई।

⁴ पर दिऊ थल्जी गेह कनु महस टेम लेहपच़ी माह जुंज़ातग। गेह करंङ साते बिनती लहज़ातग कि दया लेह ञेंहतु इच्च़ा झुह्ट गप्पा रेड्रु।

⁵ छना कुई ञेंहच़ी ञेंच़ातंई कि दि मीह संसारो भत्ते यहुदी तु बिचंङ झगड़ा लहज़ा ए कुवाद लहज़ा दंङ दुह इच्च़ा झांह ठ्रोह कोमो मुखिया तोह अंऊ नासरत नगरो इच्च़ा मीहू हप्सी शिक्षा ओ भाषे लहज़ा।

⁶ दोई यरूशलेम शहरो यहुदी मंदिर (प्रार्थना लहज़िमी ठहरि) सेह लहज़िमी कोशिश लहरी, झांह लेह ञेंहच़ी दोबि गिरफ्तार लेह च़रतिन, छना कुचे ञेंहच़ी हेंदु कानूनो हिसाबे दोबि सज़ा रंड्री जुंज़ातंई।

⁷ पर रोमी सेनिकातु सरदार लुसियासे अंज़े दोबि जोर रें ञेंहतु गुह्ट्र ज़ि दुह खोल्ज़े च़रति,

⁸ दंङ दिऊ टोईच़ी दोष लगाएच़ा दंङ कनु तुईज़ी अपिमी आज्ञा रैंईरे। दि भत्ते गप्पातु पाहठी अंऊ दोऊ टोईच़ी दोष लगाएच़ातंई, कांह केनेह दोऊ जांच लेह सच्चाई बि ञेंई च़रतु।”

⁹ यहुदी ज़ि ला दोऊ साथी रें कुइरे, दि गप्पारे हेले शुह।

फेलिक्सो तुईज़ी पोलुसो जबाब

¹⁰ अपेहल राज्यपाले पोलुसा बि कुट्रीमी थल्जी इशारा लहरी, “गेह दि ञेंहच़ा कि कांह महस टेम बे दि देशो न्याय लहज़ातन, झांह लेह गेह खुशी रंङ साते घेंङौ बचाव लहज़ातग।

¹¹ केई केने दि ञेंई च़रपोन, कि अपेहल बेह्ची गेह यरूशलेम शहरो मंदिरो अराधना लहज़ी अतिगा, दंङ गिह्बी देर सनी ध्याड़ा ज़ि खेका माह शुई।

¹² दोच़ी गिह्बी माह यहुदी मंदिरंङ, माह यहुदी सभो घरबारंङ, माह नगरंङ अतंङ साते कुवाद लहज़ी ए भीड़ ठ्रोहका लेह तंङरिरे;

¹³ दंङ माह ता दू गप्पातु, अंऊ दोऊ पाहठी दोरे गिऊ टोईच़ी दोष लगाएच़ातोर, कनु तुईज़ी दोबि हेले साबित लेह तरपोंई।

¹⁴ पर गेह केहतु तुईज़ी दि गप्पा मनेक्च़ातेग, कि गेह मसीहू शिक्षा ओ हिसाबे घेंङौ बाह-मेमेतु परमेश्वरो सेवा लहज़ातग, अंऊ यहुदी अगुवा तु हिसाबे सही माह। दंङ अंऊ गप्पारे कानून ए भविष्यवक्तातु कताबंङ च़ेहसी तोह, गेह दू भत्ते तु टोईच़ी विशवास लहज़ातग।

¹⁵ दंङ परमेश्वरो दोरच़ी उम्मीद लहज़ातग अंऊ दोच़ी ऐनाह ज़ि ला लहज़ातोर कि धर्मी ए अधर्मी झुल्लाकु तिंङ परमेश्वर सिए दोतु बिचंङ ज़ि श्रींङमी लोहतो।

¹⁶ दिए नज़रिया रंङ साते गेह परमेश्वर ए मीह झुल्ला तु तुईज़ी हमेशा इच्च़ा निष्कलंक अन्तरात्मा बणाएच़िमी भरपूर कोशिश लोहग।

¹⁷ महस सालो थल गेह गरीब मीहतिंङ दान पिट्री, दंङ परमेश्वरा बि बलि चाढसी यरूशलेम शहर वापिस अतिगा।

¹⁸ दू मुक्का यहुदी मुख्या ज़ि यहुदी मंदिरंङ गिह्बी शुद्ध शुहबी रिति पूरे लहज़ी खंणीर, गेरंङ साते माह भीड़ तोहई, दंङ माह ए छो आ सग तोहई। पर आसिया प्रदेशो रे यहुदी मीहरे तोतोर अंऊ दोच़ी आशांत माहौल बणाएषी तातोर।

¹⁹ अगर गेह छा गलत लहसी तातग ता, दंङ गिऊ टोईच़ी दोष लगाच़िमी थल्जी देर कनु तुईज़ी शुहबी जुंज़ातेग।

²⁰ या दिरे मीहरे एनाह ए केतंङ साते कोहर, कि अपेहल गेह यहुदी सभा ओ तुईज़ी खड़े तोईगा, दंङ दोच़ी गिऊ अंदरेग छि दोष खोकतिर?

²¹ इच्च़ा दोष दोरे खिलाप लगाके तरपोर, अपेहल गेह मंदिरो ल्वाड़िंङ खड़े शुहचे जोरे सग रंङ कुईगा, छि सिए मीहरे यह्च़ा श्रींङमोर आ? तोग गिऊ कांह दोरच़ी न्याय शुहबी लेहकी तोह छना कुचे गेह विशवास लहज़ातग कि परमेश्वर दू मीहतङ अंऊ सिए इलजी तोतोर यह्च़ा श्रींङमी लोहतो।”

²² राज्यपाल फेलिक्स, ईसाई तु विशवासा तिंङ रूठे रंङ ञेंहच़ातेर, दोतिंङ दि कुह्चे टालेके केहरी, कि “अपेहल सेनिकातु सरदार लुसियास अपतो, ता केहतु गप्पो फेंसला लोहग।”

²³ दंङ सुबेदारा बि हुकुम रेंई, कि पोलुसा बि रखवाली रिंङ तोह, पर ऊई कैदी तु ठ्रोह ए व्यवहार लंहि। दिऊ अलावा, दोबि पोलुसा बि दोऊ मित्रा तु बिचंङ अतिंङ ला दोऊ सेवा लहज़िमी थल्जी मना थालोहू।

पोलुस फेलिक्स ए दोऊ मेच़ा रंङ साते गप्पा

²⁴ थोड़े ध्याड़ो थल, राज्यपाल फेलिक्स एनोह मेच़ा द्रुसिल्ला बि, अंऊ यहुदीनी तोहई, कैसरिया शहरो हखा वापिस अति। दंङ दोई पोलुसा बि एनोह बचावो थल्जी च़रति। राज्यपाल फेलिक्स दोबि मसीह यीशु पाहठी कुट्री रेड्रीरी।

²⁵ अपेहल पोलुस धर्म ए धीरज़ दंङ अंजा न्यायो पाहठी गप्पा लहज़ी लेहकी तोहई, दंङ फेलिक्से ए वेवा जुबाब रेंई, “एंतेग कांह अच़ा ईला। अपेहल गिऊ कछंङ टेम शोतो, गेह घेंङै कनिंङ यह्च़ा अता कोहग।”

²⁶ हालांकि, फेलिक्स दू गप्पातु पाहठी वेवा ते अंऊ पोलुसे कुहषी तते, तांला दू हमेशा दोबि बुलाएच़ाते दंङ दोरंङ साते गप्पा लोहवाते छना कुचे दिह्बी उम्मीद तोहई कि पोलुस कैदो दोरच़ी धकतेखा हुंच़िमी थल्जी दोबि ढबाह रमतो।

²⁷ पर अपेहल झुह्ट साल पूरे शुहचे इलि, ता पुरकियुस, फेस्तुस, फेलिक्सो ठहरि राज्यपाल बणेंके इलि, दंङ फेलिक्स यहुदी तिंङ खुश लहज़िमी हिटी रंङ पोलुस बि बन्दी ए केह्चे केहरी।