प्रेरित 19 - लाहौली बाइबिल

इफिसुस नगरंङ पोलुस

¹ अपेहल अपुल्लोस कुरिन्थुस शहरा रिंङ तोहई, दंङ पोलुस तोरिंङ खी भत्ते प्रदेशंङ च़ि शुहचे इफिसुस नगर रिंङ अति। दंङ दोहर थोड़े अरे चेला तंङ दोहरी,

² दोई कुई छि केहच़ी विशवास लहज़ा मुक्का पवित्र आत्मा खोकशातंईयां दोई दोतंङ साते कुई, ञेंहच़ी ता पवित्र आत्माओ पाहठी थाक्शी ए माह।

³ पोलुसे दोतंङ साते रूहक्ति कि, दंङ केहतु बपतिस्मा लेहच़िमी छि मतलब तोहई? दंङ दोच़ी जबाब रेंईरे ञेंहच़ी दि साबित कि ञेंहच़ी दुह गप्पो टोईच़ी विशवास लाहज़तंई अंऊ यूहन्ना बपतिस्मा रंड्राड़े सिखाएसी तोहई।

⁴ पोलुसे कुई, “यूहन्ना ज़ि दुह मीहतिंङ बपतिस्मा रंड्राते अच़ि पाप लेह बंद लेह च़रसी तरेर दंङ परमेश्वरो कछंङ अच्च़ा अतिर।” पर दोई इस्राएल देशो मीहतंङ साते कुई कि अंऊ दोऊ थल अपिमी तोह, दोऊ टोईच़ी विशवास लंहि। अंऊ कि यीशु शुह।

⁵ दिह रेड्रा दोच़ी प्रभु यीशु मिनज़ी बपतिस्मा लेहप्तिर दि कंड्रीमी थल्जी कि हेंतेग यीशु दोतु प्रभु शुह।

⁶ अपेहल पोलुसे दोतु टोईच़ी गुहड़ केहरी, दंङ दोतु टोहकठे पवित्र आत्मा अति, दंङ दुरे खरकोई, खरकोई भाषा कुट्री ए भविष्यबाणी लहज़ी लेहतिर।

⁷ दिरे भत्तेर लगभग सनी गंङमी रे तोईर।

⁸ दंङ दोहपल पोलुस यहुदी सभो घरबारंङ इलजे षुमु लाह तचेक निडर शुहचे प्रचार लहज़ी लेहती, दंङ परमेश्वरो राजो पाहठी बहस लहज़ी ए समझाएक्ची लेहती।

⁹ पर अपेहल रेह मीहज़ी ज़िद्दी शुहचे विशवास लहज़िमी रंङ साते इंकार लेह च़रतिर दंङ मीहतु तुईज़ी यीशु पाहठी रांहषी शिक्षा ओ थल्जी मदम कुट्री लेहतिर, दंङ दोच़ी यीशु पाहठी रांहषी शिक्षा ओ थल्जी दोई दोतिंङ केट्रा चेला तिंङ शत्‌ह लेह च़रति, दंङ रोज तुरनुसो स्कुलंङ शिक्षा रंड्री लेहती।

¹⁰ दि झुह्ट साल तचेक ज़ारी तोहई, भत्ते मीहरे, झुल्ला यहुदी ए ऊईजाति अंऊ आसिया प्रदेशो बंङज़ातेर, प्रभु यीशु पाहठी खबर रेड्रीर।

इफिसुसो सामर्थ्यो अनोखे कम

¹¹ दंङ परमेश्वरे पोलुसा बि अनोखा अरे चमत्कार लहज़िमी शाक्ति रांहषी तहरे।

¹² देहर तचेक कि रुमाल ए खमज़ेर अंऊ पोलुसो फुका रिंङ थोहके तोहई दंङ दुह टेहची दोतु टोईच़ी केट्री लेहतिर, दंङ दोरे बीमारी ओ दोरच़ी ठीक शुहबी लेहतिर: दंङ मांजी आत्मा दोतु दोरच़ी हुंच़ा यवाते।

¹³ पर रेह यहुदी गंङमी रे दुह मीहतिंङ धकते हखा हुंपि लेहतिर अरी टंणा मंणा लहज़ातेर, अतु अन्द्रेग मांजी आत्मा तोहई दोतु टोईच़ी प्रभु यीशु मिंदंङ दिह कुचे कुट्रे टंणा मंणा लहज़ातेर, अंऊ यीशु प्रचार पोलुस लहज़ी लेह्की तो, गेह केतिंङ धह्कते का अपिमी आज्ञा रंड्रातग।

¹⁴ दंङ सिक्क्वा मिंदंङ इच्च़ा यहुदी मोह्ड़े पुरोहितो निह्ज़ी योह रे तोईरे, अंऊ झांह ए लहज़ातेर।

¹⁵ पर मांजी आत्माज़ि दोबि जुबाब रेंई, यीशु बि गेह सेहका; दंङ पोलुसा बि ला गेह सेहका, पर कांह अरि शुनाह?

¹⁶ दंङ दुह मीह अतिंङ मांजी आत्मा तोहई; दोऊ हखा त्रोंज़ा, दंङ दोतिंङ काबू लेह, दोतु खिलाप शुहचे, कि दोरे दुह घरबारंङ ज़ि नंङटे ए घायल शुहचे पोकषे इलिर।

¹⁷ दंङ दिह गप्पा इफिसुस शहर बंङज़ा यहुदी ए ऊईजाति ज़ि ला ञेंए च़रतिर, दंङ दोरे भत्ते वेवा इलिर; दंङ प्रभु यीशु ऊ मिन्दु महिमा लहरिर।

¹⁸ दंङ अच़ि विशवास लहरिर, दोतु बिचंङ ज़ि महस मीहज़ी एनोह-एनोह मदम कमार खुले आम मनेकी च़रतिर।

¹⁹ दंङ टंणा मंणा लहज़ा तु दोरच़ी एनोह-एनोह पोथी रे भत्ते तु तुईज़ी रोह्चे च़रतिर; दंङ अपेहल दोतु लस लहरिर ता दोतु लस झुह्ट निह्जो सा हज़ार मुलतु सिक्को बराबर शुई।

²⁰ झांह लेह प्रभु वचन सामर्थ रंङ साते फेलेकचि लेहती ए बड़ेक्पी लेहती।

²¹ अपेहल दिह गप्पा शुहचे इलि ता पोलुसे मकिदुनिया ए अखाया प्रदेशो विशवासी तंङ साते जोवा थल यरूशलेम शहरो हखा इबिमी थल गिह्बी रोम शहरो हखा खंड्री ज़रूरी तोह।

²² झांह लेह एनोह सेवा लहज़ा तु बिचंङ ज़ि तीमुथियुस ए इरास्तुस बि मकिदुनियो हखा एनोह तुईज़ी च़रति दंङ ऐनाह आसिया रिंङ बंङज़िरी।

इफिसुसरि झगड़ा

²³ ध्वांए, दोरकी रैह मीहच़ी दुह मीहतु थल्जी महस मुसीबत खड़े लहज़िमी कोशिश लहरिर, अंऊ दोच़ी दि गप्पो विशवास लहज़ातेर कि छना ठ्रोह परमेश्वरे ञेंहतु थल्जी अनंत जीवन खोकसिमी प्रकट लहसी ततो।

²⁴ देमेत्रियुस मिंदंङ इच्च़ा सुनार अरतिमिस देवी मंदिरो मुलतु ढांचा बणाएच़ते, दोऊ दि व्यापारे करीगरा तिंङ महस फायदा शवाते।

²⁵ दिमेत्रियुसे एनोह करीगरा तु बैठक ए दुह मीहतु बैठक बिठाएति, अंऊ दोच़ी क्वच़ी मुलतु ढांचा बणाएक्च़ातेर। दोई दोतंङ साते कुई, हे न्वारे, केहच़ी ञेंहनी कि दिह कम लेह हेंदिंङ अंयों कमाई शवाह।

²⁶ दंङ केहच़ी खंड्रातंई ए रेड्रातंई कि सिर्फ इफिसुस शहरंङ ए माह, आसिया प्रदेशो भत्ते नगरा रिंङ दिह कुह्चे दिह पोलुसे महस मीहरे समझाएक्ती, कि अंऊ गुह्ट्र बणाएषी भगवान तोह, दोरे भगवान माह शुरे।

²⁷ दंङ हेंतेग सिर्फ दिह इच्च़ा गप्पो ए बेह्द माह कि ञेंहतु दिह कमो तरीफ योह्सा योतो; पर दिह कि मोह्ड़े देवी अरतिमिसो मंदिर कवचि चेहपोर दंङ अतु भत्ते आसिया प्रदेशारिंङ रिंङ अराधना शवाह, दुह मंदिर ला नाश शुहचे योतो।

²⁸ भत्ते करीगर दिह रेड्रा रोषेक्च़ा इलिर दंङ हऊषेक्च़ा कुट्री लेहतिर, “इफिसियों शहरो अरतिमिस, मोह्ड़े शुह।”

²⁹ शहरो ऊई मीहच़ी हाऊषेक्च़िमी सग रेड्रीर, दंङ इलजे भीड़ा रिंङ शामिल शुहचे इलिर दंङ शहरा रिंङ हल्ला शुहचे इलि दंङ मीहच़ी गयुस ए अरिस्तखुर्स, मकिदुनिया प्रदेशो मीहरे अंऊ पोलुसा रंङ साते यात्रा लहज़ातेर। दोऊ थल भत्ते मीहरे ठ्रोहका शुचि ज़रका रेंईर दंङ दोतिंङ षोह्के रंगशालो हखा रेंज़ा शिलिर।

³⁰ अपेहल पोलुस ला रंगशालो तुंखा इलजी मीहतंङ साते गप्पा लहज़ी तते दंङ चेलाज़ि इबि मा रेंई।

³¹ असियो प्रदेशो अधिकारी तु बिचंङ ज़ि रेह पोलुसो मित्रार तोईरे। दोच़ी दोबि खबर च़रतिर दंङ विनती ला लहरिर, कि दुह रंगशालो अंद्रेग इलजे केनोह जान खतरा रिंङ था केहऊ।

³² रंगशालो अन्द्रेग भत्ते मीहरे हउषेच़ि लेहतिर, छना कुचे सभा रिंङ मोह्ड़े गड़बड़ी शुहचे तोहई, दंङ ज्यादातर मीहरे ता दिला माह ञेंचातेर कि दोरे छारिंङ ठ्रोहका शुहचे तोईरे।

³³ दोहपल भीड़ो बिचंङ ज़ि रेह मीहच़ी सिकंदरा बि, अतिंङ यहुदी ज़ि खड़े लहते भीड़ो दोरच़ी तुंखा लेह च़रतिर। दंङ सिकंदर चुपे बंङज़िमी थल्जी मीहतु तुईज़ी एनोह बचाबो थल्जी एनोह गप्पा कुट्रीमी कोशिश लहरी कि छि शुहबी लेहकी तोहई।

³⁴ पर अपेहल दोच़ी दि ञेंई च़रतिर कि दुह इच्च़ा यहुदी शुह, दंङ भत्ते मीहरे इच्च़ा सग शुचे लगभग झुह्ट घंटा लगातार हाऊषेक्चि लेहतिर, “अरतिमिस इफिसियों देवी, मोह्ड़े शुह।”

³⁵ दंङ इलाको मंत्री ज़ि मीहतिंङ शांत लेह कुट्री लेहतिर, हे इफिसुसो मीहरे, हर इच्चे दिह ञेंहच़ा कि इफिसियों शहरो मीहतु मोह्ड़े देवी अरतिमिसो मंदिरो देखभाल लहज़ातोर, दंङ दोऊ पवित्र रहघ सर्गंङ च़ि दहचते।

³⁶ झांह लेह अगर दिह गप्पा बहस मेह हेले तोह, दंङ दिह ठीक तोह कि केरे शांत बंङज़ुंई बिना सोचेके समझेके छल्ले थाह कुंई।

³⁷ छना कुचे केहच़ी दिरे मीहरे हासी शुई, पर दोच़ी मंदिरंङ च़ि छिल्ला चोरी लहसी माह शुह दंङ माह ए ञेंहतु देवी बि मदम कुहषी शुह।

³⁸ झांह लेह देमेत्रियुस ए दोऊ साथी कारीगरर दंङ दोऊ साथी करीगरा तिंङ अतंङ साते ला शिकायत तोह ता दोरे कोर्टंङ इलजे तरपोर, दंङ दोतु मुकदमो फेंसला लहज़िमी थल्जी अधिकारी ला तोतोर; दोहर मीहरे इदि-अईदिऊ टोईच़ी दोष लगाए के तरपोर।

³⁹ पर अगर केहच़ी ऊई गप्पो पाहठी रुहक्च़ी तातंई, दंङ दि ञेंहतु शहरो सभा रिंङ फेंसला शोतो अधिकारी तंङ बुलासी शोतो।

⁴⁰ गिह्बी बेह्द तोह कि हेंदु खिलाप हेंदु रोमी सरकारो अगुवा तिंङ तोग कि दि दंगा शुरू लहज़िमी दोष लगाके तरपोर, दि गप्पा खतरा रि तोतोंई, झांह लेह कि दि दंगो थल्जी छल्ले वहज़ा माह। दंङ अगर रोमी सरकारे दि पाहठी छा जबाब पेट्रा, दंङ ञेंहच़ी माह ञेंई कि छि कुट्री शुह।

⁴¹ दंङ दिह कुट्रा दोई सभा विदा लहरी।