प्रेरित 18 - लाहौली बाइबिल

कुरिन्थुस नगरंङ पोलुस

¹ दिऊ थल पोलुस एथेंस शहर केट्रा कुरिन्थुस शहरो हखा अति।

² दंङ दोहर दोबि अक्किला मिंदंङ इच्च़ा यहुदी मीह दोरिह, अतु जन्म पुन्तुस प्रदेशंङ शुहचे तोहई अंऊ इच्च़ा रोमी प्रदेश ला तोहई; दंङ एनोह मेच़ा प्रिस्किल्ला रंङ साते इतालिया प्रदेशो दोरच़ी अंज़े तोहई, छना कुचे महाराजा क्लौदियुसे भत्ते यहुदी मीह तिंङ रोमो दोरच़ी हुंच़िमी हुकुम रांहषी तते, पोलुस दोतंङ साते दोहई इलि।

³ दिऊ थल्जी कि पोलुस ए अक्किला ओ इच्च़ा ए ठ्रोह व्यापार तोहई, दिऊ थल्जी दोतंङ साते बंङज़ा कम लहरी। दोतु व्यापार तम्बू बणाएषिमी तोहई।

⁴ दंङ पोलुस हर इच्च़ा अरामो ध्याड़ारिंङ यहुदी सभो घरबारंङ सवाल-जबाब लहज़ा यहुदी मीहतिंङ ए ऊईजाति मीहतिंङ ला यीशु टोईच़ी विशवास लहज़िमी समझाएक्चाते।

⁵ अपेहल सीलास ए तीमुथियुस मकिदुनिया प्रदेशंङ ज़ि बिरिया शहरो ज़ि कुरिन्थस शहरा रिंङ अतिरे, दोहपल पोलुसे तम्बू बणाएट्रिमी कम बंद लेह चरच़ाते दंङ पोलुस बचन सुनाएच़िमी धुना रिंङ यहुदी तिंङ गवाही रंड्री लेह्की तोहई कि यीशु ए मसीह शुह।

⁶ पर अपेहल यहुदी मीहरे पोलुसो खिलाप बुराई लहज़ी लेहती; दुह मुका दोई एनोह खमज़े साफ लेह दोतंङ साते कुई, “परमेश्वरो बचन अस्वीकार लेह वहज़ा ज़ि केरे ए दुह सज़ा ओ ज़िमेवार शुई, अंऊ केतिंङ परमेश्वरो दोरच़ी खोकसोतो! गेह निर्दोष शुगाह। हेंतेग बेहच़ी गेह ऊईजाति तु कछंङ इलजे परमेश्वरो बचनो प्रचार लोहग।”

⁷ दंङ दोरे यहुदी सभो घरबारंङ च़ि हुंच़ा तितुस युस्तुस मिंदंङ परमेश्वरो इच्च़ा भक्तो चुंङ अंऊ इच्च़ा ऊईजाति तोहई सिखाच़िमी थल्जी अति; अतु चूंम यहुदी सभो घरबारो कछंङ तोहई।

⁸ दोहपल यहुदी सभो घरबारो मुख्या क्रिस्पुसे एनोह भत्ते घराना रंङ साते प्रभु यीशु टोईच़ी विशवास लहरी; दंङ महस कुरिन्थ शहरा रिंङ बंङज़ा मीहरे दिह रेड्रा थल विशवास लहरी दंङ बपतिस्मा लेहप्तिर।

⁹ दंङ प्रभु ज़ि इच्च़ा रातारिंङ दर्शन रेह पोलुस ओ हखा कुई, थाह बेऊ, पर कुडू दंङ चुपे था बंङज़ु।

¹⁰ छना कुचे गेह करंङ साते तोतोग, अच़िला कांह नुकसान माह लोहर; छना कुचे दिह नगरंङ गिऊ महस मीहरे तोतोर अंऊ युरनाह ए गिऊ टोईच़ी विशवास लोहर।

¹¹ झांह लेह पोलुस दोतिंङ परमेश्वरो बचन सिखाएच़ा ढेड साल तचेक दोतंङ साते बंङज़िरी।

¹² अपेहल गल्लियो अखाया प्रदेशो राज्यपाल तोहई दंङ यहुदी मीहरे ठ्रोहका शुहचे पोलुसो खिलाप खड़े शुहचे इलिर, दंङ दोबि कोर्टो तुहई ज़ि हंजे कुट्री लेहतिर,

¹³ दिह मीहतिंङ दिह समझाएचाते, कि परमेश्वरो अराधना झांह ठ्रोह लंहि, अंऊ कानूनो खिलाप तोह।

¹⁴ अपेहल पोलुसे कुट्रीमी तहरे, दंङ गल्लियो ज़ि यहुदी मीहतंङ साते कुहई, हे यहूदियों, अगर दिह छि अन्याय ए मांजी गप्पा शुई ता, दिह ठीक तोहई कि गेह केहतु रेड्रीगा।

¹⁵ पर अगर दिह बहस ए शब्द ए मिन दंङ केहतु दोरकि कानूनो पाहठी तोह, दंङ केहच़ी ए ञेंई, छना कुचे गेह दिह गप्पातु न्यायी बणेक्पी माह जुंज़ातग।

¹⁶ दंङ दोई गल्लियो मीहतिंङ हुकुम रें कि दोतिंङ धह्कते हुंज़ी च़रतुंई।

¹⁷ दोहथर भत्ते मीहच़ी यहुदी सभो घरबारो मुख्या सोस्थिनेस च़ुमने न्याय आसनो तुईज़ी तेंङरिर, पर गल्लियो ज़ि दी गप्पो छिला चिंद मा लहरिर।

अन्ताकियारि इबि

¹⁸ पोलुस महस ध्याड़ा तचेक कुरिन्थुस शहरा रिंङ बंङज़िरी, दंङ प्रिस्किल्ला ए अक्किला ला रंङ साते, दुह विशवासी न्वारे तंङ साते विदा शुचे किंख्रिया शहरो हखा अच़ा इलि। दुह शहरा रिंङ पोलुसे एनोह पुंज़ा ओ मुण्डन लेह च़रति दि कंड्रीमी थल्जी कि अंऊ वाईदा दोई परमेश्वरा रंङ साते लहसी तहरे दोबि पूरा लेह चरच़तो दोऊ थल दुह सीरिया प्रदेशो हखा इबिमी थल्जी इच्च़ा जहाज़ो टोईच़ी अच़ा इलि। दोरंङ साते प्रिस्किल्ला ए अक्किला ला तोहई।

^19-21 अपेहल दोरे इफिसुस शहर रिंङ पिचे इलिर, दोहपल पोलुस यहुदी सभो घरबारंङ इलि दंङ यहुदी मीहतंङ साते बहस लहरी। दोच़ी दोबि दोर्तिंङ ए दोतंङ साते बंङज़िमी थल्जी महस कोशिश लहरिर, पर पोलुसे इन्कार लेह च़रति। दंङ कुई, “अगर परमेश्वरे दिए जुंज़ा, दंङ यह्च़ा अपोग।” दोहपल दोई अक्किला ए प्रिस्किल्ला बि इफिसुस शहर छोड़ेके च़रति, दंङ दोरे तुंखा इबिमी थल्जी इच्च़ा जहाज़ा रिंङ सवार शुचि इलिर।

²² दोहथल केसरिया शहरा रिंङ पिचे थल, पोलुस जहाज़ंङ ज़ि तक्सा इलि दंङ दोरकी कलीसिया ओ विशवासी तंङ दोईमी थल्जी यरूशलेमो शहरा रिंङ अच़ा इलि। दोऊ थल दुह अन्ताकिया ओ हखा वापिस इबिमी थल्जी हुंच़ा इलि।

पोलुसो तीसरा प्रचार यात्रा

²³ थोड़े हप्ता बंङज़िमी थल, दोई अन्ताकिया शहर छोड़ेके च़रति, दंङ गलातिया प्रदेश ए फ्रुगिया प्रदेशा ज़ि दंङ नगर-नगर तचेक इबि लेहती, दंङ विशवासी तिंङ विशवासा रिंङ पक्‍का लहज़िमी मदत लहरी।

अपुल्लोस मिंदंङ विद्वान गङमी

²⁴ अपुल्लोस मिंदंङ इच्च़ा यहुदी, अतु जन्म सिकंदरिया शहरा रिंङ शुहचे तोहई, अंऊ विद्वान मीह तोहई दंङ पवित्रशास्त्र रुठे रंङ ञेंच़ाते, इफिसुस रिंङ अति।

²⁵ दोच़ी प्रभु यीशु पाहठी ऊई तंङ सिखेसा तोईरे, दोऊ भत्ते सेहमे प्रचार ए शिक्षा रेंईर। दंङ छिल्ला दोई कुट्राते दुह हेले तोहई, पर दोई दिए ञेंहच़ाते अंऊ यूहन्ना ज़ि सिखाएकाते अपेहल दोई बपतिस्मा रंड्राते।

²⁶ दुह यहुदी सभो घरबारंङ निडर शुहचे कुट्री लेहती, पर प्रिस्किल्ला ए अक्किला ज़ि दोऊ गप्पा रेड्रीते, अपुल्लोसा बि एनोह चुंङ लेन्ज़ा शिली दंङ परमेश्वरो अमो गप्पा दोबि रूठे रंङ कंड्री लेहती।

²⁷ अपेहल अपुल्लोस दिह पक्‍का लेह च़रति कि दुह अखाया प्रदेशो हखा योतो दंङ इफिसुसा रिंङ विशवासी ज़ि कुईर कि झांह लेह दोतु थल्जी रूठे शोतो। दिऊ थल्जी दोच़ी अखाया रिंङ विशवासी तिंङ डाक चेई कुईरे कि दोतिंङ अपुल्लोस स्वागत लेह जुंशी तोह। दंङ अपुल्लोस इच्च़ा जहाज़ो टोईच़ी अच़ा इलि कुरिंथ इबिमी थल्जी। दंङ दोर पिचे परमेश्वरो मोह्ड़े दाह ओ दोरच़ी दुह मीहतु महस मदत लहरी अंऊ दोच़ी विशवास लहरिर।

²⁸ छना कुचे दोच़ी पवित्रशास्त्रो दोरच़ी गवाही रंड्रा कि यीशु हि मसीह शुह, मोह्ड़े हिम्मत रंङ साते यहुदी मीहतिंङ भत्ते तु तुईज़ी जबाब रंड्राते।