प्रेरित 17 - लाहौली बाइबिल

थिस्लुनीके नगरंङ पोलुस ए सिलास

¹ दंङ पोलुस ए सीलास अम्फिपुलिस इलाका ए अपुलोनिया इलाकंङ च़ि शुहचे थिस्लुनीके नगरंङ अतिरे, अंऊर यहुदी सभो घरबार तोहई।

² दंङ पोलुस एनोह हिसाबे दोतु कछंङ इलि, दंङ षुमु आरामो ध्याड़ारिंङ पवित्रशास्त्रो दोरच़ी दोतंङ साते बहस लहज़ी लेहतिर;

³ दंङ दोतु मतलब रूठे रंङ समझेक्सी लेहतिर कि मसीहू दुख उठाएच़ी ए सिमी दोरच़ी श्रींङमी ज़रूरी तोहई; “दिह यीशु अतु पाहठी गेह प्रचार लहज़ातग मसीह शुह।”

⁴ दोतु बिचंङ च़ि अंयों शुहदा यहुदी मीहच़ी, दंङ परमेश्वरो बेह्द चेहच़ा ऊईजाति मीहज़ी ए मेच़िमी ज़ि विशवास लहरिर, दंङ पोलुस ए सीलास रंङ साते शुहचे इलिर।

⁵ पर थोड़े ध्याड़ो थल यहुदी मीहज़ी जलनो पिंङषा इलिर। दोरे बज़ारंङ इलिर दंङ रैह मदम मीहतिंङ साते लेह च़रतिर, दंङ शहरा रिंङ भीड़ लगाके विशवासी तु खिलाप हल्ला लहज़ी लेहतिर। दंङ दोहथर दोच़ी यासोंनो चुंङ हमला लेह च़रतिर दंङ पोलुस ए सिलासा बि मीहतु तुईज़ी हपि जुंज़ातेर।

⁶ दंङ दोतिंङ दोहर माह खोकसिरी रंङ साते, दोरे दिह हाऊष रंड्रा यासोंन ए रेह विशवासी तिंङ नगरो अधिकारी तु तुईज़ी षोह्के हतिर, “दिरे मीहरे, अंऊ दोच़ी भत्ते ठहरि रिंङ तहस-नहस लेह च़रतिर, देहर ला अंज़े तोतोर।

⁷ दंङ यासोंने दोतिंङ एनोह चुंङ बंङज़ी रेह, दंङ दिरे भत्तेरे दिह कुट्री लेह्की तोतोर कि यीशु रज्ज़ा शुह, दंङ रोमी महाराजा हुकुमो ओ विरोध लहज़ातोर।”

⁸ अपेहल भीड़ो मीहच़ी ए शहरो अधिकारी च़ि दिह गप्पा रेड्रीर, दंङ दोरे परेशान शुहचे इलिर।

⁹ दंङ दोच़ी दिह रेड्रा ऊई मीहतिंङ ज़मानत रेह छोड़के च़रतिर।

बिरिया नगरंङ पौलुस ए सिलास

¹⁰ विशवासी ज़ि दोहथर ए रातो रात पोलुस ए सीलासा बि बिरिया शहरो हखा चरच़े च़रतिर, दंङ दोरे दोर्तिंङ पिचे थल यहुदी सभो घरबारंङ इलिर।

¹¹ बिरिया ओ दि मीहतिंङ थिस्लुनीके शहरो यहुदी मीहतु तुलना रिंङ सिखेसिमी महस दिलचस्पी तोहई, दंङ दोह्ची महस खुशी रंङ साते दि बचन ग्रहण लहरिर, दंङ रोज पवित्रशास्त्रो अन्द्रेग दिह पेट्री लेहतिर कि दिह गप्पा अंऊर च़ेहसी तोह।

¹² झांह लेह दोतु बिचंङ ज़ि रै यहुदी ज़ि, दंङ ऊईजाति तु मुख्या मेच़िमी ए दंङ गंङमी तु बिचंङ ज़ि महसे ज़ि विशवास लहरिर।

¹³ पर अपेहल थिस्लुनीके शहरो यहुदी ञेंए केहरी कि पोलुस बिरिया नगराङ ला परमेश्वरो बचन सुनाएच़ा, दंङ दोर ला अंज़े मीहतिंङ भड़कासी लेहतिर दंङ हलचल लहज़ी लेहती।

¹⁴ दोहपल विशवासी न्वा ज़ि दोहथर ए पोलुस ए साथी तिंङ बंदरगाहो कछंङ विदा लहरिर; पर सीलास ए तीमुथियुस दोहर बिरिया शहरा रिंङ केह्षा इलिर।

¹⁵ पोलुस ओ साथी दोरंङ साते एथेंस शहर तचेक इलिर, पर पोलुस दि हुकुम रंङ साते दोरे बिरिया शहरो हखा यह्च़ा इलिर कि सीलास ए तीमुथियुसा दोऊ कछंङ युरनाह अपोर।

एथेंस शहरा रिंङ पोलुस

¹⁶ अपेहल पोलुस एथेंस शहरा रिंङ दोतिंङ रुमज़ा तोहई, दंङ नगरो अन्द्रेग महस मुर्ति खंड्रिमी रंङ साते दोऊ सेहम महस दुखी शुहचे इलि।

¹⁷ झांह लेह यहुदी सभो घरबारंङ दुह यहुदी ए परमेश्वरो बेह्द चेहच़ा ऊईजाति मीहरे, दंङ च़ोकंङ अरि मीहरे दोआतेर, दोतंङ साते हर ध्याड़ा बहस लहज़ा तोहई।

¹⁸ दोहपल रै विद्वाना अंऊ इपिकुरी विशवासो भाषे लहज़ातेर दंङ ऊई सतोईकी विशवासो भाषे लहज़ातेर दोतंङ साते बहस लहज़ी लेहतिर दंङ रैह ज़ि रूहक्तिर, “दिह बकवास लहज़ा ए छि कुट्री लेह्की तोह?” पर ऊई ज़ि कुट्री लेहतिर, “दुह ऊई भगवाना तु प्रचारक शोतो,” छना कुचे दोई यीशु श्रींङमी पाहठी रूठे खबर सुनाएची लेह्की तोह।

¹⁹ दोहपल दोरे पोलुसा बि ऐनारंङ साते अरियुपगुस मिंदंङ इच्च़ा महासभा ओ तुहज़ी लेन्ज़ा हतिर दंङ रुहक्च़ी लेहतिर, छि ञेंई तरपोंईयां, कि दिह खरकोई शिक्षा अंऊ केई सुनाएची लेह्की तोतोन, छि शुह?

²⁰ छना कुचे केई ञेंतिंङ अनोखा गप्पा सुनाएक्च़ातन दिऊ थल्जी ञेंहच़ी दी सोचेक्च़ातंई कि दिऊ मतलब छि शुह।

²¹ छना कुचे भत्ते एथेंस शहरो मीहरे ए परदेशी अंऊ दोहर बंङज़ातेर, खरकोई-खरकोई गप्पा कुट्री ए रेड्रीमी अलावा ऊई छिला कहम माह लहज़ातेर।

अरियुपगुसो सभारि पोलुसो भाषण

²² दंङ पोलुसे अरियुपगुस मिंदंङ इच्च़ा महासभा रिंङ खड़े शुहचे कुई, हे एथेंस शहरो मीहरे गेह खंड्रातग कि केरे भत्ते गप्पा रिंङ भगवाना बि मनेकच़ाड़ तोतोंई।

²³ छना कुचे गेह ज़ोज़ा ते दुह मुक्का केहतु पूजा लहज़िमी समान खंड्री लेह्की तोईग, दंङ इच्च़ा ध्याड़ा झांह ठ्रोह इच्च़ा बेदी तंङरि, अतु टोईच़ी च़ेहसी तोहई, अंजान सद्द् तु थल्जी। झांह लेह अतु केहच़ी पता मेह अराधना लहज़ातंई गेह केतिंङ दोऊ पाहठी सुनाएपोग।

²⁴ अंऊ परमेश्वर शुह अच़ि संसार ए दोऊ भत्ते चीज़ बणाषी शुह, दुह गुहड़ो बणाषी मंदिरंङ माह बंङज़ी, छना कुचे दुह स्वर्गो ए धरती रिंङ ला प्रभु शुह।

²⁵ माह छा चीज़ो ज़रूरत रंङ मीहतु माह ए दोबि अरिया मीहू मदतो ज़रूरत तोह, छना कुचे दुह ए भत्ते तु जीवनो सग ए भत्ते ज़रुरतो चीज़ रंड्रा शुह।

²⁶ दोई इच्च़ा ए मीहरंङ साते शुरू लेह परमेश्वरे भत्ते मीहतु जाति बि धरती रिंङ बंङज़िमी थल्जी बणाएषी शुह; दंङ दोतु ठहराएसी टेम ए बंङज़िमी ठहरि ए निवासो हद तय लहरी।

²⁷ परमेश्वरे दिह दिऊ थल्जी लहरी ताकि मीहरे परमेश्वरा बि पेट्रोर, दंङ शायद दोरे दोऊ कछंङ पिपिमी कोशिश लोहर, दंङ दोबि पेट्रोर हालांकि दुह हेंदु बिचंङज़ि ऊईतार माह।

²⁸ छना कुचे दोऊ दोरच़ी ए कुई सा ता ञेंहच़ी दोऊ अन्द्रेग ए श्रींङी तोतोंई, दंङ ज़ोवा लहज़ातंई दंङ पक्‍का तोतोंई, छना केहतु कवि ज़ि कुट्री तोत, ञेंहच़ी ता दोऊ ए वंशज शुईं।

²⁹ झांह लेह परमेश्वरो कटुरे शुहचे ञेंतिंङ दिह समझेक्सी ठीक माह कि परमेश्वरो रूप ज़ंङ ए मुल दंङ रघटु ठ्रोह तोह, अंऊ मीहू कारीगरी ए सोचो हिसाबे शुहबी।

³⁰ झांह लेह परमेश्वरे मीहतु अज्ञानतो टेम ध्यान माह रें, पर हेंतेग भत्ते ठहरि रिंङ भत्ते मीहतिंङ सेहम किरज़िमी हुकुम रंड्रा।

³¹ छना कुचे दोई इच्च़ा ध्याड़ा ठहरासी ततो, अंऊर दोई दुह मीहू दोरच़ी धर्म रंङ साते संसारो न्याय लोहतो, इच्च़ा मीह तोह अतिंङ दोई दोतिंङ रूठे रंङ न्याय लहज़िमी थल्जी ठहरासी ततो, दंङ दोई दोबि सिमी दोरच़ी यह्च़ा श्रींङमी लहज़ी दि पक्‍का लहरी कि दुह, दुह ए शुह।

³² सिमी दोतु श्रींङमी मि गप्पा रेड्री थल रेह ता मज़ाक लहज़ी लेहतिर, पर रेह मीहच़ी मज़ाक माह लहरिर दंङ दोच़ी कुईर ञेंरे कांह दोरच़ी दि पाहठी ऊई ला रेड्रोनि, दंङ रेह ज़ि कुट्री लेहतिर, दिह गप्पा ञेंहच़ी कनु दोरच़ी यह्च़ा रेड्रोंई।

³³ दिऊ थल पोलुस दोतु बिचंङ अच़ा इलि।

³⁴ पर रेह मीहरे दोहरंङ साते च्वासा इलिर, दंङ प्रभु टोईच़ी विशवास लहरिर; अंऊर दियुनुसीयुस अंऊ अरियुपगुसो शहरो मीह तोहई, दंङ दमरिस मिंदंङ इच्च़ा मेच़िमी तोहई, दंङ दोतंङ साते ऊई ला मीहरे तोईरे।