प्रेरित 11 - लाहौली बाइबिल

पतरस ओ यरूशलेम शहरंङ वापसी

¹ चेलाज़ि ए बिशवासी न्वारे ज़ि अंऊ यहुदिया प्रदेशंङ तोईरे रेड्रिर, कि ऊईजाति ज़ि ला परमेश्वरो बचन ग्रहण लहरिर।

² दंङ अंऊ मुक्का पतरस यरूशलेम शहरंङ अति, ता यहुदी बिशवासी दोऊ टोहकठे दोष लगाके कुट्री लेहतिर।

³ “केई ऊईजाति मीहतु दोर्तिंङ इलजे दोतंङ साते बगत ज़ेरिन।”

⁴ दोथर पतरस ए दोतिंङ शुरू बेहच़ी दोरे भत्ते गप्पारे छना ठ्रोह कुरनेलियुस ओ चुंङ शुहते ध्वांए ठ्रोह सुनाएती;

⁵ “गेह याफा शहरंङ प्रार्थना लहज़ी लेहकी तोईग दंङ इच्च़ा दर्शन खांणीगा कि इच्च़ा मोह्ड़े चादरो ठ्रोह चीज़ पिला कुंणीऊ दोरच़ी टोमषी, सर्गंङ च़ि तक्सा गिऊ कछंङ अति।

⁶ अंऊ मुक्का गेह दोऊ टोईच़ी ध्यान लहरिगा, ता धरतीऊ महसे पाहठी जानवर, घुष्टी रंड्रा जीवर दंङ सर्गो प्यारे खांणीगा;

⁷ दंङ गेह इच्च़ा सग ला रेड्रीगा, ‘हे पतरस खड़े शुह, दितिंङ सच़े दंङ ज़े च़रतु।’

⁸ गेह कुईग, ‘माह प्रभु, माह, छना कुचे गेह अपेहला अपवित्र ए अशुद्ध चीज़ ज़हसी माह शुगाह।’

⁹ दिऊ जुबाबा रिंङ सर्गंङ च़ि यच़ाह सग अति, ‘अंऊ ला धिर परमेश्वरे शुद्ध लहसी ततो, दोबि केई अशुद्ध थाह कुड़ु।’

¹⁰ षुमु फेरा ध्यांए ठ्रोह शुई; दंङ दोहथर भत्ते धिर सर्गो हखा रेंज़ा शिलिर।

¹¹ दंङ दोथर ए षुमु मीहरे अंऊ केसरिया शहर च़ि कुरनेलियुस ओ दोरच़ी च़रसी गिऊ कछंङ दुह घरबारंङ पिचे इलिर अंऊर ञेंहरे तोईनि।

¹² दंङ पवित्र आत्माज़ि गिह्बी दोतंङ साते बेझिझक इबिमी थल्जी कुई, दंङ दिहरे त्रुई बिशवासी न्वारे ला गेरंङ साते अच़ा अतिर; दंङ ञेंहरे दुह मीहू चुंङ इलिन।

¹³ दंङ दोई कंङातो, कि गेह इच्च़ा स्वर्गदूता बि घेंङौ चुंङ खड़े तंङातग, अच़ि गिऊ हखा कुहतो, ‘याफा शहरो मीहरे च़रच़ा शमौन बि अतु मिन पतरस ला शुह, बुलाएतुंई।

¹⁴ दोई करंङ साते झांह ठ्रोह गप्पा लोहतो, अतु दोरच़ी परमेश्वर कनिंङ ए कांह खानदानो भत्ते मीहतिंङ बचाएपोतो।’

¹⁵ अंऊ मुक्का गेह गप्पा लेह लेहतिग ता पवित्र आत्मा दोतु टोईच़ी ध्वांए ठ्रोह अति, छना ठ्रोह मुण्डारिंङ ञेंहतु टोईच़ी तक्सा अंदे।

¹⁶ दोथर गिह्बी प्रभु ऊ दुह वचन हिद अति, अंऊ दोई कुहते, ‘यूहन्नाज़ि ता ती रंङ साते बपतिस्मा रेंई, पर केहरे पवित्र आत्माओ दोरच़ी बपतिस्मा खोक्पोन।’

¹⁷ दिऊ थल्जी अपेहल परमेश्वरे दोतिंङ ला दुह ए दान रेंई अंऊ ञेंतिंङ प्रभु यीशु मसीहू टोहकठे बिशवास लहज़िमी दोरच़ी खोकसी तोह; ता गेह अरी तोईगा अंऊ परमेश्वर बि चेहच़े तरच़ातेग?”

¹⁸ दिह रेड्रा दोरे यहुदी बिशवासीर चुपे बंङज़िरी, दंङ परमेश्वरो तारीफ लहज़ा कुट्री लेहतिर, “दंङ ता परमेश्वरे ऊईजाति ऊ मीहतिंङ ला अनंत जीवनो थल्जी एनोह पापो दोरच़ी सेहम किरज़िमी ए यीशु मसीहू टोहकठे बिशवास लहज़िमी दान रांहषी ततो।”

अन्ताकिया शहरंङ शाऊल ए बरनबास

¹⁹ स्तिफनुस ओ हत्या ओ थल, महसे बिशवासी ज़ि सताएतिर दंङ दिऊ थल्जी विशवासी ज़ि यरूशलेम शहर छोड़ेके च़रतिर, दंङ दोरे दरबदर शुहचे फीनीके प्रदेश, साइप्रस द्वीप दंङ सीरिया प्रदेशो अन्ताकिया शहरंङ पिचे इलिर; पर यहुदी मीहतिंङ केट्रा ऊई अतिंङ ला यीशु पाहठी बचन माह सुनाएच़ातेर।

²⁰ पर दोतु बिचंङ च़ि रेह बिशवासी अंऊ यरूशलेम शहरा बि छोड़ेके चरच़ातेर साइप्रस द्वीपा रिंङ बंङज़ा ए कुरेन शहरारिंङ बंङज़ा तोईरे। दोरे सफर लहज़ा अन्ताकिया शहरंङ अंज़े यहुदी ए ऊईजाति मीहतिंङ ला प्रभु यीशु पाहठी रूठे खबर सुनाएची लेहतिर।

²¹ दंङ प्रभु ऊ सामर्थ दोतु टोईच़ी तोहई, दंङ महसे ऊईजाति ऊ मीहज़ी दोतु रूठे खबरो टोईच़ी बिशवास लहरिर दंङ दोरे यीशु मसीहू हखा किरच़ा इलिर।

²² दोथर दोतु चर्चा यरूशलेम शहरो कलीसियाओ मीहतिंङ रेड्रिमी थल्जी अति, दंङ दोच़ी बरनबास अन्ताकिया शहरो हखा च़रतिर।

²³ अपेहल बरनबास दोर्तिंङ पिचे इलि, दंङ दोई ञेंई च़रति कि परमेश्वरे दाह रंङ अन्ताकिया ओ विशवासी तंङ साते व्यवहार लहसी ततो दंङ दुह दि खांई खुश शुचि इलि; दंङ भत्ते तिंङ शिक्षा रेंई कि ध्यान मन रंङ साते प्रभु रिंङ पक्‍का तोंई।

²⁴ बरनबास इच्च़ा रुठे मीह तोहई; दंङ पवित्र आत्मा ए बिशवास रंङ साते परिपूर्ण तोहई; दंङ महसे मीहज़ी प्रभु टोईच़ी विशवास लहरिर।

²⁵ दोथर बरनबास अन्ताकिया शहर केट्रा शाऊल बि पेट्रीमी थल्जी तरसुस शहर ओ हखा अच़ा इलि।

²⁶ दंङ अपेहल दोतंङ साते दोहरी ता दोतिंङ अन्ताकिया शहरो हखा वापिस रैंज़ा हति, दंङ झांह शुई कि शाऊल ए बरनबास इच्च़ा साल तचेक कलीसियाओ मीहतिंङ साते दोहा ए महस मीहतिंङ यीशु मसीहू पाहठी शिक्षा रंड्री लेहतिर, दंङ विशवासी भत्ते बे मुण्डा रिंङ अन्ताकिया शहरंङ ए मसीह कहलाएतिर।

²⁷ दुह ए ध्याड़ो टेमा रिंङ रेह बिशवासीर अरी भविष्यवक्तारे तोईरे, यरूशलेम शहरंङ च़ि अन्ताकिया शहरंङ अतिर।

²⁸ दोतु बिचंङ च़ि अगबुस मिंदंङ इच्च़ा भविष्यवक्ता ज़ि खड़े शुहचे पवित्र आत्माओ दोरच़ी दि कुट्री लेहती, कि भत्ते संसारा रिंङ मोह्ड़े अकाल अपतो, दंङ अगबुसे कुहते दिह हेले शुचि इलि। दुह अकाल महाराजा क्लौदियुस ओ मुक्का अति।

²⁹ दोथर अन्ताकिया ओ विशवासी ज़ि एनोह-एनोह टंगा-ढबाहो हिसाबे यहुदिया प्रदेशंङ बंङज़ा विशवासी तु मदत लहज़िमी फेंसला लहरिर।

³⁰ दंङ दोच़ी ध्यांए लहरिर; दंङ बरनबास ए शाऊल ओ गुहड़िंङ, सेंहणातु कछंङ ढबाह च़रतिर।