2 तीमुथियुस 4 - लाहौली बाइबिल1 अपेहल प्रभु यीशु मसीह इच्च़ा रज्ज़ा ओ ठ्रोह राज लहज़ी अपतो, दुह श्रींङे ए सिए झुल्ला तु फेंसला लोहतो, झांह लेह गेह परमेश्वर ए प्रभु यीशु मसीहऊ हाज़िरी रिंङ दि बिनती लहज़ातग। 2 कि काह परमेश्वरो बचन प्रचार लहज़िमी थल्जी हमेशा तेयार बंङज़ु, मीहच़ी चाहे दि रेड्रोर या माह रेड्रोर। कनिंङ दोतिंङ दि कंड्री ज़रूरी तोह कि दोच़ी छि गलती लहतोर दंङ कांह दोतु पापो थल्जी दोतिंङ रैहचु। पर कनिंङ मीहतिंङ हिम्मत रंड्री जूंशी तोह दंङ कनिंङ धीरज़ा रंङ साते दोतिंङ शिक्षा रंड्री जुंशी तोह। 3 छना कुचे झांह ठ्रोह ध्याड़ा अपतो, कि मीहरे सच्ची शिक्षा माह रेड्रोर, पर दोरे एनोह हिटी ओ हिसाबे जोज़ातोर दंङ दोरे महसे शिक्षा रंड्रातिंङ पेट्रोर अंऊ दोच़ी दुह ए कोहर अंऊ दि मीहच़ी रेड्री जुंज़ातोर। 4 दोरे परमेश्वरो हेले बचन माह रेड्रोर पर बनावटी कथा रे रेड्रोर। 5 पर कांह भत्ते गप्पातिंङ खबरदार बंङज़ु, धीरज़ारंङ दुख सहन लोह दंङ रूठे खबरो प्रचार लोहवा लोह दंङ प्रभु सेवक शुहबिमी रंङ साते केनोह ज़िम्मेवारी पूरा लोह अंऊ प्रभु ज़ि कनिंङ रांहषी ततो। 6 गेह कनिंङ दि हुकुम रंड्रातग, छना कुचे परमेश्वरो थल्जी गिऊ सेवा ए ज़िंदगी योहसी लेहकी तोह, छना कुचे गेह ञेंच़ातग गेह युरनाह सिमी तोतोग। 7 छना इच्च़ा रूठे योद्धा लड़ाईरिंङ हार माह मनेक्च़ा ध्वांए गेह ला प्रभु थल्जी महस मेहनत लहज़ी माह छोड़ेक्च़ातग। गेह मसीहू रांहषी कम पूरा लेह चरच़ातग, गेह प्रभु रिंङ थल मुक्का तचेक वफादार बंङज़ातग। 8 दंङ हेंतेग जीतो दुह मुकुट गिऊ थल्जी रुमज़ा, छना कुचे गेह घेंङौ जीवनो दोरच़ी परमेश्वराबि खुश लहतेग। प्रभु अंऊ धर्मिकताओ कम रंङ साते भत्ते मीहतु न्याय लहज़ा दुह, दुह ध्याड़ा गिह्बी दुह मुकुट रमतो अपेहल न्याय लहज़िमी थल्जी दोबारा अपतो पर दुह गिह्बी ए मशत पर दोतिंङ भत्ते दि ईनाम रमतो अंऊ दोऊ यह्च़ा अपिमी थल्जी रुमज़ा तोतोर। व्यक्तिगत निर्देश 9 तीमुथियुस कांह गिऊ कछंङ युरनाह अपिमी कोशिश लोह। 10 छना कुचे देमासे दि संसारो चीज़ारे प्यारे चेहके गेह छोड़ेके चरच़तो दंङ थिस्लुनीके शहरो हखा अच़ा इलज़ा। क्रेसकेंस ला गलातिया प्रदेशो हखा दंङ तीतुस दलमतिया प्रदेशो हखा अच़ा इलज़ा। 11 सिर्फ लूका ए गेरंङ साते तोह। अपेहल कांह अपोन मरकुसा बि केनाह रंङ साते हता, छना कुचे दुह गिऊ सेवकाई रिंङ देर गिऊ मदत लेह तरपोतो। 12 तुखिकुस बि गेह इफिसुस शहरो हखा चरच़ातग। 13 अपेहल कांह अपोन, दंङ दुह कोट रैंज़ा हता दंङ अंऊ गेह त्रोआस नगरंङ करपुसो चुंङ केट्रा अतिगा। गिऊ कताबर ला रेंज़ा हता, दंङ खासकर छागड़ो च़मो दोरच़ी बणेंके चर्मपत्र रेंज़ा हता। 14 रिओ नंदे बणाएच़ा सिकंदर महस पाहठी गिऊ नुकसान लेह चरच़तो, प्रभु दोबि दोऊ मदम कमो हिसाबे सज़ा रमतो। 15 कांह ला दोरंङ साते खबरदार बंङज़ु, छना कुचे दोई हेंदु शिक्षा ओ महसे विरोध लहते। 16 मुण्डारिंङ अपेहल गेह रोमो कोर्टंङ घेंङौ सफाई रंड्रीमी थल्जी इलिगा, दोहपल गिऊ तरफे कुट्रा अरिला माह तोहई, दंङ भत्तेज़ि गिऊ साथी छोड़ेके च़रतिर। गेह प्रार्थना लहज़ातग कि परमेश्वरे दोतिंङ दि कमो थल्जी माफ लोहतो। 17 पर प्रभु ज़ि गिऊ मदत लहरी दंङ गिह्बी सामर्थ रांई, ताकि गेह यीशु मसीहू पाहठी रूठे खबरो प्रचार रूठे रंङ लहज़िमी जोगे बणेंके तरपोग, दंङ ऊई जातिऊ भत्ते मीहरे दि रेड्री तरपोर; दंङ दोई गेह सिमी दोरच़ी झांह ठ्रोह बचाएके च़रति छना गेह योंञें ब्राघातु दोरच़ी बचाएकतो। 18 प्रभु गिह्बी हर इच्च़ा मदम कमो दोरच़ी बचाएपोतो अंऊ गिऊ नुकसान लहज़ा, दंङ दोई गेह एनोह स्वर्ग राजारिंङ सही-सलामत रैंज़ा शोतो। दोऊ महिमा हमेशा शुहवा लोहतो। अमीन। अंतिम अभिवादन 19 प्रिस्किल्ला ए दोऊ गगसा अक्किला बि, दंङ उनेसिफुरूसो टबरातिंङ गिऊ तरफे नमस्कार। 20 इरास्तुस कुरिन्थुस शहरंङ केह्षा इलज़ा, दंङ त्रुफिमुसाबि गेह मीलेतुस शहर छोड़ेके अतिगा छना कुचे दुह टेहची तोहई। 21 सोई ऊ ध्याड़ा अपिमी तुहई केई अपिमी कोशिश लोह; युबूलुस ए पुदेंस ए लीनुस ए क्लौदिया, दंङ भत्ते विशवासी न्वारेतु तरफे कनिंङ नमस्कार। 22 गेह प्रार्थना लहज़ातग कि प्रभु करंङ साते बंङज़ोतो, दंङ दोऊ मोह्ड़े दाह केहतु टोईच़ी शुहवा लोहतो। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation