2 तीमुथियुस 3 - लाहौली बाइबिल

अंतिम ध्याड़ा रिंङ अधर्म

¹ तीमुथियुस, अंऊ गप्पा गेह करंङ कुट्रातग, दोबि ध्यानारंङ साते रेड्रु कि थल मुखो ध्याड़ारिंङ यीशु मसीहू वापिस अपिमी तुहई महसे खरे टेम अपतो।

² छना कुचे रें मतलबी, शेखीमार, घमण्डी, ऊईतु निन्दा लहज़ा, याह बाह ओ गप्पा माह मनेक्च़ा, धन्यवाद माह लहज़ा ए अपवित्र,

³ दया माह लहज़ार, माफ माह लहज़ार, दोष लगाएच़ा, एनोह हिटी रिंङ काबू माह लहज़ार, डगडगी, भलाई ओ बैरीर,

⁴ विशवासघाती, ढीठ, घमण्डी, या परमेश्वरा रंङ साते दाह माह लहज़ार पर भोगविलास जुंज़ा शोरे।

⁵ दोरे भक्त शुहबिमी दिखावा लोहर, पर दोरे परमेश्वरो दुह शाक्ति माह मनेक्च़ातेर अंऊ दोतिंङ भक्त बणेंके तरपोतो। झांह ठ्रोह मीहतंङ साते मेल-जोल थालंही।

⁶ छना कुचे दितु बिचंङ रें मीहरे झांह ला तोतोर अंऊ मीहतु चुंङ ब्याके यवातोर, दंङ मेच़िमीतिंङ एनोह वशारिंङ लहज़ातोर, अंऊ एनोह पापो दोरच़ी तेपसा भत्ते पाहठी ओ मदम हिटी रिंङ तोह।

⁷ दोरे हमेशा शताह चीज़ारे सिखेक्सा तोर पर मसीह सच्चाई ओ शिक्षा अपेहल ला माह समझेक्तिर।

⁸ दिरे हप्सी शिक्षा रंड्रा सच्चा खबरो विरोध लहज़ातोर, छना यन्नेस ए यम्ब्रेसे मूसा ओ विरोध लहज़ातेर, दितु बुद्धि भ्रष्ट शुहचे इलजी तोह, दंङ दोरे हेले रिंङ मसीहू टोहकठे विशवास माह लहज़ातोर।

⁹ पर दोतु मुर्खता सिर्फ थोड़े ध्याड़ा तचेक दोतु मदत लोहतो। छना कुचे यन्नेस ए यम्ब्रेस ओ ठ्रोह दोतु मुर्खता ला भत्ते मीहतु तुहई ज़ि प्रगट शुहचे योतो।

तीमुथियुस बि खास सलाह

¹⁰ पर हे तीमुथियुस, केई रूठे रंङ ञेंहच़ातन कि गेह छि सिखाक्च़ातग, दंङ छना श्रींङमातग, ज़िंदगी रिंङ गिऊ मकसद छि तोह दंङ गेह छि विशवास लहज़ातग। केई ञेंहच़ातन कि गेह धीरज़ तहज़ातग, दंङ भत्ते मीहतंङ साते दाह लहज़ातग, गेह मुसीबत सहन लाहतेर,

¹¹ मीहच़ी गेह तंग लहरिर, अतु वहज़ा ज़ि गेह महस दुख सहन लहरिग। केतिंङ पता तोह कि अन्ताकिया, इकुनियुम ए लुस्त्रा नगरंङ गिऊ टोईच़ी छना-छना ज़ुल्म शुईरे, तांला दुह भत्ते तु दोरच़ी प्रभु ज़ि गेह हुंज़ी च़रति।

¹² दि गप्पा हेले तोह कि हर इच्च़ा मीह अंऊ परमेश्वराबि खुश लहज़ी जुंज़ा दंङ यीशु मसीहू टोईच़ी विशवास लहज़ा दोबि ऊईतु दोरच़ी सताएपोर।

¹³ पर मदम मीहरे ए धोखेबाज़ मीहरे ऊई ला मदम कम लोहर दोरे मीहतिंङ धोखा रमोर दंङ दोतिंङ ला ऊईज़ि धोखा रमोर।

¹⁴ हे तीमुथियुस, दुह गप्पो टोईच़ी अंऊ केई गिऊ दोरच़ी सीखेसी तातन दंङ अतु टोहकठे केई विशवास लहसी तातन, दोतिंङ काह लगातार विशवास रंङ साते मनेक्च़ा लोह केई ञेंहच़ातन कि कनिंङ दि सच्चाई अच़ि सिखासी शुह।

¹⁵ बाड़े बेहच़ी केई ए पवित्रशास्त्र बि ञेंहच़ातन, अंऊ कनिंङ दि समझेक्सिमी थल्जी मदत लहज़ा कि अपेहल काह यीशु मसीहू टोहकठे विशवास लहज़ातन दंङ परमेश्वर कनिंङ बचाएपोतो।

¹⁶ भत्ते पवित्रशास्त्रो वचन दुह शुह अंऊ दोबि परमेश्वरे मीहतु विचारारंङ केई च़रति अंऊ दोच़ी दुह च़ेहसी शुह। दि मीहतिंङ सिखाच़िमी थल्जी ए, दोतिंङ कंड्रिमी थल्जी कि छिल्ला धिर दोच़ी लहसी शुह, दुह गलत शुह, दोतु गलती ठीक लहज़ी दंङ अंऊ सही तोह दोबि लहज़िमी थल्जी दोतिंङ हुकुम रंड्रीमी थल्जी फायदेमंद तोह।

¹⁷ ताकि परमेश्वरो मीह सिद्ध बड़ेक्पोतो, दंङ हर इच्च़ा रूठे कमो थल्जी तेयार ए काबिल शुहचे बंङज़ोतो।