2 तीमुथियुस 2 - लाहौली बाइबिल

मसीह यीशुऊ मालिकभक्त सेनिक

¹ झांह लेह हे गिऊ योह तीमुथियुस, कांह दुह मोह्ड़े दाह रंङ साते अंऊ यीशु मसीह रंड्रा, बलबंत शुहचे ईल,

² केई गिह्बी महस मीहतु तुहई ज़ि मसीहू पाहठी खबर सिखासी तंङातेन, झांह लेह, गेह जुंज़ातग कि केई ला ऊई विशवासी तिंङ दिए खबर सिखाएतु। अंऊ विशवासो जोगे मीहरे तोतोर, दंङ अंऊ ऊईतिंङ ला दिए सिखाएच़िमी जोगे शोर।

³ यीशु मसीहू रूठे सेनिको ठ्रोह गेरंङ साते दुखो सामना लोह।

⁴ इच्च़ा सेनिक अंऊ सेना रिंङ शवात, दुह एनोह कम ओ छोड़ेके ऊई छल्ले कम माह लहज़ा, छना कुचे दुह एनोह अधिकारी बि खुश लहज़ी जुंज़ा।

⁵ ध्वांए, अपेहल अरिया ऊईतु खिलाप रेसा रिंङ ज़रका रंड्रा, अगर दुह खेलो नियमो भाषे माह लहज़ा, दंङ अच़िला दोबि ईनाम माह रमोर।

⁶ अंऊ मज़दूर मेहनत लहज़ा, फसलो मुन्डो हिस्सा ओ हकदार दुह ए शुह।

⁷ दि उदाहरणो पाहठी सोचेक्तुंई कि दोरे छि सिखाएच़ातोर, दंङ प्रभु केतिंङ दि भत्ते गप्पा समझेक्सिमी थल्जी मदत लोहतो।

⁸ लगातार यीशु मसीहू पाहठी सोचेक्सा लोह, अंऊ रज्ज़ा दाऊदो खानदानो दोरच़ी शुई, दंङ परमेश्वरे दुह सिऊ दोतु बिचंङ श्रींङमी लहरी; दंङ दिए दुह रूठे खबर शुह अंऊ गेह मीहतु बिचंङ प्रचार लहज़ातग।

⁹ दिए रूठे खबरो प्रचार लहज़िमी रंङ साते गेह कैदारिंङ इच्च़ा अपराधी ओ ठ्रोह दुख उठाएच़ातोग। तांला परमेश्वरो बचन प्रचार लहज़िमी रंङ साते अरिला रोकेकी मरपोतो।

¹⁰ दिऊ थल्जी गेह दुह मीहतु थल्जी भत्ते दुख सहन लहज़ातग, अतिंङ परमेश्वरे अंङषी ततो, ताकि दोरे ला यीशु मसीहू टोहकठे विशवास लोहर दंङ उद्धार ए अनंत कालो महिमा खोक्पोर।

¹¹ दि गप्पा कि अगर ञेंरे मसीह रंङ साते सिए इलजी तोतोंई दंङ दोरंङ साते श्रींङमोंई ला।

¹² अगर हेनर दोऊ थल्जी दुख सहन लोहनि ता, दंङ हेनर दोरंङ साते रज्ज़ा ओ ठ्रोह राज ला लोहनि। अगर हेंज़ि कोंई कि ञेंहच़ी मसीह बि माह ञेंहनि दंङ दोई ला कोहतो कि हेनर दोऊ माह शुई।

¹³ दंङ अगर हेनर मसीहू थल्जी वफादार माह बंङज़ोंई, तांला दुह हेंदु थल्जी वफादार बंङज़ोतो दुह हमेशा एनोह स्वभावो हिसाबे कम लहज़ा।

रूठे कारीगर

¹⁴ अंऊ गप्पा गेह कनिंङ सिखाएकातग दुह केनोह मीहतिंङ पेहषी थारोंऊ दंङ परमेश्वराबि इच्च़ा गवाहो रूपारिंङ तहच़ि, कनिंङ दोतिंङ खबरदार लेह जूंशी तोह कि दोरे शब्दो अर्थो थल्जी बहस थाह लोहवा लंहि, झांह ठ्रोह बहस अतु ला मदत माह लहज़ी पर दोतिंङ ऊई ला नुकसान लेह अंऊ दोच़ी दुह रेड्रातोर।

¹⁵ केई सच्चा खबरा बि सिखाच़िमी थल्जी महस मेहनत लोह ताकि परमेश्वरे कनिंङ इच्च़ा झांह ठ्रोह सेवको रूपा रिंङ ग्रहण लोहतो, अंऊ एनोह कमो दोरच़ी शर्मिन्दा माह शवाह।

¹⁶ संसार ए बेकार गप्पो दोरच़ी शत्‌ह बंङज़ु, छना कुचे झांह ठ्रोह गप्पारे मीहतिंङ परमेश्वरो दोरच़ी ऊई ला ऊईतार शिल्ज़िमी वहज़ा बणेंके इबि।

¹⁷ दंङ झांह ठ्रोह गप्पा सुहषी घाहो ठ्रोह फेलेकी इबि, दंङ मीहतु विशवास नाश लेह केट्री अंऊ दितिंङ रेड्रातोर। हुमिनयुस ए फिलेतुस दोतु बिचंङ ज़ि ए तोतोर,

¹⁸ अच़ि सच्चाई रिंङ विशवास लहज़ी छोड़ेके केहतोर दोच़ी कुट्रातोर कि परमेश्वर तुहई ए विशवासी तिंङ अनंत जीवनो थल्जी श्रींङमी लहज़ी केहतो। अतु नतीज़ा दि तोह कि रें विशवासीतिंङ मसीहू टोहकठे विशवास लहज़िमी रंङ साते रोकेक्च़ातोर।

¹⁹ तांला परमेश्वरो मीहतु विशवास पक्‍का मुयांदो ठ्रोह बणेंकी बंङज़ा, दंङ दोऊ टोईच़ी झांह ठ्रोह शब्द च़ेहसी तोतोर, “कि प्रभु ज़ि ञेंहच़ा कि दोऊ मीहरे अरि शुहरे” दंङ दि ला कि “अच़िला परमेश्वरो अराधना लहज़ा दोबि बुराई लेह बंद लहज़ी जूंस।”

²⁰ मोह्ड़े घरबारारिंङ माह सिर्फ ज़ंङ ए मुलतु पर सिङ ए षोह ओ नंदे ला शुहबी; रे नंदे तु इस्तेमाल खास टेमारिंङ लहज़ी, दंङ रे नंदे तु इस्तेमाल हर ध्याड़ो थल्जी लहज़ी।

²¹ ध्वांए अंऊ विशवासी एनाबि दुह भत्ते कमो दोरच़ी शत्‌ह लोहतो, दंङ दुह इच्च़ा खास नंदे ओ ठ्रोह शोतो अंऊ खास टेमारिंङ इस्तेमाल लहज़ी, दंङ दोरे भत्ते पाहठी ओ रूठे कम लेह तरपोंई।

²² दुह मांजी चीज़ा तु दोरच़ी शत्‌ह बंङज़ु अंऊ जवान मीहच़ी लेह जुंज़ातोर अंऊ मीहच़ी शुद्ध सेहमे प्रभु मिन लेहपच़ातोर, दोतंङ साते धर्मिकता, विशवास ए दाह, मेल मिलाप ओ पीछा लोह।

²³ पर मुर्खता ए फालतु गप्पो दोरच़ी शत्‌ह बंङज़ु, छना कुचे केई ञेंहच़ातन, कि दि रंङ झगड़ा पैदा शुहबी।

²⁴ दंङ प्रभु दासबि झगड़ालू शुहबी माह जूंस, पर भत्तेतंङ साते मिलनसार ए सहनशील शुहबी जूंस। दुह परमेश्वरो बचन रूठेरंङ कंड्रा शुहबी जूंस।

²⁵ हेंदिंङ दुह मीहतिंङ नम्रतारंङ साते समझाएक्ची जूंशी तोह अंऊ दोच़ी विरोध लहज़ातोर, झांह शुहबी तरपोतो कि परमेश्वर ए दोतिंङ सच्चाई ञेंहच़ी ए दोऊ हखा किरच़िमी मौका रमतो।

²⁶ दिरे मीहरे यह्च़ा रूठे रंङ सोचेक्सिमी जोगे शोर दंङ शेतानो धोखा ओ दोरच़ी बचेके योर अंऊ कि इच्च़ा जालो ठ्रोह तोह। शेताने दोरे फसाके केहतो ताकि दोतु दोरच़ी दुह लहज़ी लोहतो अंऊ दोई जुंज़ा।