2 तीमुथियुस 1 - लाहौली बाइबिल

नमस्ते

¹ गेह पोलुस अंऊ हेंदु बाह परमेश्वरो तरफे यीशु मसीहू प्रेरित शुगाह, परमेश्वरे गिह्बी च़रति ताकि गेह मीहतिंङ कंज़े तरपोग कि दोई मसीह यीशु रिंङ विशवास लहज़ा तिंङ दि अनंत जीवन रंड्रीमी वाईदा लहसी ततो।

² गेह दि डाक तीमुथियुस बि चेहच़ातग, अंऊ गिऊ थल्जी इच्च़ा योह ठ्रोह तोह। गेह प्रार्थना लहज़ातग कि बाह परमेश्वराबि ए हेंदु प्रभु यीशु मसीह कनिंङ मोह्ड़े दाह कृपा ए शांति रम्मा लोहतो।

धन्यवाद ए प्रोत्साहन

³ अपेहल ला गेह प्रार्थना लहज़ातग, गेह हमेशा कनिंङ हिद लहच़ी कांह थल्जी परमेश्वरो धन्यवाद लहज़ातग। दुह, दुह ए शुह अतु सेवा गेह घेंङौ शुद्ध सोचे लहज़ातग, छना गिऊ बाह-मेमे ज़ि लहज़ातेर।

⁴ गिह्बी हिद तोह कि कांह अंयों क्रपच़ातेन अपेहल गेह कनिंङ छोड़ेके इबि तरेग, दुह हिद लहज़ी गिह्बी करंङ साते दोईमी सेहम लहज़ा, कि गेह खुशी रंङ साते बिंङे योग।

⁵ गिह्बी कनु याह यूनिस ओ सच्चा विशवास हिद तोह। दंङ कनु नानी लोइस ओ विशवास ला ध्वांए तोह, दंङ गिह्बी विशवास तोह कि कांह ला दिए विशवास तोह।

⁶ झांह लेह गेह कनिंङ हिद रंड्रातग कि परमेश्वरो दुह वरदाना तिंङ यह्च़ा इस्तेमाल लोह, अपि परमेश्वरे केतिंङ रांहषी तते अपेहल गेह कांह पुंज़ा रिंङ घेंङौ गुह्ट्र केहतेग।

⁷ दि दिऊ थल्जी शुई कि परमेश्वरे हेंदिंङ डरपोक माह बणाएक्तो, पर दोऊ आत्मा हेंदु सेहम पक्‍का लहज़ा, दंङ हेंदिंङ इदि-अई दिरंङ साते दाह लहच़िमी थल्जी हर हालातरिंङ हेंदिंङ काबू लहच़िमी मदत लहज़ा।

⁸ झांह लेह ऊई मीहतिंङ हेंदु प्रभु यीशु मसीहू पाहठी कंड्रिमी शर्मिन्दा था शुई, दंङ माह ए कनिंङ दि गप्पो दोरच़ी षेहपि जूंस कि गेह परमेश्वरो सेवा लहच़िमी रंङ साते कैदारिंङ तोतोग। पर कनिंङ दुह सामर्थो इस्तेमाल लेह जूंशी तोह अंऊ परमेश्वर कनिंङ रंड्रा, दंङ रूठे खबरो थल्जी गेरंङ साते दुखा रिंङ साथी शुई।

⁹ अच़ि हेंदु उद्धार लहतो, दंङ हेंदिंङ पवित्र जीवन श्रींङमी थल्जी बुलासी शुई, दोई हेंदिंङ दिऊ थल्जी माह बुलाएक्तो कि हेंज़ी रूठे कम लाहतेन पर एनोह मकसद ए दुह मोह्ड़े दाह ओ हिसाबे बुलाएकते, अतु सकिम परमेश्वरे तुहई ए यीशु मसीह बि दि संसारारंङ च़रच़िमी दोरच़ी बणाकते।

¹⁰ पर हेंतेग हेंदु उद्धारकर्ता, प्रभु यीशु मसीह, अच़ा अंजा, दंङ हेंदिंङ एनोह मोह्ड़े दाह कंङातो। दोई सिमी शाक्ति यहरच़े चरच़तो, दंङ रूठे खबरो ज़रिये, हेंदिंङ अनंत जीवनो थल्जी अम कंङातो।

¹¹ परमेश्वर गिह्बी दि रूठे खबरो प्रचारो लहज़िमी थल्जी, प्रेरित बणेक्पिमी थल्जी दंङ गेह ऊई जातिऊ मीहतिंङ उपदेश रंड्रीमी थल्जी अंङे चरच़तो।

¹² दंङ दिऊ थल्जी गेह देर कैदारिंङ दुख उठाएच़ातग छना कुचे गेह मीहतिंङ यीशु मसीहू पाहठी प्रचार लहज़ातग, पर गेह शर्मिन्दा माह शवाहतग। छना कुचे गेह मसीह बि ञेंहच़ातग, अतु टोईच़ी गेह विशवास लहज़ातग, गिह्बी पक्‍का पता तोह कि मसीह दुह ध्याड़ा तचेक अपेहल तचेक दुह वापिस माह अपतो, रूठे खबरो रक्षा लेह तरपोतो अंऊ दोई गिह्बी रांहषी ततो।

¹³ अंऊ सच्चाई ओ शिक्षा केई गिऊ दोरच़ी खोकशातन, दोबि दुह विशवास ए दाह रिंङ, अंऊ यीशु मसीह रिंङ बसेके तोह, केनोह नमूना बणेंके तोह।

¹⁴ दुह सच्चाई ए रूठे खबरो रखवाली लोह, अंऊ रूठे खबरारंङ साते जुड़ेके तोह, पवित्र आत्मो मदतो दोरच़ी कनिंङ रांहषी ततो, अंऊ हेंदु अन्द्रेग बसेके तोह।

¹⁵ केई ञेंहच़ातन कि, आसिया प्रदेशारिंङ बंङज़ा रें विशवासी ज़ि गेह छोड़ेके केहतोर, अंऊर फूगिलुस ए हिरमुगिनेस तोईरे।

¹⁶ उनेसिफुरूसो टबरातु टोहकठे प्रभु दया लोहतो, छना कुचे दुह गेरंङ साते दोहई अति दंङ महस फेरा गिऊ मदत लहतो, दंङ देर जेलारिंङ गेरंङ साते दोईमी थल्जी अपिमी शर्मिन्दा माह शुई।

¹⁷ पर अपेहल दुह रोम शहरारिंङ अति, दंङ दोई मोह्ड़े कोशिश लहज़ी गेह पेट्रीरि दंङ गेरंङ साते दोहरी।

¹⁸ गेह प्रार्थना लहज़ातग कि न्यायो ध्याड़ारिंङ प्रभु उनेसिफुरूस ओ टोहकठे दया लोहतो। केहच़ी केनाच़ि रूठे रंङ ञेंच़ातंई कि दोई इफिसुस शहरारिंङ गिऊ अंयों मदत लहरी।