2 थिस्सलुनीकियों 3 - लाहौली बाइबिल

प्रार्थना लहज़िमी विनती

¹ हे गिऊ प्यारे साथी विशवासी रे, थल मुखंङ ञेंहतु थल्जी प्रार्थना लोहवा लंहि, ताकि ञेंरे युरनाह भत्ते ठाहरीरिंङ प्रभु यीशु मसीहू पाहठी रूठे खबर फैलाके तरपोंई दंङ मीहरे दिऊ टोहकठे ध्वांए विशवास लोहर छना केहच़ी लाहतंई।

² दंङ दि ला प्रार्थना लंहि कि परमेश्वर ञेंहतिंङ महस मदम ए मांजी मीहतंङ साते बचाके तोहतो, छना कुचे महस मीहरे दिऊ टोहकठे विशवास माह लहज़ातोर।

³ पर केरे परमेश्वरो टोहकठे पक्‍का विशवास लेह तरपोंई। दोई केरे पक्‍का लोहतो दंङ केहतु रक्षा लोहतो ताकि मांजी शेतान केहतु नुकसान लेह मरपोतो।

⁴ दंङ ञेंतिंङ प्रभुरिंङ केहतु टोहकठे भरोसा तोह, कि अंऊ-अंऊ आज्ञा ञेंहच़ी केतिंङ रंड्रातंई, दोतिंङ केहच़ी मनेक्च़ातंई, दंङ मनेक्च़ा ला लोहनि।

⁵ ञेंहच़ी प्रार्थना लहज़ातंई कि प्रभु यीशु मसीह केतिंङ दि समझाएक्च़िमी जोगे बणाएपोतो कि परमेश्वर केतंङ साते छिठ्रो घटे दाह लहज़ा, दंङ केरे सताव बि ध्वांए सहन लंहि छना मसीह सहन लहतो।

कम लहज़िमी ज़िम्मेवारी

⁶ हे गिऊ प्यारे साथी विशवासी रे, ञेंहच़ी केतिंङ दुह अधिकारे हुकुम रंड्रातंई अंऊ हेंदिंङ प्रभु यीशु मसीह रांहषी ततो, कि हर इच्च़ा झांह ठ्रोह साथी विशवासी ओ दोरच़ी शत्‌ह बंङज़ुंई, अंऊ सुस्तीरिंङ बंङज़ातोर, दंङ अंऊ दुह, दुह हुकुमो भाषे माह लहज़ा अंऊ दुह ञेंहच़ी केतिंङ सिखाएकातेंई।

⁷ केहच़ी केनाच़ि ए रूठे रंङ ञेंच़ातंई कि केतिंङ ध्यांए ठ्रोह श्रींङमी जूंस। छना ञेंरे श्रींङमातेंई, छना कुचे अपेहल ञेंरे केहतु बिचंङ तोईनी दंङ ञेंरे सुस्त माह तोहनी।

⁸ केहच़ी अतुआ दोर मुफ्तारिंङ रोटी थाजेंई, पर महस मेहनत लहज़ा रात-दिन कम लहज़ातंई ताकि ञेंरे हेंदु ज़रुरतो थल्जी केहतु टोहकठे केहतु भार शुहबी मेस।

⁹ झांह माह कि केहतु दोरच़ी मदत लेहपच़ी ञेंहतु अधिकार माह तोहई; पर दिऊ थल्जी कि एनाबि केहतु थल्जी इच्च़ा नमूना बणाएपोर, कि केरे ञेंहतु ठ्रोह चाल ज़ोई।

¹⁰ अपेहल ञेंरे केतंङ साते तोहनि दंङ ञेंहच़ी केतिंङ इच्च़ा हुकुम रंदे, अगर अरिया छा कम लहज़िमी थल्जी इन्कार लोहतो दंङ दोबि छल्ले बगत रंड्री मेस।

¹¹ ञेंहच़ी थाशातंई कि, कि रें मीहरे केहतु बिचंङ सुस्त चाल ज़ोवातोर, दंङ छिल्ला कम माह लहज़ातोर, पर दोरे लगातार ऊईतु कमरिंङ दखलंदाज़ी लहज़ातोर।

¹² झांह ठ्रोह मीहतिंङ ञेंरे प्रभु यीशु मसीहू अधिकार रिंङ हुकुम रंड्रा समझाच़ातोंई, कि दोरे शांति रंङ साते कम लहज़ा एनोह मेहनतो रोटी ज़ोवा लंहि।

¹³ हे गिऊ प्यारे साथी विशवासी रे, केरे भलाई लहज़िमी थल्जी हिम्मत था छोडे़क्तेंई।

¹⁴ दंङ अरिया हेंदु दि डाको हुकुम माह मनेक्च़ा दंङ दुह मीहू पाहठी भत्तेतिंङ कंड्रुंई दंङ दोरंङ साते संगति थालंही, ताकि दोबि शर्मिन्दगी महसूस शुहबी जूंस।

¹⁵ दोरंङ साते झांह ठ्रोह व्यवहार थालंही कि दुह केहतु बैरी शुह। पर इच्च़ा विशवासी न्वा चेहके दुह समझाएक्तुंई।

अंतिम नमस्कार

¹⁶ गेह प्रार्थना लहज़ातग कि प्रभु अंऊ शांति ऊ सोता तोह दोई केतिंङ हर टेम ए भत्ते तरीका रंङ साते शांति रमतो। दंङ प्रभु केतंङ साते हमेशा बंङज़ोतो।

¹⁷ गेह पोलुस, घेंङौ गुह्ट्रे केतिंङ नमस्कार चेहच़ातग। गेह घेंङौ भत्ते डाकारिंङ थल मुखंङ दिए तरीकारिंङ चेहच़ातग, ताकि भत्ते तिंङ पता लेहपि जूंस कि दि डाक गिऊ दोरच़ी शुह।

¹⁸ गेह प्रार्थना लहज़ातग कि हेंदु प्रभु यीशु मसीहू मोह्ड़े दाह केतंङ भत्तेतंङ साते हमेशा शुहवा लोहतो।