2 थिस्सलुनीकियों 2 - लाहौली बाइबिल

पापो मीह मतलब विनाशो योह

¹ हे गिऊ प्यारे साथी विशवासी रे, ञेंरे हेंदु प्रभु यीशु मसीहू यह्च़ा वापिस अपिमी पाहठी ए दंङ दुह ध्याड़ो पाहठी चेहच़ातंई, अपेहल हेनर ठ्रोहका शुहचे दोरंङ दोओनि।

² केरे अचानक केनातु दिमाग ए अरिया भविष्यवाणी, छा उपदेश या झांह ठ्रोह डाक रें दुखी शुहबी थारांई अंऊ ञेंहतु तरफे च़ेहसी समझेक्च़ातंई दंङ अंऊर दि तरीका रंङ कांहषी तोह कि प्रभु यीशु वापिस अपिमी ध्याड़ा अच़ा अंजा, केरे बेइनि था।

³ दि गप्पो पाहठी अंऊ रीतिरंङ साते अतुआ धोखा रिंङ थादेंई। छना कुचे प्रभु यीशु मसीहू यह्च़ा वापिस अपिमी बे तुहई, इच्च़ा ध्याड़ा अपतो अपेहल महस मीहच़ी परमेश्वरो विरोध लोहर। “दंङ दुह मदम मीह अपतो अतु नाश शुहबी ज़रूरी तोह।”

⁴ दुह परमेश्वरो ए दुह भत्ते हप्सी भगवानो ए ऊई ला महस चीज़ा तु विरोध लोहतो अंऊ दोतु मीहच़ी अराधना लहज़ातोर, दंङ दोई एनाबि दुह भत्ते तिंङ बे मोह्ड़े शोतो। देर तचेक कि दुह मदम मीह एनाबि परमेश्वरो मंदिरंङ बंङज़ा एनाबि परमेश्वर शुहबिमी दावा लोहतो।

⁵ दि पेषेंई था कि गेह केहतु बिचंङ बंङज़ा दि गप्पारे केतिंङ कंड्रातेग।

⁶ दू मांजी हेंतेग तचेक प्रगट शुहचे माह छना कुचे झांह तोह अच़ि हेंतेग तचेक दोबि रोकेकी ततो। केतिंङ पक्‍का हिद शोतो दू छि तोह अच़ि दोबि रोकेकी ततो, दंङ अपेहल परमेश्वर दोरच़ी ठहरासी सही टेम अपतो, दोहपल दू मांजी दू प्रगट शोतो।

⁷ छना कुचे दुह मदम मीह शाक्ति संसारारिंङ हेंतेग ला कम लहज़ा, पर अरिया तोह अच़ि दुह रोकेकी ततो, दंङ अपेहल तचेक दुह ऊईतार माह योतो, दोई लगातार दुह रोकेगी तोहतो।

⁸ दिऊ थल दुह मदम मीह प्रगट शोतो, अतिंङ प्रभु यीशु एनोह हुकुम ए एनोह अपिमी महिमा ओ छंङी रंङ साते दुह मदम मीह बि सच़ी च़रपोतो।

⁹ दुह मदम मीह शेतानो शाक्ति रंङ साते अपा। दोई भत्ते पाहठी ऊ हप्सी चमत्कार, चिन्ह ए अद्धभुत कम लोहतो अतंङ मीहरे दि सोचेकपोर कि दि कम परमेश्वर लहज़ी लेहकी तोह।

¹⁰ दोई भत्ते पाहठी मदम कम लोहतो दंङ दुह मीहतिंङ धोखा रमतो अंऊ परमेश्वरो दोरच़ी नाश शोर, छना कुचे दोर दुह सच्चाई ऊ टोहकठे विशवास लहज़िमी रंङ साते इन्कार लहज़ातोर अंऊ दोतिंङ बचाके तरच़ा।

¹¹ दंङ दि वहज़ा ज़ि परमेश्वर दोतिंङ इच्च़ा झांह शक्तिशाली भम्र च़रपोतो अंऊ दोतिंङ सच्चाई दोरच़ी ऊईतार रेंज़ा शोतो ताकि दुह मांजी दोऊ गप्पा रिंङ विशवास लेह तरपोतो।

¹² अतु नतीज़ा दि तोह कि भत्ते मीहरे अंऊ दोच़ी पाप लेह पसन्द लहज़ातोर दंङ सच्चाई ऊ टोहकठे विशवास माह लहज़ातोर, दोरे परमेश्वरो दोरच़ी सज़ा खोकपोरे।

मज़बूत बंङज़ुंई

¹³ हे गिऊ प्यारे साथी विशवासी रे, हेंदिंङ हमेशा परमेश्वरो धन्यवाद लेह जुंशी तोह, छना कुचे परमेश्वरे केतंङ साते दाह लहज़ा। परमेश्वरे संसारो रचना बे तुहई केतिंङ अंङे चरच़तो ताकि केतिंङ बचाके तरपोतो केरे यीशु मसीहू पाहठी सच्चा खबरो टोईच़ी विशवास लहज़िमी दंङ दोऊ पवित्र आत्मा दोरच़ी पवित्र बणेषिमी थल्जी अंङषी ततो।

¹⁴ परमेश्वरे केरे बचाएच़िमी रूठे खबरो थल्जी बुलासी ततो, अतु ञेंहच़ी केहतु बिचंङ प्रचार लहज़ातंई, ताकि केरे दुह महिमारिंङ शामिल शुहचे तरपोंई अंऊ परमेश्वरे हेंदु प्रभु यीशु मसीह बि रांहषी ततो।

¹⁵ झांह लेह हे गिऊ प्‍यारे साथी विशवासी रे, खड़े बंङज़ुंई, दंङ दुह गप्पातु टोहकठे विशवास लोहवा लंहि, अंऊ ञेंहच़ी केतंङ साते बंङज़ा या डाको दोरच़ी केतिंङ सिखाएक्तुंई।

¹⁶ ञेंहच़ी हेंदु प्रभु यीशु मसीहू हखा, दंङ हेंदु बाह परमेश्वरो हखा, अच़ि हेंदंङ साते दाह लहज़ा, दंङ अच़ि एनोह मोह्ड़े दाह रंङ साते अनंत उम्मीद रांहषी ततो,

¹⁷ दि प्रार्थना लहज़ातंई कि दोई केहतु सेहमरिंङ हिम्मत रमतो दंङ हर रूठे गप्पारिंङ अंऊ केहच़ी कुट्रातंई केतिंङ पक्‍का लोहतो।