2 पतरस 3 - लाहौली बाइबिल

प्रभु अपिमी ध्याड़ा

¹ हे गिऊ प्यारे साथी विशवासी रे, एंतेग गेह केतिंङ दि दूसरी पत्री चेहच़ातग, गेह केतिंङ दि झुल्ला पत्री दिऊ थल्जी च़ेहसी तातग कि ताकि अंऊ गप्पारे केहच़ी तुहई बेहच़ी ञेंच़ातंई कि, दोतु पाहठी केतिंङ हिद दिलाएच़िमी दोरच़ी गेह केहतु सेहमरिंङ शुद्ध विचार पैदा लेह तरपोग।

² गेह दि दिऊ थल्जी लहज़ातग, छना कुचे गेह जुंज़ातग कि केहच़ी दुह बचन हिद तंही, अंऊ परमेश्वरो भविष्यवक्ता ज़ि महस तुहई बेहच़ी कुहषी ताहरेर दंङ उद्धारकर्ता हेंदु प्रभु यीशु मसीहू शिक्षा हिद तंही अंऊ केतिंङ दुह प्रेरिता ज़ि शिक्षा रांहषी तातोर अंऊ केहतु कछंङ अंज़े तोईरे।

³ भत्ते बे तुहई खास गप्पा दिह तोह कि दंङ अन्तिम ध्याड़ा बे ठीक तुहई, रेह झांह ठ्रोह मीह तंङफोर अतु जीवन दोतु मदम हिटी ऊ वशारिंङ तोह। दोरे दोऊ कछंङ अपिमी विचारो मज़ाक लोहर।

⁴ दंङ दोच़ी कोहर, “दोऊ अपिमी वाईदा हेले माह! दुह अपेहल ला माह अपतो, छना कुचे अपेहल बे मसीह अगुवार सिए इलोर, अंऊ महसे तुहई बंङज़ातेर, दोहपल बेहच़ी भत्ते धिर ध्वांए तोह। चीज़ारे ध्वांए तोतोर छना दोरे हमेशा तोईरे अपेहल बेहच़ी परमेश्वरे संसारो रचना लहरी।”

⁵ दोरे ञेंई ते दिह गप्पा नज़रअंदाज़ लहज़ातोर कि संसारो शुरूआत बेहच़ी, परमेश्वरे कुई दंङ सर्ग बणेंके इलि। एनोह बचनो दोरच़ी एनोह धरती तिऊ दोरच़ी शत्‌ह लहरी दंङ तिऊ दोरच़ी कारची धरती धकतेखा हति।

⁶ दि तिऊ दोरच़ी दोई दुह संसार नाश लेह च़रति अंऊ दुह मुक्का हेले रिंङ तोहई। दोई इच्च़ा महस संदाण च़रति दंङ दुह संदाण धरती ओ टोईच़ी डढ रैंज़ा हति दंङ भत्ते श्रींङी जीवा तिंङ नाश लेह च़रति।

⁷ छना ठ्रोह परमेश्वरे दिह संसारो भत्ते तिंङ हुकुम रंदे, ध्वांए ठ्रोह दोई हुकुम रांहषी ततो कि तुहई कि संसार दोहपल तचेक बणेंके बंङज़ोतो अपेहल तचेक कि मेह रंङ रोह्चे माह केट्रा। दुह दोतिंङ दुह ध्याड़ा तचेक तहज़ा अपेहल दुह भत्ते मीहतु न्याय लोहतो दंङ अधर्मी मीहतु नाश लेह च़रपोतो।

⁸ हे गिऊ प्यारे साथी विशवासी रे, दिह इच्च़ा गप्पा बि अपेहला था पेषेंई कि परमेश्वरो थल्जी इच्च़ा ध्याड़ा इच्च़ा हज़ार सालो बराबर तोह, दोऊ थल्जी इच्च़ा ध्याड़ा ए इच्च़ा हज़ार साल बराबर तोह।

⁹ रें मीहच़ी चेहच़ातोर कि प्रभु एनोह यह्च़ा वापिस अपिमी वाईदा ओ पाहठी ख्राह लहज़ी लेहकी तोह, बल्कि, दुह केतंङ साते धीरज़ तहज़ा तोह। छना कुचे दुह अतिंङ ला नाश लेह माह जुंज़ा। पर प्रभु ज़ि जुंज़ा कि हर इच्च़ा एनोह सेहम किरज़ु दंङ गलत कम लेह बन्द लेह केहतो दंङ दोऊ कछंङ अच़ा अपतो।

¹⁰ पर मसीह हेले रिंङ वापिस अपतो। दुह अचानक ए अपतो, छना अरिया चोर अचानक ए अच़ा आपत। दुह मुक्का सर्गंङ गड़गड़ो सग शोतो, दंङ सर्ग ब्याके शुहचे योतो। सर्गा रिंङ भत्ते धिर मतलब ऐके, लचंङ ए कर रोह्षा योर। दुह मुक्का परमेश्वर दुह भत्ते कम प्रगट लेह च़रपोतो अंऊ मीहच़ी लहसी तातोर ताकि दोतु न्याय लेह तरपोतो।

¹¹ दि पक्‍का तोह कि परमेश्वर भत्ते चीज़ा तिंङ झांह ठ्रोह नाश लेह च़रपोतो, दंङ केरे पक्‍का रूपा रिंङ ञेंच़ातोंई कि केतिंङ छना ठ्रोह व्यवहार लेह जूंशी तोह दंङ छिल्ला केहच़ी लहज़ातंई दोरिंङ परमेश्वरा बि खुश लंहि।

¹² छना कि केरे दुह ध्याड़ा बि रुमज़ा तोतोंई अपेहल परमेश्वर संसारो न्याय लहज़िमी थल्जी अपतो, दंङ दुह ध्याड़ो युरनाह अपिमी थल्जी केनातु तरफे पुरे कोशिश लंहि। दुह ध्याड़ा, मेह भड़केगी योतो दंङ सर्गा बि नाश लेह च़रपोतो, दंङ दोऊ ठ्रोत सर्गा रिंङ भत्ते धिर रोह्चे च़रपोतो।

¹³ पर ञेंहच़ी उम्मीद लहज़ातंई कि परमेश्वर इच्च़ा खरकोई सर्ग ए खरकोई धरती बणाएपोतो छना दोई वाईदा लहसी तते। दोर सिर्फ धर्मी मीहरे ए बंङज़ोर।

चेहके बंङज़ुंई ए तेयार बंङज़ुंई

¹⁴ झांह लेह हे गिऊ प्यारे साथी विशवासी रे, अपेहल कि केरे दुह ध्याड़ा रूमज़ा तोतोंई अपेहल परमेश्वरे संसारो न्याय लोहतो दंङ केतिंङ पूरे कोशिश लहज़ी जूंशी तोह ताकि दोई केतिंङ शुद्ध ए दोष मेह शांति रंङ साते एनाह रंङ साते खोकपोतो।

¹⁵ दि ञेंए च़रतुंई कि हेंदु प्रभु हेंदु थल्जी धीरज़ तहज़ा बंङज़ा, दोऊ वहज़ा दि तोह कि दुह मीहतिंङ पश्चाताप लहज़िमी टेम रंड्रा ताकि दुह दोतिंङ बचाके तरपोतो। अपेहल हेंदु साथी विशवासी पोलुसे, केतिंङ दुह ज्ञानो इस्तेमाल लहज़ी च़ेआतो अंऊ परमेश्वरे दोबि रांहषी ततो, दंङ दोई ला केतिंङ दिए गप्पा कंङातो, अंऊ गेह केतिंङ कंङातग।

¹⁶ घेंङौ भत्ते पत्री तिंङ अंऊ गेह विशवासी तिंङ च़ेहसी तातग, दोई ध्यांए ठ्रोह गप्पा च़ेहसा। पर रे गप्पा अंऊ दोई एनोह पत्री रिंङ च़ेहसी ततो, दोतिंङ समझाएसी खरे तोह। अंऊ मीहच़ी रूठे शिक्षा खोकसी माह तातोर। दंङ अंऊ दोतिंङ दि पक्‍का माह कि दोच़ी छि विशवास लहज़ातोर, दोरे दि खरे गप्पो वर्णन गलत तरीका रंङ साते लहज़ातोर। झांह लहज़ी दोरे परमेश्वरो दोरच़ी एनोह नाश शुहबिमी वहज़ा शुहचे यवातोर।

¹⁷ झांह लेह हे गिऊ प्यारे साथी विशवासी रे, केहच़ी तुहई बेहच़ी ञेंच़ातंई कि दि गप्पारे शोर। झांह लेह, खबरदार बंङज़ुंई ताकि अंऊ मीहरे नियम माह मनेक्च़ातेर दोरे केतंङ साते हप्सी कुचे केतिंङ भटकागी च़रपोर दंङ केरे हेले गप्पा रिंङ विशवास लेह बन्द लेह च़रपोंई अंऊ दोऊ टोईच़ी केहच़ी इच्च़ा टेम पक्‍का रंङ विशवास लहज़ातंई।

¹⁸ पर केतिंङ हेंदु प्रभु ए उद्धारकर्ता यीशु मसीहू मोह्ड़े दाह बि ऊई महसे बे महसे महसूस लेह जूंशी तोह, दंङ दोऊ थल्जी हेंदु समझा रिंङ बढ़ेक्पि जूंशी तोह। दोऊ महिमा हेंतेग हमेशा थल्जी शुहबी जूंस। अमीन।