2 पतरस 2 - लाहौली बाइबिल

हप्साड़ शिक्षक

¹ महस टेम तुहई, छना इस्राएली मीहतु बिचंङ हप्सी भविष्यवक्ता तोईरे, ध्वांए ठ्रोह केहतु बिचंङ हप्सी शिक्षा रंड्रा ला शोरे। दोरे सूले-सूले केहतु कलीसिया रिंङ अपि शुरू लोहर दंङ परमेश्वरो पाहठी केतंङ साते नुकसान लहज़ा ठ्रोह हप्सी शिक्षा बि कोहर। देर तचेक कि दोरे मसीह बि एनोह प्रभु रूपा रिंङ मनेकच़िमी रंङ साते इन्कार लेह च़रपोर अच़ि दोतिंङ पापो दोरच़ी आज़ाद लहरी। छना कुचे दोच़ी झांह लहज़ातोर, झांह लेह दोरे एनोह टोईच़ी अचानक विनाश हपातेर।

² परमेश्वरो महसे मीहरे दि उपदेशका तु मदम कमो नकल लोहर, दंङ छिल्ला दोच़ी लहज़ातोर दोऊ वहज़ा ज़ि मीहरे सच्चाई अमो पाहठी मदम-मदम गप्पा लोहर।

³ दि उपदेश रंड्रा दिरे लालची शोर, दंङ दोरे बणाएषी ठ्रोह कथा कुचे केतिंङ धोखा रमोर ताकि केहतु दोरच़ी ढबाह कमाके तरपोर। परमेश्वरे महसे टेम तुहई ए दि फेंसला लेह चरच़ाते कि दुह दोतिंङ सज़ा रमतो दंङ दुह झांह लहज़िमी थल्जी तेयार तोह। दुह हेले रिंङ दोतिंङ नाश लेह च़रपोतो।

हप्सी उपदेशका तु न्याय

⁴ केहच़ी ञेंहच़ातंई कि महस टेम तुहई अपेहल रे स्वर्गदूता ज़ि परमेश्वरो हुकुमो भाषे माह लहरिर, दंङ परमेश्वरे दोतिंङ दोतु लहसी कमो सज़ा रांई, दोई दोतिंङ नरकारिंङ छङें च़रति दंङ दोतिंङ हंयार कैदारिंङ दुह ध्याड़ा तचेक तहरि अपेहल कि दोई दोतु फेंसला लोहतो दंङ दोतिंङ सज़ा रमतो।

⁵ केहच़ी दि ला ञेंहच़ातंई कि अपेहल महसे तुहई बंङज़ा मीहच़ी परमेश्वरो बेह्द माह चेहतिर दंङ दोई दुह मदम कम नज़र अंदाज माह लहरी अंऊ दोच़ी लहज़ातेर। बल्कि दोई भत्ते संसारा रिंङ ती चरच़े परमेश्वरे झांह ठ्रोह सज़ा रांई कि दोरे भत्तेर नाश शुहचे इलिर। पर दोई नूह ए दुह निह्ज़ी मीहतिंङ बचाके च़रति, अंऊ दोच़ी परमेश्वरो थल्जी सही शुहबिमी थल्जी प्रचार लाहतेर।

⁶ परमेश्वरे सदोम ए अमोरा शहरा बि सज़ा रेंई, दंङ दोतिंङ झांह ठ्रोह भस्म लहज़ी च़रति कि दोरे मेह लेहकी भस्म शुहचे इलिर। परमेश्वरे दुह मीहतिंङ खबरदार लहज़िमी थल्जी झांह लहरी, अंऊ तुंखा अंजा टेमारिंङ दोऊ बेह्द माह चेहच़ातेर।

⁷ पर सदोम ओ विनाश लहज़िमी बे तुहई, परमेश्वरे लूता बि अंऊ इच्च़ा धर्मी मीह तोहई, शहरो दोरच़ी हुंच़ी च़रति दंङ झांह ठ्रोह दोबि बचाके च़रति। लूत महस परेशान तोहई छना कुचे सदोमो मीहरे अंऊ ला कानूनो भाषे माह लहज़ातेर दंङ षेह्द अपिमी जोगे कम लहज़ातेर।

⁸ लूत इच्च़ा धर्मी गंङमी तोहई, पर दुह हर ध्याड़ा मदम मीहतंङ साते बंङज़ाते, दंङ दोऊ मदम खंड्राते ए रेड्राते। झांह लेह दोऊ रूठे सेहम मदम कमो थल्जी दुखी शवाते।

⁹ अपेहल कि प्रभु ज़ि दि भत्ते चीज़ लहरी, दंङ दिऊ दोरच़ी पता लेहपा कि दोई ञेंहच़ा कि ईश्वरीय मीहतिंङ दोतु दुखो दोरच़ी छना छुड़ाएपोंई, दंङ छना मदम मीहतिंङ न्यायो ध्याड़ा तचेक रोज सज़ा रंड्री तोह।

¹⁰ परमेश्वर दुह हप्सी उपदेश का तिंङ पक्‍का सज़ा रमतो अंऊ एनोह मदम हिटी ओ दोरच़ी कम लहज़ातोर दंङ अंऊ एनोह टोईच़ी परमेश्वरो अधिकार बि इन्कार लहज़ातोर, दोरे ढीठ ए घमण्डी तोतोर। दोरे महिमामय स्वर्गीय जीवा तु पाहठी बुराई लहज़िमी रंङ साते माह बेवातोर।

¹¹ स्वर्गदूता तु पाहठी विचार लंहि। दोरे हप्सी शिक्षा रंड्रा बे महस शाक्तिशाली तोतोर। पर अपेहल दोरे परमेश्वरो हाज़िरी रिंङ दि शिक्षाओ टोईच़ी दोष लगाएच़ातोर दंङ दोतु अपमान माह लोहर।

हप्सी शिक्षा रंड्रा दोतु बुराई

¹² पर दिरे शिक्षक घ्वांणातु ठ्रोह कम लहज़ातोर, अंऊ छना लहज़ातोर छना दोतु फुके जुंज़ा दंङ अंऊ दिऊ थल्जी ज़ेहक्पातोर ताकि मीहरे दोतिंङ फसाके सच़ी तरपोर। दि शिक्षक दुह चीज़ा तु अपमान लहज़ातोर अतु पाहठी दोच़ी हेले रिंङ छल्ले माह ञेंहच़ातोर। परमेश्वर दोतिंङ ध्वांए नाश लेह च़रपोतो छना मीहरे जानवरा तिंङ सचे चरच़ातोर।

¹³ दोतु विनाश दुह नुकसानो प्रतिफल शुह अंऊ दोच़ी लहसी शुह। दोरे दिन दोहपर भोग-विलास रिंङ बंङज़ी रूठे चेहच़ातोर। दोरे केहतु बिचंङ इच्च़ा कलंक ए दाग तोतोर। धोखा रंड्री रंङ खुशी मनेक्च़ातेर, अपेहल कि दोरे केतंङ साते ज़ोवा-तुंङमातोर।

¹⁴ दोरे हर इच्च़ा मेच़िमी रंङ साते कुकम लेह जुंज़ातोर, अतिंङ दोच़ी खंड्रातोर। दोरे पाप लहज़िमी मुक्का अपेहल ला माह छोड़ेक्च़ातोर। दोरे दुह मीहतिंङ धोखा रंड्रातोर अंऊ मसीहू टोईच़ी पक्‍का रंङ विशवास माह लहज़ातोर, दंङ दोरे दोतिंङ पापो हखा रैंज़ा शिलज़ातोर। दोतु महस बे महस चीज़ारे खोकच़िमी थल्जी हमेशा बढेक्च़ा लालचो वहज़ा ज़ि परमेश्वर दोतिंङ सज़ा रमतो।

¹⁵ दोच़ी रूठे कम लेह बन्द लहज़ी केहषी तोह, दंङ दोच़ी ध्वांए ठ्रोह कम लहज़ी शुरू लेह केहषी तोह, अंऊ कि बओरो ओ योह बिलामे महसे तुहई लहसी तहरे। दोई गलत कम लहज़ी ढबाह कमाएच़िमी पसन्द लहरी।

¹⁶ पर परमेश्वरे बिलाम बि दोऊ मदम कमो थल्जी दोऊ करेटी ओ दोरच़ी फटकार लगाएती। चाहे करेटी ज़ि कुट्री ए माह पर दुह करेटी बिलामो हखा इच्च़ा मीहू ठ्रोह गप्पा लहज़ी लेहती, अपेहल दुह बिलाम बि रज्ज़ा रंङ साते दोईमी थल्जी लादेगी शिलज़ी लेहकी तोहई, दंङ दोई दुह मुक्का परमेश्वरो खबर रंड्रा बिलामा बि बेवकूफी ओ कम लहज़िमी दोरच़ी रोकेकी च़रति।

¹⁷ दि हप्सी शिक्षा रंड्रा दुह तिऊ बाबड़ी ठ्रोह तोतोर, अंऊ करचे इलजे तोतोर। दोरे डुह ठ्रोह बेकार तोतोर, अंऊ दोतिंङ तेज लहन ज़ि करचे शिलज़ा, दिबे तुहई कि संदाण शोतो। परमेश्वरे दोतु थल्जी इच्च़ा झांह ठ्रोह ठहरि तेयार लहसी ततो अंऊ बिल्कुल ए हंयार तोह।

हप्सी शिक्षा रंड्रातु धोखा

¹⁸ अपेहल दोरे मीहतिंङ धोखा रंड्रातोर, दंङ दोरे शुह्के ए घमण्डो शब्दा तु इस्तेमाल लहज़ातोर। दोच़ी मीहतिंङ कंड्रातोर कि दोच़ी दुह षेह्द अपिमी जोगे कम लेह तरच़ातोर अंऊ दोतु फुक लेह जुंज़ा दंङ दोरे दुह मीहतिंङ यह्च़ा पाप लहज़िमी थल्जी भरमाके केट्रातोर, अंऊ हेंतेग-हेंतेग झांह ठ्रोह मदम कमो दोरच़ी बचेके हुंच़ा तोतोर।

¹⁹ दोरे मीहतंङ साते वाईदा लहज़ातोर कि अगर दोच़ी दोरे हिद लोहर, दंङ दोच़ी छि जुंज़ातोर दोच़ी लहज़ी तरपोर छना कुचे दोतु अरिला मालिक माह। पर सच्चाई दि तोह कि दोरे एनाह ला एनोह मदम रिति रिवाज़ो गुलाम तोतोर। छना कुचे अरिला अंऊ ला चीज़ो आदि शवाह, दोबि अंऊ दोई लहज़ा दोऊ ए दोरच़ी गुलाम बणाके केट्रातोर।

²⁰ मीहरे संसारो बुराई दोरच़ी हुंच़ा इलिर अपेहल दोच़ी यीशु मसीह बि एनोह प्रभु ए उद्धारकर्ता ओ रूपा रिंङ ग्रहण लहरिर। पर हेंतेग यह्च़ा इच्च़ा फेरा बुराई रिंङ शुरू शुहचे इलजी तोतोर दंङ मदम कम दोतिंङ एनोह हिसाबे लेह चरच़तो, झांह लेह हेंतेग मसीह बि अस्वीकार लहज़िमी थल दोतु अंतिम दशा दोतु विशवासी शुहबी रंङ साते बे तुहई कि दशा बेहच़ी खराब शुहचे इलि।

²¹ गिऊ मतलब दि तोह, कि परमेश्वर दुह मीहतिंङ महसे सज़ा रमतो अंऊ मसीहू अम बि छोड़ेके चरच़ातोर बजाए दोतु अंऊ दोच़ी दोबि अपेहला ग्रहण ए माह लहरिर। दोतु थल्जी दि ठीक शुचंङ दोच़ी अपेहला दि ञेंए माह कि एनोह जीवना बि धर्मी तरीका रंङ श्रींङमी थल्जी छि लोहर। एंतेग दोच़ी ञेंहच़ातोर कि सही छि तोह पर दोच़ी परमेश्वरो दुह हुकुम मनेक्च़िमी रंङ साते इंकार लाहतोर अंऊ हेनर, प्रेरिता ज़ि दोतिंङ सिखाएकातेंई।

²² दोतंङ साते छि शवाह दुह तंङफा कि दि कहावत हेले शुह: कि दोरे खुह्ई तु ठ्रोह तोतोर अंऊ एनोह प्रान्ज़ि दुह आहच़ि थल्जी यहच़ातोर, दंङ दोरे सुअरा तु ठ्रोह तोतोर अतिंङ शुहल्ज़े चरच़ि दंङ दुह यह्च़ा गाहरो बिचंङ फेह्टे शुहबी।