2 पतरस 1 - लाहौली बाइबिल

नमस्कार

¹ गेह, शमौन पतरस, अंऊ यीशु मसीहऊ दास ए प्रेरित शुगाह, केतिंङ चेहच़ातग। गेह केहतु भत्ते तु थल्जी चेहच़ातग। अंऊ दुह बहुमूल्य विशवास बि ठ्रोहका लहज़ातंई अंऊ हेंदु परमेश्वर ए उद्धार लहज़ा यीशु मसीहू दोरच़ी हेंदिंङ रांहषी तोह, अंऊ हेंदिंङ परमेश्वरा रंङ साते धर्मी ठहराच़ा।

² गेह प्रार्थना लहज़ातग कि परमेश्वर केतिंङ महसे बे महसे मोह्ड़े दाह ए शांति रम्मा लोहतो छना-छना केरे परमेश्वर ए हेंदु प्रभु यीशु ज्ञानारिंङ तुंखा शवातंई।

विशवासा रिंङ बढौतरी

³ परमेश्वरे एनोह सामर्थो दोरच़ी हेंदिंङ दुह भत्ते रांहषी ततो अंऊ हेंदिंङ जीवन श्रींङमिमी थल्जी जूंशी तोह, अंऊ परमेश्वरा बि खुश लहज़ा। दि जूंशी तोह छना कुचे हेनर परमेश्वरा बि ञेंहच़ातंई दंङ दि दुह ए शुह अच़ि हेंदिंङ एनोह महिमा ए रूठे ओ वहज़ा ज़ि बुलासी शुह।

⁴ दि भत्ते धिरो दोरच़ी परमेश्वरे हेंदिंङ महसे महान ए अनमोल वरदान रांहषी ततो अतु दोई वाईदा लहसी तते। ताकि दि वरदाना तु इस्तेमाल लहज़ी हेनर संसारो दुह मदम हिटी ओ दोरच़ी बचेके तरपोंई अंऊ मीहतिंङ नाश लहज़ा, दंङ परमेश्वरो व्यवहार सहभागी शुहचे योंई।

⁵ दंङ झांह लेह पक्‍का लंहि कि केरे माह सिर्फ मसीहू टोईच़ी विशवास लहज़ातंई, बल्कि दि ला कि केरे हेले रिंङ रूठे जीवन श्रींङमातंई, दंङ केतिंङ माह सिर्फ दुह लेह जूंशी तोह अंऊ रूठे तोह, बल्कि केतिंङ झांह ठ्रोह मीहरे ला बणेक्पि जूंशी तोह अंऊ समझदारी रंङ साते व्यवहार लेह ञेंच़ातोर,

⁶ दंङ माह सिर्फ दि ञेंहच़ी जूंशी तोह कि समझदारी रंङ साते छना व्यवहार लेह जूंशी तोह, बल्कि केतिंङ केनातु टोईच़ी काबू ला लहज़ी जूंशी तोह, बल्कि केतिंङ मुसीबता रिंङ ला धीरज़ तहच़ि जूंशी तोह।

⁷ पर केतिंङ माह सिर्फ झांह ठ्रोह तरीका रंङ श्रींङमी जूंशी तोह अंऊ परमेश्वरा बि खुश लहज़ा, पर केतिंङ इदि-अई दिऊ विशवासी तंङ साते केनातु टबरातु ठ्रोह व्यवहार लहज़ी जूंशी तोह, पर केतिंङ ऊई मीहतंङ साते दाह ला लहज़ी जूंशी तोह।

⁸ अगर दि भत्ते गप्पारे केहतु अंदरेग तोह, दंङ दि केतिंङ हेंदु प्रभु यीशु मसीहू ज्ञानो थल्जी महस जूंशी ए फलदायी शुहबिमी थल्जी मदत लोहतो।

⁹ पर अतु अंदरेग दि गुण माह दुह, दू मीहू ठ्रोह तोह अतु नज़र धोंण कमज़ोर तोह कि दोई खंड्री मरच़ा, दंङ पेहषा इलजी तोह कि परमेश्वरे दोबि दोऊ पुराना पापो दोरच़ी माफ लेह चरच़तो।

¹⁰ झांह लेह हे गिऊ प्यारे साथी विशवासी रे, केरे केनातिंङ ए ऊईतिंङ दि साबित लहज़िमी थल्जी कि परमेश्वरे केतिंङ हेले रिंङ दोऊ थलेच़ि जोज़िमी थल्जी कुहषी ततो दंङ केतिंङ एनोह मीहरे शुहबिमी थल्जी अंङषी ततो, झांह ठ्रोह कम लहज़िमी ऊई ला कोशिश लंहि। अगर केरे दि गुण बि हिद तोहनि ता केरे अपेहला मसीहू टोईच़ी विशवास लहज़ी ब्याड़ा माह लोहनि;

¹¹ पर परमेश्वर केहतु दुह राज्य रिंङ रूठे रंङ स्वागत लोहतो अंऊर यीशु मसीह तोह, अंऊ हेंदु प्रभु ए हेंदु उद्धारकर्ता तोह, अंऊ हमेशा ओ थल्जी रज्ज़ा ओ रूपा रिंङ राज लोहतो।

पतरसो अन्तिम ध्याड़ा

¹² हालांकि केहच़ी तुहई बेहच़ी ए दि गप्पारे ञेंहच़ातंई, दंङ दुह हेले ज्ञानो टोईच़ी विशवास लहज़ातंई, अंऊ मीहच़ी केतिंङ रांहषी तातोर, गेह केतिंङ दोतु पाहठी लगातार हिद रम्मा लोहग।

^13-14 हेंदु प्रभु यीशु मसीह ज़ि गिह्बी साफ लेह चरच़तो कि गेह युरनाह सिए योग। झांह लेह गिह्बी च़ेहसी लेहकी तोह कि गिऊ थल्जी दि ठीक तोह कि अपेहल तचेक गेह श्रींङी तोतोग दंङ गेह धोंण तचेक केतिंङ दुह चीज़ तु पाहठी हिद रम्मा लोहग।

¹⁵ झांह लेह गेह दुह गप्पा तिंङ हेंतेग चेहच़िमी दोरच़ी महस मेहनत लहज़ातग, ताकि गेह सिमी थल केरे भत्ते टेम दोतिंङ हिद लेह तरपोंई।

मसीहू महिमा ओ दर्शन

¹⁶ अपेहल ञेंहच़ी प्रेरिता ज़ि केतिंङ हेंदु प्रभु यीशु मसीह सामर्थ ए वापिस अपिमी पाहठी कंङाते, दंङ ञेंरे केतिंङ चालाकी रंङ साते बणाशी दुह कथा माह कंड्रातंई। पर, ञेंहच़ी मसीहू महिमा हेंदु टिरे खांहषी तरेनि।

^17-18 अपेहल हेनर दुह पवित्र गोह टोईच़ी दोरंङ साते तोहनी दोहथर परमेश्वरे बाह ज़ि दोबि आदर रांही दंङ परमेश्वरो मोह्ड़े महिमा ए दुह कपची च़रति। दंङ हेंज़ी परमेश्वरो मोह्ड़े महिमा मतलब परमेश्वरो सग दोरंङ साते दि कुट्री रेड्रीन, कि “दि गिऊ प्यारे योह शुह, अतंङ साते गेह दाह लहज़ातग। गेह दिरंङ महस खुश तोतोग।”

¹⁹ दिऊ थल्जी हेनर भविष्यवक्तातु दोरच़ी च़ेहसी बचनो टोईच़ी ऊई ला महस विशवास लहज़ातंई। अगर केरे दि रूठे खबरो टोईच़ी ध्यान रमोंई, दंङ केहच़ी इच्च़ा रूठे कम लोहनि, छना कुचे दि इच्च़ा संजवा ओ ठ्रोह तोह अंऊ हंयार ठाहरीरिंङ चमकेक्पा, अपेहल तचेक कि ध्याड़ा माह शवात दंङ मसीहू छंङी केहतु सेहम रिंङ चमकेक्पा, छना ठ्रोह मुंजे कि करज़े संसारा रिंङ छंङी हपा।

²⁰ भत्ते बे ज़रूरी गप्पा दि तोह कि केहच़ी चेहच़ातंई कि अरिला एनोह शाक्ति ऊ दोरच़ी परमेश्वरो भविष्यवाणी समझेक्सिमी जोगे माह अंऊ पवित्र शास्त्रा रिंङ रांहषी तोह।

²¹ छना कुचे भविष्यवक्ता ज़ि अपेहला अंऊ ला भविष्यवाणी मीहतु हिटी रंङ साते माह कुईर। बल्कि पवित्र आत्माज़ि दोतु विचार काबू लहरी दंङ दोतिंङ दुह बचन कुट्रीमी थल्जी मदत लहरी अंऊ परमेश्वरे जुंज़ा कि दोच़ी कोहर।