2 यूहन्ना 1 - लाहौली बाइबिल

अभिवादन

¹ गेह यूहन्ना अंऊ सेंहणा शुगाह दिह डाक चेहच़ातग। गेह दि डाक परमेश्वरो अंङषी दुह न्वाशा ए दोऊ कटुतिंङ चेहच़ातग, अंऊ दोतंङ गेह सच्चा दाह लहज़ातग, दंङ सिर्फ गेह ए मशत दंङ दोरे भत्तेर गेरंङ साते दाह लहज़ातोर, अंऊ दोच़ी सच्चाई ञेंच़ातोर।

² ञेंरे केतंङ साते दाह लहज़ातंई छना कुचे हेनर सच्चाई शिक्षा ओ टोहकठे विशवास लहज़ातंई, दंङ दुह शिक्षा हमेशा बणेंके बंङज़ोतो।

³ परमेश्वर बाह, ए दोऊ योह यीशु मसीहू दोरच़ी मोह्ड़े दाह, ए शांति हेंदंङ साते सच्चाई ए दाह रंङ साते बणेंके बंङज़ोतो।

सच्चाई ए दाह

⁴ गेह महस खुश शुईगा, अपेहल गेह दिह रेड्रा कि कांह थोड़े कटुरे दुह हेले ऊ पालन लहज़ा षिङे बंङज़ा तोर, अंऊ हेन्दिंङ परमेश्वर बाह ज़ि लहज़िमी थल्जी कुहषी ततो।

⁵ दा हे न्वाशा, गेह करंङ साते विनती लहज़ातग कि ञेंतिंङ इदि-ऊईदि रंङ साते दाह लहच़ी जूंशी तोह। दिह छल्ले खरकोई हुकुम माशुह पर दुह ए आज्ञा शुह अंऊ हेंज़ी दुह टेम बेहच़ी ञेंहच़ातोंई अपेहल ञेंहच़ी मसीहू थल्जी जोज़ी शुरू लहतंई।

⁶ परमेश्वरा रंङ साते दाह लहज़िमी दि तरीका तोत कि हेनर ध्वांए श्रींङमोंई छना परमेश्वरे कुट्रा कि ञेंतिंङ श्रींङमी जूंशी तोह। दिह दुह ए हुकुम शुह, अंऊ केहच़ी शुरूआत बे रैहशी तातंई, कि केतिंङ हमेशा केनातु बिचंङ दाह लहज़ी जूंशी तोह।

⁷ गेह दिह दिऊ थल्जी कुट्रतग छना कुचे महसे मीहरे अंऊ हप्सी शिक्षा रंड्रा ऊईतिंङ धोखा रंड्रातोर दोरे संसारारिंङ अच़ा अन्दोर। दोच़ी कुट्रातोर कि यीशु मसीह इच्च़ा मीहू रूपारिंङ दिह संसाररिंङ अंज़े मशत। अगर अरिया मीह झांह कुट्रा कि, दुह मीह मसीहू विरोधी शुह अंऊ हमेशा मीहतिंङ धोखा रंड्रा।

⁸ झांह लेह केतिंङ खबरदार बंङज़ी जूंशी तोह कि दिह मीहच़ी केतिंङ धोखा रंड्री माह जूंस, ताकि केहच़ी दुह योंहषी माह जूंस अतिंङ खोकसिमी थल्जी धोंण मेहनत लहज़ा तंई पर केतिंङ दुह मेहनतो आशीष खोकसोतो अतु वाईदा परमेश्वरे केतंङ साते लहसी ततो।

⁹ अंऊ मीहरे सच्चाई ऊ शिक्षा ओ दोरच़ी भटकेगी य्वातोर, दंङ मसीहू शिक्षा बि मनेक्च़ा तोर माह, दोरे परमेश्वरा रंङ साते बणेंकी माह बंङज़ा तोर। पर अंऊ मीहरे मसीहू शिक्षा बि लगातार मनेक्च़ा तोर, दोरे बाह परमेश्वरा रंङ साते दंङ दोऊ योह यीशु मसीह रंङ साते बणेंके बंङज़ा तोर।

¹⁰ अगर अरिया केहतु कछंङ अंज़े झांह ठ्रोह शिक्षा रंड्रा तोर अंऊ मसीहू शिक्षा बे शत्‌ह तोह, दोबि माह ता चुंङ अपि रांई दंङ माह ए नमस्कार लहज़ी बढावा रांई।

¹¹ छना कुचे अंऊ दि झांह ठ्रोह मीह बि नमस्कार लहज़ा दुह दोऊ मदम कमरिंङ साथी शवाह।

अन्तिम अभिवादन

¹² ऊई लाह महस गप्पा तोह अंऊ गेह केतिंङ कंड्री तातग पर गेह दोतिंङ झांह ठ्रोह इच्च़ा डाकरिंङ च़ेहसी माहतग पर गिह्बी उम्मीद तोत कि गेह केहतु कछंङ अपोग दंङ केहतु सामटे बंङज़ा गप्पा लोहग, झांह लेह हेनर महस खुश शुहचे योंई।

¹³ कनु न्वाशा कटुरे अपि परमेश्वरे अंङषी ततो कनिंङ नमस्कार कुट्रातोरे।