2 कुरिन्थियों 9 - लाहौली बाइबिल

साथी विशवासी तु मदत लहज़ी

¹ हेंतेग यरूशलेम शहरो विशवासी तु मंडली बि दान रंड्रीमी सेवा ओ पाहठी च़ेहच़ी गिह्बी ज़रूरत माह।

² छना कुचे गेह केहतु रंड्रीमी हिटी बि ञेंहगा, अतु वहज़ा ज़ि केहतु पाहठी मकिदुनिया इलाको कलीसिया ओ तुईज़ी घमण्ड लहज़ातग, कि अखाया प्रदेशो केरे मीहरे इच्च़ा साल बेहच़ी तेयार शुहबी लेहकी तोतोंई, दंङ केहतु खुशी रिंङ ऊई महस मीहतिंङ प्रेरणा खोकसिरी।

³ पर गेह दि षुमु विशवासी न्वारे तिंङ केहतु कछंङ दिऊ थल्जी चरच़ातग, कि ञेंहच़ी अंऊ घमण्ड केहतु बारे लाहतंई, दू दि गप्पारिंङ शुह्के माह ठहरेसोतो; पर छना गेह कुट्रातग; ध्वांए ए यरूशलेम शहरो विशवासी तिंङ दान रंड्रीमी थल्जी तेयार बंङज़ेंई।

⁴ झांह शुहबी मेस, कि अगर अपेहला मकिदुनिया नगरो रें विशवासी गेरंङ साते अपोर, दंङ केहतु धन तेयार माह शोतो, दंङ शुहबी तरपोतो कि, ञेंरे केहतु टोहकठे हेंदु विशवासो पाहठी शर्मिन्दा शोनि, पर केरे ऊई ला महस शर्मिन्दा शोनि।

⁵ झांह लेह गेह दि ज़रूरी समझेक्तग कि गेह तीतुस ए दोऊ झुह्ट विशवासी न्वातंङ साते दि बिनती लोहग कि दोरे तुहई ए केहतु कछंङ अच़ा अपोर, दंङ दू प्रतिज्ञा लहसी भेंटो प्रबन्ध लेह केहतो, अंऊ केहच़ी सेहम अल्ज़े रें चरच़ातंई, माह कि कंजूसी रंङ साते।

दान छना रंड्री

⁶ पर गप्पा ता दि तोह, कि अंऊ दोई थोड़े एचाह, दोई थोड़े ब्लज़ोतो ला; दंङ अंऊ दोई महसे एचाह, दोई महसे ब्लज़ोतो।

⁷ हर इच्च़ा मीह छना सेहम रिंङ सोचेक्पोतो ध्वांए ए दान लोह; माह कुढकुढ लहच़ी, दंङ माह ए दबाबा रंङ साते, छना कुचे परमेश्वरे खुशी रंङ साते रंड्रा दोतंङ साते दाह लहज़ा।

⁸ परमेश्वरो भत्ते धिरो मोह्ड़े दाह केतिंङ केहतु ज़रूरत बे महस रें तरपोतो। अंऊ दोरच़ी भत्ते गप्पा रिंङ ए भत्ते टेमारिंङ, भत्ते धिर, अंऊ केतिंङ जूंशी तोह केहतु कछंङ बंङज़ोतो, ताकि केहतु कछंङ रूठे कम लहज़िमी थल्जी ज़रूरत बे महस शोतो।

⁹ छना पवित्रशास्त्रारिंङ च़ेहसी तोह, “परमेश्वर ज़रूरत मंदा तिंङ उदारता रंङ साते (सेहम अल्ज़े) रंड्रा, दोऊ धर्मिकता हमेशा बणेंके बंङज़ोतो।”

¹⁰ छना कुचे परमेश्वरे ए तोह अंऊ ज़िमदारा बि एच़िमी थल्जी बेईज़ा रंड्रा, दंङ दोतिंङ ज़ेइमी थल्जी बगत ला रंड्रा। दंङ झांह ए ठ्रोह परमेश्वरे दि पूरा लोहतो कि केहतु कछंङ हमेशा जूंशी धन शोतो ताकि केरे ऊई महस सेहमे ज़रूरत मंद मीहतु मदत लेह तरपोंई।

¹¹ केरे भत्ते पाहठी आशीषित शोंई, दंङ झांह लेह केरे हमेशा सेहमे रंड्रीमी जोगे शोनि। दंङ अपेहल केहतु उदारता रंङ साते रांहषी दान बि ज़रूरतमंद मीहतिंङ रमोर, दंङ दोरे मीहरे परमेश्वरो धन्यवाद लोहर।

¹² छना कुचे दि सेवा पूरा लहज़िमी रंङ, माह सिर्फ पवित्र मीहतु कमी पूरा शवाह, पर मीहतु तरफे परमेश्वरो महस धन्यवाद शवाह।

¹³ छना कुचे ऊईतु मदत लहज़िमी थल्जी ढबाह रंड्रीमी सेवा दि साबित लोहतो कि केरे सच्चा शुई। महस मीहरे परमेश्वरो महिमा प्रगट लहज़ातोर, कि अपेहल केहच़ी कुट्रातंई कि रूठे खबर हेले तोहई दंङ केरे दिबी मनेक्पोंई दंङ केहच़ी केनाच़ि केनातु शब्दा तु भाषे लहज़ातंई। दंङ गरीब विशवासी तु ए भत्ते तु मदत लहज़िमी उदारता प्रगट लोहवा लाहतंई।

¹⁴ दोरे केहतु थल्जी परमेश्वरो हखा प्रार्थना लोहवा लोहर। दोरे केतिंङ दाह लहज़ातोर। छना कुचे दोच़ी ञेंहच़ातोर कि परमेश्वरे केहतु टोईच़ी अंयों मोह्ड़े दाह लहसी ततो।

¹⁵ अतंई हेनर परमेश्वरो दुह दानो थल्जी मतलब दोऊ योह थल्जी धन्यवाद लोहनि अतु वर्णन अच़िला पूरे ठ्रोह लेह मरपोतो।