2 कुरिन्थियों 8 - लाहौली बाइबिल

उदारतापूर्वक दान रंड्री

¹ हेंतेग हे गिऊ प्यारे साथी विशवासी रे, ञेंरे केतिंङ परमेश्वरो दू मोह्ड़े दाह ओ रूठे खबर रंड्रातंई, अंऊ परमेश्वरे मकिदुनिया प्रदेशो विशवासी तु मंडली बि रांहषी तहरे।

² कि अपेहल महस परेशानी रिंङ दोतु परीक्षा शुई, दंङ दोरे खुश शुहचे इलिर, हालांकि दोरे महसे गरीब तोईरे तांला दोच़ी ऊई विशवासी तु मदत लहज़िमी थल्जी खुशी रंङ ढबाह रांई।

³ दंङ दोतु पाहठी गिऊ दि गवाही तोह, कि माह दोच़ी धोंण ए रेंईर, अंऊ दोतु थल्जी जूंशी तोहई पर दोबि महस! दि दोच़ी एनोह हिटी रंङ साते रेंईर।

⁴ दंङ दि दानारिंङ यरूशलेम शहरारिंङ मीहतु मदत लहज़िमी सौभाग्य पाहठी हेंदु हखा घड़ी-घड़ी बिनती लहरिर।

⁵ ञेंहच़ी दि माह सोचेक्तंई कि दोरे झांह ठ्रोह रें तरपोर। दोच़ी एनाबि तुहई प्रभु बि दंङ दोऊ थल हेंदिंङ रें च़रतिर, ठीक ध्वांए छना कि परमेश्वरे जुंज़ाते कि दोच़ी लोहर।

⁶ झांह लेह ञेंहच़ी तीतुसा बि समझाएक्तेंई, कि छना दोई तुहई ला शुरू लाहते, ध्वांए केहतु बिचंङ ला दि दानो कम पूरा लेह च़रपोतो।

⁷ पर छना भत्ते गप्पारिंङ मतलब विशवास, बचनो प्रचार लहज़िमी थल्जी, ज्ञान ए भत्ते पाहठी ओ कोशिशो थल्जी, दंङ दू दाह रिंङ, अंऊ हेंदंङ साते तहज़ातंई, बढ़ेक्पा लाहतंई, ध्वांए गरीब विशवासी ओ थल्जी दि दानो कम रिंङ बढ़ेक्पा लंहि।

⁸ गेह हुकुमो रीति ओ टोहकठे ता माह, पर ऊईतु खुशी रिंङ केहतु दाह ओ सच्चाई बि परखेक्च़िमी थल्जी कुट्रातग।

⁹ केहच़ी ञेंहतु प्रभु यीशु मसीहू मोह्ड़े दाह ञेंच़ातंई, कि दू साहुकार शुहचे ला केहतु थल्जी गरीब शुहचे इलि ताकि दोऊ गरीब शुहबी रंङ साते केरे साहुकार शुहचे ईलांई।

^10-11 न्याकि साल केरे माह सिर्फ दान रंड्री पर झांह ठ्रोह लहज़िमी हिटीरिंङ ला भत्ते बे मुण्डा तोईनी। दि पाहठी केहतु थल्जी भत्ते बे रूठे छि तोह दोऊ पाहठी गिऊ सलाह दि तोह; हेंतेग केहच़ी छि शुरू लाहतंई दोबि पूरा लंहि। शायद केरे ला दिबी योहच़िमी थल्जी धोंण ए खुश तोतोंई अंयों कि केरे दिबी शुरू लहज़िमी थल्जी तोईनी।

¹² छना कुचे अगर केहतु सेहमरिंङ ऊईतिंङ दान रंड्रीमी विचार तोह ता, दंङ दान दोऊ हिसाबे ग्रहण ला शुहबी अंऊ दोऊ कछंङ तोह माह कि दोऊ हिसाबे अंऊ दोऊ कछंङ माह।

¹³ गेह माह जुंज़ातग कि ऊईतु जीवन योह्च़े लहज़िमी थल्जी केहतु जीवन खरे शुहचे योतो। पर भत्ते तु कछंङ इच्च़ा बराबर शुहबी जूंस।

¹⁴ पर बराबरी विचार दि मुक्का केहतु बढ़ती दोतु कमी रिंङ कमारिंङ अपतो, ताकि थले दोतु बढ़ती ला केहतु कमी रिंङ कमा अपतो, कि बराबरी शुहचे योतो।

¹⁵ छना पवित्रशास्त्रा रिंङ च़ेहसी तोह, “अच़ि महस ठ्रोहका लहरी दोऊ छल्ले महस माह हुंच़िरी, दंङ अच़ि थोड़े ठ्रोहका लहरी दोऊ छल्ले थोड़े माह हुंच़िरी।”

तीतुसाबि कुरिन्थुसो हखा चरच़ि

¹⁶ परमेश्वरो धन्यवाद शुहबी जूंस, अच़ि केहतु थल्जी दू ए खुशी तीतुसो सेहमरिंङ केहच़ी केई, अंऊ चिंद गिह्बी केहतु थल्जी तोहई।

¹⁷ कि अपेहल ञेंहच़ी दोबि केहतु कछंङ इबिमी थल्जी कुईनि, दंङ दोई ञेंहतु निवेदनो आदर लहरी, पर महस खुश शुहचे दू एनोह हिटीरंङ साते केहतु कछंङ इलि।

¹⁸ दंङ ञेंहच़ी दोरंङ साते दू विशवासी न्वा ला च़रतिन, अतु मिन रूठे खबरो प्रचारो पाहठी भत्ते कलीसिया ओ विशवासी तु बिचंङ फेलेके तोह।

¹⁹ दंङ धोंण ए मशत, पर दू विशवासी तु दोरच़ी ठहरासी ला तोह कि दि दानो कमो ओ थल्जी ञेंतंङ साते योतो दंङ ञेंहच़ी दि सेवा दिऊ थल्जी लहज़ातंई, कि प्रभु महिमा ए दि कंड्रिमी थल्जी कि ञेंरे यरूशलेमा रिंङ विशवासी तु मदत लहज़िमी थल्जी खुश तोतोंई।

²⁰ ञेंरे गप्पा रिंङ खबरदार बंङज़ातंई, तीतुसा रंङ साते दू साथी विशवासी चरच़िमी दोरच़ी कि उदारता कमो पाहठी अतु सेवा ञेंहच़ी लहज़ातंई, अच़िला ञेंहतु टोईच़ी दोष लगाएच़ी माह जूंस।

²¹ छना कुचे अंऊ गप्पारे सिर्फ प्रभु ए कछंङ माह, पर मीहतु कछंङ ला रूठे तोह हेनर कम रूठे ढंगा रंङ साते लहज़िमी थल्जी हेंदु ध्यान रंड्रातंई।

²² दंङ दि झुल्लाकु तंङ साते ञेंहच़ी अई इच्च़ा विशवासी न्वा चरच़ातंई। अपि ञेंहच़ी घड़ी-घड़ी परखेगी महस गप्पारिंङ खुश खोकशातंई; पर हेंतेग केहतु टोईच़ी दोऊ महस विशवास तोह, झांह लेह दू ऊई ला महस खुश तोह।

²³ अगर अरिया तीतुसो पाहठी रूहक्पोतो, दंङ दू गिऊ साथी, दंङ केहतु थल्जी गिऊ साथी शुह, दंङ अपेहला ञेंहतु विशवासी तु पाहठी रूहक्पोतो, दंङ दोरे कलीसिया ओ च़रसी ए दोतु जीवन मसीहू महिमा ओ थल्जी शुह।

²⁴ झांह लेह एनोह दाह ए हेंदु घमण्ड अंऊ केहतु पाहठी तोह कलीसिया तु तुईज़ी सिद्ध लेह दोतिंङ कंड्रु।