2 कुरिन्थियों 7 - लाहौली बाइबिल

¹ हे गिऊ प्यारे साथी विशवासी रे, अपेहल परमेश्वरे हेंदंङ साते वाईदा लोहतो, दंङ अतंई हेनर फुक ए सेहमो भत्ते पाहठी बुराई दोरच़ी हेंदिंङ शत्‌ह तोहनि, दंङ परमेश्वरो बेह्द चेहके हेंदिंङ भत्ते रिति रंङ पवित्र जीवन श्रींङमी कोशिश लंहि।

पोलुसो खुशी

² हेंदिंङ केनातु भत्ते सेहमे दाह लंहि। ञेंहच़ी माह अतुआ मदम लाहतंई, माह अतुआ नुकसान लहज़ातंई, माह अतिया हेंदु फायदा ओ थल्जी ठगेकातंई।

³ गेह केतिंङ दोषी ठहराच़िमी थल्जी माह कुट्रातग। छना कुचे गेह तुहई ए कुहषी ताहरेग, कि ञेंरे हेंदु भत्ते सेहमे दाह लहज़ातंई “ञेंरे केतंङ साते दाह लहज़ातंई दंङ लोहवा लोहनि, चाहे छिल्ला शुहचे योतो।”

⁴ गेह केतंङ साते भत्ते भरोसा रंङ साते कुट्रातग दंङ गिह्बी केहतु टोईच़ी घमण्ड तोह, दिरिंङ गिह्बी महस तसल्ली खोकसा; दंङ घेंङौ भत्ते दुखारिंङ ला, गेह खुशी रंङ भरपूर बंङज़ातोग।

⁵ छना कुचे त्रोआस शहर छोड़ेके मकिदुनिया प्रदेशो हखा अंजा मुक्का ञेंहतिंङ फुको हिसाबे आराम माह खोकसिरी। पर दोऊ बहज़ा ञेंरे भत्ते पाहठी परेशानी उठाएच़ातेंई। भत्ते ठहरि झगड़ा तोहई, ञेंहतु सेहमा रिंङ बेह्द तोहई।

⁶ तांला दुखी मीहतिंङ शांति रंड्रा परमेश्वरे तीतुसा बि देर चरच़े ञेंतिंङ याहब रेंई।

⁷ दंङ माह सिर्फ दोऊ अपिमी बे पर दोऊ दू दुह शान्तिरंङ साते ला, अंऊ तीतुसा बि केहतु दोरच़ी खोकसा तोहई; दंङ दोई केहतु हिटी, ए केहतु दुख ए गिह्बी केतंङ साते दोईमी खुशी ओ पाहठी कंङाते, अंऊ दोरच़ी गिह्बी महस खुशी शुई।

⁸ गेह दि गप्पो दोरच़ी पछताप माह लहज़ातग कि गेह केतिंङ डाक चेआतेग, चाहे दोई केतिंङ दुखी लहरी, हालांकि तुहई गिह्बी पछताप शुह्ते अपेहल गेह खंदेग कि दि केरे थोड़े टेमो थल्जी दुखी लहज़ी चरच़तो।

⁹ पर हेंतेग गेह खुश तोतोग, दिऊ थल्जी मशत कि केतिंङ दुख शुचाह पर दिऊ थल्जी कि केहच़ी दू दुखो वहज़ा ज़ि केहच़ी पाप लहज़ी बंद लेह केहिनी दंङ परमेश्वरो हखा किरच़ा इलांई, छना कुचे दि ध्वांए ठ्रोह दुख तोहई अंऊ परमेश्वरे जुंज़ाते कि ञेंहतु तरफे केतिंङ छल्ले गप्पो नुकसान शुहबी माह जूंस।

¹⁰ छना कुचे दुह दुख, अंऊ परमेश्वर तरफे हपा, उद्धार रंड्रा पश्चातापो वहज़ा बणेंके यवात, अंऊर अफसोस लहज़िमी छल्ले ठहरि माह केहषा। पर संसारिक दुख मोतो बि पैदा लहज़ा।

¹¹ तांला रेड्रुंई, दिए गप्पो दोरच़ी कि दू दुख, अंऊ परमेश्वर केतिंङ महसूस लहज़ी जुंज़ा। दोऊ दोरच़ी केतिंङ अंयों हिम्मत, दंङ सच्चाई कंड्रिमी थल्जी तेयार, बेह्द, गिह्बी खंड्रिमी हिटी, मेहनत, दंङ न्याय चुकाच़िमी धोंण हिटी; झांह लेह केहच़ी दि मामलारिंङ भत्ते पाहठी निर्दोष शुहबिमी प्रमाण रांहषी तातंई।

¹² हालांकि गेह दि गंभीर डाक माह ता केतिंङ दिऊ थल्जी चेआतेग कि गिह्बी दोऊ चिंद तोहई, अच़ि अन्याय लाहते, दंङ माह ए दोऊ वहज़ा ज़ि अतु टोईच़ी अन्याय लहसी तातंई, पर दिऊ थल्जी कि परमेश्वरो तुईज़ी केरे दि ञेंई च़रतेंई कि केरे ञेंहतु थल्जी अंयों सच्चा तोतोंई।

¹³ झांह लेह ञेंतिंङ हिम्मत; दंङ ञेंहतु दि हिम्मता रंङ साते तीतुसो खुशी ओ वहज़ा ज़ि ऊई ला खुशी शुई छना कुचे दोऊ सेहम केहतु भत्ते दू वहज़ा ज़ि हरा भरा शुहचे इलि।

¹⁴ छना कुचे अगर गेह दोऊ तुईज़ी केहतु पाहठी घमण्ड लहरिगा, दंङ दोऊ थल्जी गिह्बी षेह्पिमी माह पडे़क्ति। गेह केहतु हखा छिल्ला कुहतेग, दू भत्ते हेले तोहई। झांह लेह तीतुसो तुईज़ी गेह घमण्ड लहच़ी छि कुहतेग, दू हेले हुंच़िरी।

¹⁵ तीतुसे अपेहल दि हिद लहज़ा कि छना केहच़ी दोऊ हुकुमो भाषे लहज़ातंई, अपेहल केहच़ी बेह्द चेहके ए मोह्ड़े आदरा रंङ साते दोऊ स्वागत लाहतंई, दंङ दू केतंङ साते ऊई ला महसे दाह लहज़ा।

¹⁶ गेह महसे खुश तोतोग, कि केहतु तरफे गिह्बी हर गप्पारंङ विशवास शवात।