2 कुरिन्थियों 6 - लाहौली बाइबिल

सेवकाईऊ अनुभव

¹ परमेश्वररंङ साते कम लहज़ा शुहबी रंङ साते हेनर करंङ साते दि विनती लहज़ातंई कि परमेश्वरो मोह्ड़े दाह केहतु टोईच़ी शुहचा, दोबि ध्यांए इबि थारांई;

² छना कुचे पवित्र शास्त्रारिंङ परमेश्वरे कुहषी ततो कि, ठीक टेमारिंङ केई गिऊ प्रार्थना रेड्रातन, दंङ उद्धारो ध्याड़ारिंङ केई गिऊ मदत लहतन। रेड्रोंई; हेंतेग दिए दू ठीक टेम तोह। खंई, हेंतेग उद्धारो ध्याड़ा तोह।

³ परमेश्वरो साथी शुहबी रंङ साते हेनर अंऊ ला गप्पारिंङ ठोकर ज़ेइमी छल्ले मोका माह रंड्रातंई, ताकि हेंदु सेवाऊ टोईच़ी छल्ले दोष अपि माह जूंस।

⁴ पर हर इच्च़ा गप्पारिंङ ञेंहच़ी दि साबित लहज़ातंई कि हेनर परमेश्वरो सच्चा सेवक शुई। हेनर हेंदु रूठे गुण कंङे ते, दुख, मुसीबत, गरीबी ए दंङ महस मुसीबत ला मोह्ड़े हिम्मतारंङ साते सहन लहज़ातंई।

⁵ हेंदिंङ कोड़ार बहाएक्तिर, जेलारिंङ केहच़ी च़रतिर, हेंदु टोहकठे महस भीड़े हमला लहरी। ञेंहच़ी महस मेहनत लहरिन, ञेंरे रात-रात पूरे चेहकी ए दंङ योंए बंङज़ी।

⁶ पर ञेंहच़ी हेंदिंङ पवित्र तहसी तातंई, दंङ ज्ञानवान, सहनशीलता ए दाह कंज़े तोईरे। पवित्र आत्मो हाज़िरी ञेंहतंङ साते तोहई।

⁷ हेले ओ दाह रंङ साते, सच्चाई ओ बचनारंङ साते, परमेश्वरो सामर्थ रंङ साते ञेंहच़ी कम लहसी शुई। ञेंरे धर्मिकताऊ हथियार सुचंङ गुह्ट्र रिंङ हमला ओ थल्जी इस्तेमाल लहज़ातंई दंङ फुचंङ गुह्ट्र रिंङ रक्षाओ थल्जी इस्तेमाल लहज़ातंई।

⁸ चाहे मीहच़ी हेंदिंङ आदर रंड्रातोर या हेंदु बुराई लहज़ातोर; षटणा लोहर या श्राप रमोर, ञेंहच़ी हमेशा हेंदु पाहठी हेले कांहषी तातंई। पर रै मीहच़ी कुईरे कि ञेंरे हप्साड़ तोतोंई।

⁹ रें मीहच़ी हेनर खास ञेंहच़ातोर, पर रें मीहरे हेंदिंङ अंजान ए सिए दोतु बराबर समझेक्च़ातोर दंङ यह्च़ा खंई, हेनर श्रींङे तोतोंई; हेंदिंङ सज़ा ता खोकसी पर हेंदु जहान लेहपच़ी मरच़ि।

¹⁰ हेंदु कछंङ हेंदु टेम तोहई, पर हमेशा खुश बंङज़ातंई। हेनर कंगाल तोतोंई, पर महस मीहतिंङ आत्मिक तरीका रंङ साहुकार बणाके चरच़ातंई। हेनर झांह तोतोंई कि हेंदु कछंङ छल्ले माह, तांला हेंदु कछंङ भत्ते धिर तोह।

¹¹ हे कुरिन्थुस शहरो विशवासी रे, हेंज़ी खुलेके केतंङ साते गप्पा लाहतंई, हेंज़ी केतिंङ हेंदु भत्ते सेहमे दाह लहज़ातंई।

¹² केहतु थल्जी ञेंहतु दाह अपेहला कम शुहचे माह तोहई, पर केहतु दाह ञेंहतु थल्जी कम शुहचे इलजी तोह।

¹³ पर घेंङौ कटुरे ञेंई केतंङ साते कुट्रातग, कि दोऊ बदलारिंङ केरे ला केनातु भत्ते सेहमे दाह लोहवा लंहि।

हेनर परमेश्वरो मन्दिर शुई

¹⁴ केरे अविशवासी मीहतंङ साते संगति था लंहि। छना कुचे धर्मिकता ओ कमो ए अधर्मो कमो छल्ले बराबरी माह। छंङी ए हंयारो छल्ले नाता माह।

¹⁵ दंङ मसीहू शेतान रंङ साते छल्ले नाता माह। दंङ विशवास लहज़ा मीहतु विशवास माह लहज़ा दोतंङ साते छल्ले नाता माह।

¹⁶ परमेश्वरो मन्दिरंङ मुर्तितु थल्जी छल्ले ठहरि माह। छना कुचे हेनर ता श्रींङे परमेश्वरो मन्दिर शुई; छना परमेश्वरे पवित्रशास्त्रा रिंङ च़ेहसी तोह, “गेह दि मीहतंङ साते बंङज़ोग दंङ दोतु बिचंङ ज़ोज़ा लोहग; दंङ गेह दोतु परमेश्वर शोहग, दंङ दोरे गिऊ मीहरे शोर।”

¹⁷ झांह लेह प्रभु हेंदंङ साते पवित्र शास्त्रो दोरच़ी दि कुट्रा, दू मीहतंङ साते शत्‌ह शुहचे इलांई अंऊ परमेश्वरो थलेच़ि माह जोज़ातोर। दंङ अपवित्र चीज़ा तु दोरच़ी शत्‌ह बंङज़ुंई, दंङ गेह केतिंङ ग्रहण लोहग

¹⁸ “दंङ गेह केहतु बाह षोहग, दंङ केरे गिऊ योह ए मियोरे शोंई; दि सर्वशक्तिमान प्रभु परमेश्वरो वचन तोह”।