2 कुरिन्थियों 5 - लाहौली बाइबिलहेंदु स्वर्गीय चुंङ 1 छना कुचे हेंज़ी ञेंच़ातंई, कि देर धरतीऊ टोईच़ी हेंदु फुक इच्च़ा तम्बू ठ्रोह तोह अंऊर हेनर बंङज़ातंई। अगर दू नाश शुहचे यवाह दंङ हेंदिंङ परमेश्वरो तरफे स्वर्गंङ इच्च़ा झांह ठ्रोह फुक खोकसोतो, अंऊ गुह्ट्रे बणाषी माह पर हमेशा तचेक बणेंके बंङज़ोतो। 2 दि इच्च़ा सच्चाई तोह कि अपेहल हेनर दि धरती ऊ टोईच़ी तोतोंई, दंङ हेनर दि फुकारिंङ क्रिम्बातंई दंङ मोह्ड़े हिटी लांहज़तंई कि, हेंदिंङ इच्च़ा झांह ठ्रोह फुक खोकसा, अंऊ हेंदु स्वर्गो चुंङो ठ्रोह शोतो। 3 अपेहल हेंदिंङ दू स्वर्गीय फुक खोकसोतो, हेनर दू फुक मेह बंङज़ी मरपोंई। 4 हेले दि तोह कि दि तम्बू रिंङ बंङज़ा मुक्का हेनर कुरतु साते तेपचा क्रिम्बातंई, छना कुचे हेनर दि संसारिक फुक छोड़ेके माहरच़ातंई पर हेंज़ी जुंज़ातंई कि परमेश्वर हेंदिंङ स्वर्गीय फुक रमतो, ताकि हेंदु खरकोई फुका अंऊ हमेशा ओ थल्जी बंङज़तो, दि फुक लेहक्सा योतो अंऊ सिए यवात। 5 परमेश्वरे हेंदिंङ खरकोईं फुको थल्जी तेयार लहसी शुह, दोई हेंदिंङ बयाना रिंङ पवित्र आत्मा रांहषी ततो। दि बयाना दू वाईदा शुह, अतिंङ परमेश्वर थले हेंदु थल्जी पूरा लोहतो। 6 झांह लेह हेनर हमेशा ए परमेश्वरो टोहकठे विशवास लहज़ातंई। हेनर दि ञेंच़ातंई कि हेनर अपेहल तचेक दि फुकारिंङ तोतोंई, धोंण तचेक हेनर प्रभुरंङ साते विदेशा रिंङ निवास लहज़ातंई। 7 हेंतेग हेनर अपेहल दि संसारारंङ बंङज़ातंई, दंङ हेनर हेंदु विशवासो दोरच़ी प्रभु थलेच़ि ज़ोवातंई, माह कि दोबि खंड्राते। 8 हेंदिंङ ता परमेश्वरो टोहकठे विशवास तोह, हेंदिंङ सिमी थल प्रभु कछंङ बसेपी महस पसन्द तोह। 9 झांह लेह हेंदु सेहमो हिटी दि तोह, कि अगर हेनर दोरंङ साते स्वर्गंङ बंङज़ोंई या धरती रिंङ बंङज़ोंई, पर हेनर प्रभु बि खुश लोहवा लोहनि। 10 छना कुचे ज़रूरी तोह कि हेंदु भत्ते तु मसीहू दोरच़ी फेंसला शोतो, कि हर इच्च़ा मीह एनोह-एनोह रूठे ए मदम कमो दोरच़ी अंऊ दोतु फुको दोरच़ी शुहचे तोह, दोऊ बदला खोकपोर। परमेश्वरारंङ साते मेल-मिलाप 11 झांह लेह प्रभु बेह्द मनेक्च़ा हेनर हेले ओ टोहकठे विशवास लहज़िमी थल्जी मीहतु हखा विनती लहज़ातंई। परमेश्वर हेंदिंङ रूठे रंङ ञेंहच़ा; दंङ गिह्बी उम्मीद तोह कि केहतु अन्तरात्मा हेंदिंङ रूठे रंङ ञेंहच़ा। 12 हेनर तांला हेंदु षटणा केहतु तुईज़ी माह लहज़ातंई बल्कि ञेंरे केतिंङ मोका रंड्रातंई कि केरे ञेंहतु टोहकठे घमण्ड लंहि ताकि केरे दोतिंङ दिऊ जुबाब रें तरपोंई, अंऊ एनोह सेहमो टोईच़ी मशत पर दिखावटी गप्पो टोईच़ी घमण्ड लहज़ातोरे 13 अगर अच़िया कुट्रा कि हेनर बमजी तोतोंई दंङ परमेश्वरो थल्जी; दंङ अगर होश रिंङ तोतोंई, दंङ केहतु रूठे ओ थल्जी तोह। 14 छना कुचे मसीहू दाह हेंदिंङ मज़बूर लेह च़रच़ा; झांह लेह हेंदिंङ दि विशवास तोह अपेहल इच्च़ा मीह भत्ते मीहतु थल्जी सिए इलि, दंङ भत्ते मीहरे सिए इलिर। 15 दंङ झांह लेह मसीह भत्ते तु थल्जी सिए इलि, कि अंऊ श्रींङे तोरे, दोरे तुंखा सिर्फ एनाबि खुश लहज़िमी थल्जी श्रींङमी माह जूंस पर दोतिंङ मसीहू थल्जी श्रींङमी जूंस। मसीह दोतु थल्जी सिए इलि दंङ बाह परमेश्वरे दोबि श्रींङमी लहरी। मसीहरिंङ खरकोई संसार 16 झांह लेह हेंतेग बे हेनर मीहतु नज़रारिंङ अतु ला न्याय माह लहज़ातंई। वोई इच्च़ा टेम तोहई, अपेहल ञेंहच़ी मसीह बि मीहतु नज़रे खयांतेंई, पर हेंतेग ञेंहच़ी झांह माह लहज़ातंई। 17 झांह लेह अगर अरिया मसीहू टोहकठे विशवास लहज़ा ता दंङ दोई इच्च़ा खरकोई स्वाभाव खोक्शातो, युई गप्पा बीतेगी इलजी तोह दंङ हेंतेग खरकोई गप्पा अच़ा अंज़े तोह। 18 दि भत्ते गप्पारे परमेश्वरो दोरच़ी शुह, अच़ि मसीहू दोरच़ी ऐनारंङ साते मेल-मिलाप लेह केहरी, दंङ दोई हेंदिंङ दोऊ ए ऊईतु बिचंङ शांति कायम लहज़िमी कम रांहषी ततो। 19 दिऊ मतलब दि तोह कि परमेश्वर भत्ते मीहतु थल्जी इच्च़ा अम बणाएषी लेहकी तोह छिल्ला धिर मसीह लहसी ततो दोऊ दोरच़ी मेल-मिलाप लंहि, दंङ मीहतु पापो दोष दोतु टोहकठे लगाके च़रति, दंङ परमेश्वरे शांति ओ पाहठी दोऊ खबर सुनाएच़िमी कम हेंदिंङ रांहषी ततो। 20 झांह लेह हेनर मसीहू राजदूतारे शुहनि; परमेश्वरे दोऊ खबर स्वीकार लहज़िमी थल्जी हेंदु थल्जी दोरच़ी मीहतु बिनती लहज़ा। हेनर मसीहू हखा निवेदन लहज़ातंई, कि परमेश्वरारंङ साते मेल मिलाप लोहनि। 21 मसीह, अंऊ पापो दोरच़ी अंजान तोहई, परमेश्वरे हेंदु पापो थल्जी मसीह बि पापो दोष लगाएती ठहराति, ताकि हेनर परमेश्वरो नज़रा रिंङ धर्मी शुहचे योंई छना कुचे मसीह ज़ि हेंदु पापो सज़ा एनोह टोहकठे लेहपच़े च़रति। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation