2 कुरिन्थियों 4 - लाहौली बाइबिल

सुसमाचारो छङी

¹ झांह लेह अपेहल हेंदु टोहकठे झांह ठ्रोह दया शुई, कि हेंदिंङ परमेश्वरो रूठे खबर प्रचार लहज़िमी सेवकाई खोकसिरी, दंङ हेंज़ी अपेहल ला हार माह खोकपोंई।

² पर हेंज़ी षेह्द अपिमी जोगे ए गुप्तो कम छोड़ेके चरच़ातंई, दंङ माह ए चालाकी रंङ साते ज़ोवातंई, दंङ माह परमेश्वरो बचना रिंङ मिलावट लहज़ातंई, पर हेनर परमेश्वरो तुईज़ी सिर्फ हेले कंड्रातंई। परमेश्वरो तुईज़ी हर इच्च़ा गवाही रंड्री तरपोतो कि दि हेले तोह।

³ अंऊ रूठे खबर हेंज़ी प्रचार लहज़ातंई अगर दू बयाके तोह, दंङ दि नाश शुहच़ा दोतु दोरच़ी ए बयाके तोह।

⁴ दि संसारो भगवान शेताने दू अविशवासी तु बुद्धि काणे लेह चरच़तो, अंऊ वहज़ा ज़ि दोरे मसीहू रूठे खबर ए दंङ दोऊ महिमा ओ पाहठी ञेंई मरतिर कि मसीह परमेश्वरो स्वरूप शुह।

⁵ छना कुचे हेनर हेंदिंङ मशत, पर यीशु मसीह बि प्रचार लहज़ातंई, कि यीशु मसीह ए प्रभु शुह; दंङ हेंदु पाहठी दि कुट्रातंई कि ञेंरे यीशु वहज़ा ज़ि केहतु सेवक शुई।

⁶ झांह लेह कि परमेश्वरे कुहते, “हंयारो दोरच़ी छंङी चमकेक्पोतो,” दंङ परमेश्वरे छंङी ठ्रोह हेंदु सेहमरिंङ समझ रें च़रति, ताकि हेनर परमेश्वरो महिमा बि खंड्री तरपोंई अंऊ यीशु मसीह रिंङ प्रगट शवाह।

षोह नंदे रिंङ धन

⁷ हेंतेग हेंदु सेहमरिंङ दि छंङी चमकेपी लेहकी तोह, पर हेनर षोह नाजुक नन्देतु ठ्रोह तोतोंई अंऊर दि खज़ाना पिंङषी तोह, ताकि गप्पाऊ दोरच़ी दि गप्पा साफ शुहचे योतो कि दि अद्धभुत सामर्थ हेंदु दोरच़ी मशत, पर परमेश्वरो दोरच़ी शुह।

⁸ हेनर भत्ते तरफे मुसीबतो दोरच़ी कपषा तोतोंई, पर अपेहल हार माह मनेक्च़ातंई। हेनर परेशान ता शवातंई, पर अपेहला निराश माहश्वातंई।

⁹ हेंदिंङ तंग ता लहज़ातोरे; पर छोड़ेकतोर माह; थाह्चे ता केट्रातोरे, पर नाश माहश्वातंई।

¹⁰ हेनर यीशु ठ्रोह भत्ते टेम लगातार सच़ी केट्रिमी खतरा रिंङ बंङज़ातंई, ताकि मीहरे यीशु जीवना बि दू चीज़ा रिंङ खमोर अंऊ हेंज़ी लहज़ातंई।

¹¹ झांह लेह हेनर श्रींङे बंङज़ा यीशु मसीहू दोरच़ी लगातार सच़ी केट्रिमी खतरा रिंङ बंङज़ातंई, अंऊ दोरच़ी यीशु मसीहू जीवन हेंदु नाश शुहच़ा फुकारिंङ प्रगट शोतो।

¹² दंङ दिऊ मतलब दि तोह कि हेनर लगातार मौतो सामना लहज़ी लेहकी तोतोंई पर दिऊ नतीज़ा दि तोह कि केतिंङ अनंत जीवन खोकसा तोह।

¹³ पर हेनर प्रचार लहज़ी जारी तच़ातंई छना कुचे हेंदिंङ ध्वांए विशवास तोह, छना भजनकार बि तोहई, अंऊ पवित्र शास्त्रारिंङ च़ेहसी तोह, “गेह परमेश्वरो टोहकठे विशवास लहरिगा, झांह लेह गेह कुईगा।” हेंज़ी ला विशवास लहज़ातंई, झांह लेह हेंज़ी कुट्रातंई।

¹⁴ छना कुचे हेंज़ी ञेंच़ातंई, कि अच़ि प्रभु यीशु बि सिऊ दोतु बिचंङ ज़ि श्रींङमी लहरी, दोई ए हेंदिंङ ला यीशु मसीह रंङ साते श्रींङमी लोहतो, दंङ परमेश्वरो तुईज़ी खड़े शुहबिमी थल्जी हेंदिंङ केतंङ साते रैंज़ा हपतो।

¹⁵ छना कुचे भत्ते दुख अंऊ हेंज़ी सहन लहज़ातंई केहतु थल्जी शुह, ताकि परमेश्वरो मोह्ड़े दाह ओ दोरच़ी महसे बे महसे मीहतु पता लेहकी योतो कि परमेश्वर अंयों दाह लहज़ा तोह, दंङ परमेश्वरो महिमा ए स्तुति लोहनि।

¹⁶ झांह लेह हेनर याहब माह छोड़ेक्च़ातंई; हेंदु धकते कि इन्सानी रूप कमज़ोर शुहचे यवात पर हेंदु तोंखी अन्तरात्मा हर ध्याड़ा खरकोई शुहचे यवाह।

¹⁷ हेंदु दि कवचि ए थोड़े हरे दुख हेंदु थल्जी झांह ठ्रोह अनंत महिमा पैदा लहज़ा, अतु पाहठी हेंज़ी सोचेक्सी माहरच़ातंई।

¹⁸ छना कुचे हेंज़ी हेंदु ध्यान दोऊ टोहकठे माह लगाएकातंई, अंऊ तंङफा पर दोऊ टोहकठे लगाएकातंई, अंऊ तंङफा ए माह, अंऊ ला धिर तंङफा, दू थोड़े टेमो थल्जी शुह पर अंऊ तंङफा माह दू अनंत काल तचेक बंङज़ा।