2 कुरिन्थियों 3 - लाहौली बाइबिल

खरकोई बचनो सेवक

¹ छि हेंज़ी यह्च़ा हेंदु तारीफ लहज़ी शुरू लेह लेहतिन? या रें मीहतु ठ्रोह हेंदिंङ ला केनातिंङ ला केहतु थल्जी सिफारिशो डाको ज़रूरत तोह आ?

² केरे केनार ए इच्च़ा डाको ठ्रोह तोतोंई अंऊ भत्ते तु तुईज़ी परमेश्वरो थल्जी गिऊ कमो सिफारिश लहज़ा, अंऊ हेंदु सेहमरिंङ च़ेहसी तोह, दंङ केहतु लेहक्सी जीवन केहतु बिचंङ हेंदु कमो वहज़ा ज़ि तोह, अंऊ इच्च़ा डाको ठ्रोह तोह अतिंङ हर इच्च़ा पढेक्पि तरपोतो ए सेहषी तरपोतो।

³ दि प्रगट तोह, कि केहतु लेहक्सा जीवन इच्च़ा डाको ठ्रोह तोह, दोई दि डाक हेंदु सेवकाई दोरच़ी या रघटु पट्टी टोहकठे मशत, पर श्रींङे परमेश्वरो आत्माओ दोरच़ी मीहतु सेहमो पट्टी रिंङ च़ेहसी तोह।

पोलुसो काबलियत

⁴ हेनर दि दिऊ थल्जी कुट्रातंई हेंदिंङ मसीहू दोरच़ी परमेश्वरो टोईच़ी विशवास तोह।

⁵ हेंज़ी दि माह कुट्रातंई कि हेंदु कछंङ हेंदु दोरच़ी छा लहज़िमी काबलियत तोह; पर परमेश्वर हेंदिंङ दि काबलियत रंड्रा।

⁶ अच़ि हेंदिंङ खरकोई वाईदाऊ सेवक शुहबिमी जोगे, बणाकतो। दि मूसा ओ च़ेहसी कानून माह शुह बल्कि पवित्र आत्माओ वाईदा शुह, छना कुचे मूसा ओ नियम ओ भाषे माह लहज़िमी परिणाम मौत तोह, पर पवित्र आत्माज़ि अनंत जीवन रंड्री।

खरकोई वाईदाऊ महिमा

^7-8 अपेहल मूसा ओ कानून अंऊ रघटु पट्टी ओ टोहकठे च़ेहसी तोहई, दू मुक्का परमेश्वरो तेज तंङाफाते। इस्राएलो मीहरे महस ध्याड़ा तचेक मूसाऊ मोह्तु हखा खंड्री माहरच़ातेर छना कुचे दू चमकेक्पते, हालांकि दि चमक लम्हें टेम तचेक माह केहषीरि। झांह लेह मूसा बि रांहषी कानूनो टोहकठे आधारित सेवकाई मौत हपा, अतु झांह ठ्रोह तेज तोहई। दंङ पवित्र आत्माओ मार्गदर्शनो खरकोई वाचा ओ अधीन सेवा ओ कम ऊई ला तेज रंङ साते पिंङे शोतो।

⁹ छना कुचे अपेहल दोषी बणाएषा वाचा रिंङ धोंण तेज तोहई, दंङ पक्‍का रूपारिंङ खरकोई वाचा अंऊ एनोह मीहतिंङ परमेश्वरा रंङ साते धर्मी बणाएच़ा ऊई ला महस तेजोमय तोह।

¹⁰ दू तेज अंऊ युई वाचा मतलब मूसा ओ कानूनो दोरच़ी अंज़े तोहई, दू हेंतेग तेज मेह प्रगट शवाह, छना कुचे खरकोई वाचा ओ मुकाबले महस तेजोमय माह।

¹¹ छना कुचे अगर मूसा ओ कानूना रिंङ झांह ठ्रोह तेज तोहई, अंऊ बिल्कुल थोड़े टेमो थल्जी बणेंके तोहई, दंङ खरकोई वाईदारिंङ अंयों महस तेज शोतो अंऊ हमेशा ओ थल्जी बणेंके बंङज़ा।

¹² झांह लेह दिए उम्मीदा रंङ साते हेनर याहब रंङ साते कुट्रातंई।

¹³ हेनर मूसा ओ बराबर माह तोंई, अच़ि एनोह मोह्तु टोहकठे परदा केहते ताकि इस्राएलो मीहरे दोऊ मोहतिंङ परमेश्वरो चमक कम शुहबी ए थल मुखंङ योह्सा इबि तंङषे माह जूंस।

¹⁴ पर इस्राएलो मीहतु सेहम डगडगी शुहचे इलजी तोहई, छना कुचे तोग तचेक पुराना नियम पढेक्पिमी मुक्का दू ए परदा बंङज़ा। पर सिर्फ मसीहू टोहकठे विशवास लहज़िमी रंङ साते दू परदा एेह्खा लेह तरच़ी।

¹⁵ दंङ तोग तचेक अपेहल ला मूसा ओ कानूनो कताब पड़ेक्च़ातंई, दंङ दोतु सेहमरिंङ पर्दा पड़ेकी बंङज़ा, दंङ दिऊ थल्जी दोरे दिबी पूरे रिति रंङ समझेगी मरच़ातोर।

¹⁶ पर अपेहल ला अरिया प्रभु यीशु टोहकठे विशवास लहज़ा, दंङ प्रभु दोऊ सेहमरिंङ पड़ेकी परदा ऐह्खा लेह च़रच़ा।

¹⁷ प्रभु ता आत्मा तोह; दंङ अंऊर ला प्रभु आत्मा तोह दोर्तिंङ कानूनो आज़ादी तोह।

¹⁸ हेनर भत्तेर इच्च़ा अर्शिऊ ठ्रोह तोतोंई, अंऊ परमेश्वरो तेज झांह ठ्रोह मोह्दु खंड्रातंई अंऊ दोतु टोहकठे परदा पड़ेके तोह, दंङ परमेश्वर हेंदिंङ लगातार बढाईक्च़ा तेज रिंङ महस बे महस एनोह ठ्रोह बणाएच़ा। दि तेज प्रभु दोरच़ी खोकसा, अंऊ पवित्र आत्मा तोह।