2 कुरिन्थियों 2 - लाहौली बाइबिल

¹ गेह घेंङौ सेहमरिंङ दिए ठानेगी केईगा कि केहतु कछंङ अंज़े केतिंङ दुख माह रमोग।

² छना कुचे अगर गेह केतिंङ दुखी लोहग, तां केहतु अलावा गिह्बी खुशी रंड्रा अरिला बचेकी माह, सिर्फ केरे ए शुई अंऊ दोतिंङ गेह दुखी लाहतेग।

³ दंङ गेह दि गप्पा केतिंङ झांह लेह चेहरिगा, कि झांह शुहबी मेस, कि गिऊ अपिमी मुका, अतु दोरच़ी गिह्बी खुशी खोकसी जूंस, गेह दोतंङ साते दुखी शोहग; छना कुचे गिह्बी केहतु भत्ते तु टोईच़ी दि गप्पाऊ विशवास तोह, कि अंऊ गिऊ खुशी तोह, दुह ए केहतु भत्ते तु ला तोह।

⁴ मोह्ड़े मुसीबत, दंङ सेहमो दुखारंङ साते, गेह महसे मिक्ति बहाके-बहाके केतिंङ डाक चेआतेग झांह लेह माशुह, कि केरे दुखी शुई, पर झांह लेह कि केरे दुह मोह्ड़े दाह ञेंई च़रतुंई, अंऊ गिह्बी केतंङ साते तोह।

अपराधी बि माफी

⁵ अगर अच़िया दुख रांहषी तोह, दंङ दोई गिह्बी मशत, बल्कि एनाबि दुख रांहषी ततो, हालांकि हेंदिंङ दि गप्‍पा बि खास लहज़ी माह जूंस।

⁶ झांह ठ्रोह मीहबी केहतु बिचंङ ज़ि महसे विशवासी ज़ि सज़ा रैंइर, दू ए झोबड़ी शुह।

⁷ झांह लेह दिऊ थल दि रूठे तोह कि दोऊ अपराध माफ लंहि, अगर केरे दोबि माफ माह लहज़ातंई दंङ शायद दू धोंण दुखी शोतो कि निराशा रिंङ एनोह हार मनेकी च़रपोतो।

⁸ झांह लेह गेह केतंङ साते बिनती लहज़ातग, कि दोबि विशवास रंड्रातंई कि केरे हेले रिंङ दोरंङ साते दाह लहज़ातंई।

⁹ छना कुचे गेह केतिंङ दिऊ थल्जी ला चेआतग, कि केतिंङ परखेकी च़रपोग, कि केरे गिऊ हुकुमो भाषे लहज़िमी थल्जी तेयार तोतोंई या माह तोंईया।

¹⁰ पर अतिंङ केहच़ी माफ लहज़ातंई, दोबि गेह ला माफ लहज़ातग, छना कुचे अपेहल गिह्बी माफ लहज़िमी ज़रूरत शवात, दंङ गेह घेंङौ फायदा ओ थल्जी मसीहू अधिकारा रंङ साते झांह लहज़ातग।

¹¹ ताकि शेतान हेंदु हालातो फायदा उठाएच़ी माह जूंस; छना कुचे हेनर दोऊ मदम योजना रूठे रंङ ञेंहच़ातंई।

मकिदुनिया नगरो हखा यात्रा

¹² अपेहल गेह त्रोआस शहरा रिंङ मसीहू रूठे खबरो प्रचार लहज़ी अति, दंङ दोहर परमेश्वरे गिह्बी रूठे खबर प्रचार लहज़िमी मोह्ड़े मोका प्रदान लहरी।

¹³ गेह घेंङौ विशवासी न्वा तीतुसा बि केहतु तरफे खबर हपि माह तंङरिगा, झांह लेह त्रोआस शहरो विशवासी तु दोरच़ी विदा शुहचे गेह घेंङौ विशवासी न्वा तीतुस बि पेट्रीमी थल्जी मकिदुनिया शहरो हखा वापिस अतिगा।

मसीह रिंङ जीत ओ खुशी

¹⁴ दंङ परमेश्वरो धन्यवाद शोतो, अंऊ मसीह रंङ साते हेंदु संबधो वहज़ा ज़ि, हेंदिंङ हमेशा ऐनाहरंङ साते चलाच़ा। दिऊ मतलब दि तोह कि हेनर अंऊर ला य्वातंई, हेनर रूठे खबर सुनाच़ातंई ताकि भत्ते मीहरे परमेश्वरो बि ञेंओर ए रेड्रोर।

¹⁵ छना कुचे हेनर परमेश्वरो थल्जी मसीहू दोरच़ी धूपो ठ्रोह तोतोंई। हेंदु दोरच़ी प्रचार लहसी रूठे खबर मीहतु दोरच़ी फेलेके रूठे बासो ठ्रोह तोह, अंऊ उद्धार खोकसा दोतु थल्जी ए नाश शुचाह दोकु बिचंङ फेलेके यवाह।

¹⁶ पर दोतु थल्जी अंऊ विनाशो अमरिंङ तोतोर, दोरे सिमी झांह ठ्रोह झखंजी बासो ठ्रोह तोतोर अंऊ दोतिंङ मौतो हखा रैंज़ा शिलज़ा; पर दोतु थल्जी अंऊ उद्धारो अमरिंङ तुंखा शवाहतोर, दि जीवनो झांह ठ्रोह रूठे बास तोह अंऊ जीवनो हखा रैंज़ा शिलज़ा। हेले रिंङ, अरिला एनोह दोरच़ी दिऊ जोगे माह अंऊ मसीहू ज्ञानो रूठे बास फैलाके तरपोतो।

¹⁷ छना कुचे हेनर दू महसे तु बराबर माह तोंई, अंऊ परमेश्वरो बचन एनोह फायदा ओ थल्जी प्रचार लहज़ा; पर हेनर परमेश्वरो बचनो प्रचार सच्चाई ए मसीहू अधिकारारंङ साते लहज़ातंई, दि ञेंई कि परमेश्वर हेंदिंङ खंड्रा बंङज़ा तोह।