2 कुरिन्थियों 13 - लाहौली बाइबिल

अन्तिम चेतावनी

^1-2 पवित्रशास्त्रा रिंङ दि च़ेहसी तोह कि “हर इच्च़ा मसला झुह्ट या षुमु गवाह तु गवाही दोरच़ी सुलझासी जूंशी तोह।” गेह तुहई ए दू मीहतिंङ चेतावनी रें चरच़ातग अपेहल गेह घेंङौ दूसरी यात्रा ओ मुक्का दोर्तिंङ तोईगा। हेंतेग गेह यह्च़ा दोतिंङ ए ऊई ला भत्ते दि डाको दोरच़ी चेतावनी रंड्रातग, छना गेह तुहई लाहतेर। हेंतेग गेह षुमु फेरा केहतु कछंङ अपिमी तोतोग; दंङ अगर दोच़ी हेंतेग ला पाप लहज़ी ब्याड़ा माह लहरिर, दंङ अरिला सज़ा ओ दोरच़ी बचेक्पोतो माह।

³ छना कुचे केहच़ी दि सबूत जुंज़ातंई कि अंऊ दोई गिऊ दोरच़ी गप्पा लहज़ातोर, दू मसीह शुह दंङ दू केहतु पाहठी कमज़ोर माह पर केहतु बिचंङ सामर्थी तोह।

⁴ हेले रिंङ दोरे कमज़ोरी ओ हालातो वहज़ा ज़ि क्रूसो टोईच़ी चढ़ाइगी ता केहरिर, तांला परमेश्वरो सामर्थ रंङ साते श्रींङे तोह, हेनर ला फुका रूपारिंङ ध्वांए कमज़ोर तोतोंई; पर परमेश्वरो सामर्थ रंङ साते केतंङ साते व्यवहार लहज़िमी थल्जी दोरंङ साते श्रींङी बंङज़ोंई।

⁵ केनातिंङ परखेक्तुंई, कि विशवासा रिंङ तोतोंई आ माह तोंई; केनातिंङ परखेक्तुंई, दि खंड्रिमी थल्जी कि छि केहतु विशवास सच्चा तोह आ माह, दंङ यीशु मसीह केहतु अंदरेग तोह आ माह? माह ता केरे निकम्मा हुंच़ा इलांई।

⁶ पर गिऊ उम्मीद तोह, कि केरे ञेंई च़रपोंई, कि ञेंरे निकम्मा माह तोहनि।

⁷ दंङ हेनर हेंदु परमेश्वरारंङ साते प्रार्थना लहज़ातंई, कि केहच़ी छल्ले बुराई था लंहि; दि कंड्रिमी थल्जी मशत कि केहतु बिचंङ ञेंहतु सेवकाई रूठे शुहचे इलि, पर दिऊ थल्जी कि ञेंहच़ी जुंज़ातंई कि केहच़ी सही कम लंहि चाहे हेनर असफल ए शुहचे योंई।

⁸ छना कुचे हेंज़ी सच्चाई ओ विरोध छल्ले लेह मरच़ि, पर हेले ओ थल्जी लेह तरपोंई।

⁹ अपेहल हेनर कमज़ोर तोतोंई, दंङ केरे विशवासरिंङ पक्‍का तोतोंई, दंङ ञेंरे खुश शवातंई, दंङ दि प्रार्थना ला लहज़ातंई, कि केरे विशवासरिंङ सिद्ध शुहचे योंई।

¹⁰ झांह लेह गेह केतिंङ दि गप्पा चेहच़ातग, दिबे तुहई कि गेह केहतु कछंङ अपोग ताकि गिह्बी केतिंङ सज़ा रें घेंङौ अधिकारो इस्तेमाल लहज़िमी ज़रूरत माह पढ़ेक्पोतो अंऊ प्रभु ज़ि गिह्बी रांहषी ततो। छना कुचे गेह केहतु अधिकारो इस्तेमाल केहतु विशवास पक्‍का लहज़िमी थल्जी लहज़ातग माह कि नाश शुहबिमी थल्जी।

आखरी नमस्कार

¹¹ झांह लेह हे गिऊ विशवासी न्वा रे, गेह दि शब्दा रंङ साते डाक बन्द लहज़ातग; सिद्ध शुहचे इलांई; इदि-अईदि बि उत्साहित लंहि; इच्च़ा ए सेहम तंही; केनातु बिचंङ मेल-मिलापा रंङ साते बंङज़ुंई, दंङ दाह ए शांति ओ दाता परमेश्वरे केतंङ साते शोतो।

¹² मसीहू दाह रंङ साते इदि-अईदि बि ग्वाक्षा ते नमस्कार कुंई।

¹³ भत्ते परमेश्वरो मीहरे केतिंङ नमस्कार कुट्रातोर।

¹⁴ गेह प्रार्थना लहज़ातग कि प्रभु यीशु मसीहू मोह्ड़े दाह ए परमेश्वरो दाह ए पवित्र आत्माओ सहभगिता केतंङ भत्ते तंङ साते शुहवा लोहतो। अमीन।