2 कुरिन्थियों 12 - लाहौली बाइबिल

पोलुसो दिव्य दर्शन ए कमज़ोरी

¹ हालांकि घमण्ड लहज़ी गिऊ थल्जी ठीक माह, तांला लेह लेहपा; पर गेह प्रभु रांहषी दर्शन ए प्रकाशनो चर्चा लोहग।

² गेह इच्च़ा झांह ठ्रोह मीहबी, अंऊ मसीहू विशवासी तोह, ञेंएगा सपि साल तुहई दि मीह षुमु स्वर्ग तचेक रैंज़ा शिली फुका रंङ साते या फुक मेह, गिह्बी पता माह दि परमेश्वरे ए ञेंहच़ा।

^3-4 गेह यह्च़ा कुट्रातग, गेह ञेंच़ातग कि दि मीह स्वर्गो हखा शिलिर तांला गिह्बी पता माह कि दि हेले शुई या इच्च़ा मंङडुंङ तोहई, दि ता परमेश्वरे ञेंहच़ा दंङ झांह ठ्रोह रेड्रीनि अतिंङ शब्दा रिंङ बयान लेह मरपोंई दंङ अतु पाहठी ऊईतिंङ कंड्रिमी थल्जी मीहतिंङ इजाज़त माह।

⁵ हेले रिंङ झांह ठ्रोह मीहू टोईच़ी ता गिऊ थल्जी घमण्ड लहज़ी ठीक तोह, अच़ि झांह ठ्रोह दर्शन खांहषी ततो। पर केनोह टोईच़ी केनोह कमज़ोरी छोड़ेके च़रतु, घेंङौ पाहठी घमण्ड माह लोहग।

⁶ छना कुचे अगर गेह घमण्ड लेह जुंज़ातग तांला गेह मुर्ख माह शोहग, छना कुचे हेले कोहग; पर गेह घेंङा बि झांह ठ्रोह घमण्ड लहच़िमी दोरच़ी रोकेक्च़ातग, झांह शुहबी मेस कि छना अच़िया गिह्बी खंड्रातोर या गिह्बी रेड्रातोर, गिह्बी दोबि ला बढ़कर ञेंहच़ी जूंस।

⁷ पर गिह्बी दू अद्धभुत चीज़ा तु पाहठी घमण्ड लहज़ी माह जूंस अंऊ परमेश्वरे गिह्बी कांहषी ततो। झांह लेह दिरंङ मुकाबला लहज़िमी थल्जी गिऊ फुकारिंङ छ़वाक्तु ठ्रोह इच्च़ा खरे समस्या रांहषी ततो। शेतानो तरफे गिह्बी इच्च़ा दूत सच़िमी थल्जी रांहषी तोह, ताकि गेह घमण्डी शुहबी मेस।

⁸ दिऊ पाहठी गेह प्रभु रंङ साते षुमु फेरा विनती लहरिग, कि गिऊ दोरच़ी दि शत्‌ह शुहबी जूंस।

⁹ दंङ दोई गेरंङ साते कुई, “गिऊ मोह्ड़े दाह कनु थल्जी झोबड़ी तोह; छना कुचे गिऊ सामर्थ कमज़ोरी रिंङ प्रगट शवाह।” झांह लेह गेह मोह्ड़े खुशी साते घेंङौ कमज़ोरी टोईच़ी घमण्ड लोहग, कि मसीहू सामर्थ गिऊ टोईच़ी सिल्मोग लोहवा लोहतो।

¹⁰ दिऊ थल्जी गेह मसीहू थल्जी कमज़ोरीरिंङ, दंङ निन्दा रिंङ, गरीबी रिंङ, बुराई रिंङ, मुसीबता रिंङ, खुश तोतोग; छना कुचे अंऊ मुक्का गेह कमज़ोर शवाहतग, दोहथर गेह मसीहू ताकतो दोरच़ी बलवन्त शुहचे यवातग।

कुरिन्थियों थल्जी पोलुसो चिंद

¹¹ गेह मुर्ख बणेंके इलिग, पर दि केरे ए शुई अच़ि गिह्बी झांह लहच़िमी थल्जी मज़बूर लहरिन। केतिंङ ता गिऊ षटणा लहज़ी जूंशी तोहई, छना कुचे अगर गेह छोह् ला जोगे माह तोग, तांला गेह दोतंङ बे छल्ले धिरा रिंङ कम माह तोग, अंऊ झांह ठ्रोह कंड्रातोर कि दोरे भत्ते प्रेरित बे मोह्ड़े तोतोर।

¹² सच्चा प्रेरिता तु लक्षण ला केहतु बिचंङ भत्ते पाहठी ओ धीरज़ रंङ साते निशानी, दंङ अद्धभुत कम, ए सामर्थो कमो दोरच़ी कंड्रिरी।

¹³ केरे अंऊ गप्पारिंङ ए ऊई कलीसिया बे कम तोईनी, सिर्फ इच्च़ा ए गप्पो थल्जी अंऊ गेह ऊई कलीसिया तंङ साते लाहतग दंङ केतंङ साते माहलग, गेह केहतु दोरच़ी घेंङौ ज़रुरतो थल्जी ढबाह माह पेट्रातग, केहतु दि सोचेक्सी गलत शुह कि गेह झांह लहच़ी केहतु विरोधा रिंङ गलत लहरिग।

¹⁴ हेंतेग, गेह षुमु फेरा केहतु कछंङ अपिमी थल्जी तेयार तोतोग, दंङ गेह केहतु दोरच़ी छल्ले मांग माह लहग; छना कुचे गेह केहतु टंगा-ढबाह मशत, पर केतिंङ ए जुंज़ातग। छना कुचे कटुतिंङ याह-बाह तु थल्जी ढबाह ठ्रोका लेह माह जूंस, पर याह-बाह तिंङ कटुतु थल्जी ढबाह ठ्रोहका लेह जूंस।

¹⁵ छिल्ला धिर गिऊ कछंङ तोह दू भत्ते धिरो ओ इस्तेमाल गेह केहतु थल्जी लेह च़रपोग ताकि पवित्र आत्माओ थले जोज़िमी थल्जी केहतु मदत लेह तरपोग। गेह केतंङ साते महस दाह लहज़ातग, पर झांह च़ेहसा कि केरे गेरंङ साते थोड़े दाह लहज़ातंई।

¹⁶ केहतु बिचंङ ज़ि रे मीहच़ी स्वीकार लहज़ातोर कि गेह केहतु टोईच़ी छल्ले बोझ माह केईगा, पर ऊईतिंङ च़ेहसा कि गेह चालाक तोतोग दंङ गेह केतिंङ भत्ते पाहठी धोखा रंड्रातग, अंऊ कि इच्च़ा हप्सी शुह।

¹⁷ गेह केहतु दोरच़ी घेंङौ थल्जी ढबाह लेहच़िमी तीतुस या ऊई अतुआ इस्तेमाल माह लहग।

¹⁸ गेह तीतुसा बि समझाके दोरंङ साते दू विशवासी न्वा च़रतिगा, दंङ छि तीतुसे छल लहज़ी ते केहतु दोरच़ी छा लेहपच़ातो आ? छि हेनर इच्च़ा ए मकसदा रंङ साते माह ज़ोवातंई आ? छि इच्च़ा ए तरीका रंङ साते कम माह लोहनि आ?

¹⁹ हे गिऊ प्यारे साथी विशवासी रे, केरे हेंतेग तचेक समझेक्सी लेहकी शोंई कि ञेंरे केहतु तुईज़ी हेंदु सफाई रंड्रातंई, ञेंरे ता परमेश्वरा बि हेंदु तुईज़ी ञेंई ते मसीहरिंङ दि कुट्रातंई, दंङ दि भत्ते गप्पार केतिंङ विशवासा रिंङ बडेकेक्पिमी थल्जी कुट्रातंई।

²⁰ दंङ गिह्बी दिला बेह्द तोह, कि झांह शुहबी मेस, कि गेह अंज़े छना जुंज़ातग, ध्वांए केतिंङ माह खोकपोग; दंङ गिह्बी ला छना केहच़ी माह जुन्ज़ातंई ध्वांए खोकपोंई, दंङ गिह्बी दि ला बेह्द तोह कि केहतु बिचंङ झगड़ा, जलन, रोहष, विरोध, चुगली, घमण्ड ए बखेड़ा लहज़िमी ठ्रोह स्वाभाव खोकपोग।

²¹ दंङ झांह शुहबी मेस कि अपेहल गेह वापिस अपोग, गिऊ परमेश्वरे गिऊ अपमान लोहतो। दंङ गिह्बी महसे तु थल्जी यह्च़ा शोक लेह लेह्पोतो, अंऊ दोच़ी तुहई पाप लहरिर, दंङ दू झखंजी कमो, दंङ कुकम, ए लुचपन बि, अंऊ दोच़ी लहरिर, सेहम माह किरच़िर।