2 कुरिन्थियों 11 - लाहौली बाइबिल

पोलुस ए हप्साड़ प्रेरित

¹ अगर केहच़ी दू स्वीकार लेह केओनि अंऊ एनोह तरीफ एनेह लाह दंङ झांह लेह गिह्बी उम्मीद तोह कि अगर गेह थोड़े हरे मुर्खता रंङ व्यवहार लहज़ातग दंङ दोबि केहच़ी बर्दाशत लेह च़रपोंई।

² छना कुचे गेह केतंङ ध्वांए दाह लहज़ातग दंङ केहतु चिंद लहज़ातग छना परमेश्वरे लहज़ा। झांह लेह गेह केतिंङ मसीह रिंङ ए सिर्फ दोबि ए रंड्रीमी वाईदा लहसी तातग, कि केतिंङ पवित्र कुंवारीऊ ठ्रोह मसीहू हवाले लेह च़रपोग।

³ पर गिह्बी हमेशा दि बेह्द लेहकी बंङज़ा कि शेतान केहतु सेहम मसीहू थल्जी केहतु निष्कपट, पवित्रता रंङ साते शत्‌ह लहज़ी माह जूंस, छना शेताने ओमड्रो रूपारिंङ हव्वा बि एनोह चालाकी रंङ साते बहकाएकि च़रते।

⁴ अगर अरिया केहतु कछंङ अंज़े ते, ऊई अरिया यीशु प्रचार लोहतो, अतु प्रचार ञेंहच़ी माह लोहनि या ऊई छा आत्मा केतिंङ खोकसिरी; अंऊ तुहई खोकसी माह तोहई; या ऊई छा रूठे खबर अतिंङ केहच़ी तुहई मनेक्च़ी तातंई, केरे दू शिक्षा ग्रहण लहज़िमी थल्जी गलत तोतोंई।

⁵ गेह ता समझेक्च़ातग, कि गेह धोंण ए रूठे तोतोग अंयों कि अंऊ दोच़ी झांह ठ्रोह कंड्रातोर कि दोरे भत्ते प्रेरित बे मोह्ड़े तोतोर।

⁶ अगर गेह रूठे रंङ गप्पा लेह मरच़ातग, तांला मसीह ए रूठे खबरो पाहठी गिह्बी जानकारी तोह। गेह घेंङौ ज्ञानो दू भत्ते गप्पा प्रगट लाहतग अंऊ गेह सिखासी तातग।

⁷ गेह केहतु बिचंङ परमेश्वरो रूठे खबर मुफ्ता रिंङ प्रचार लहज़ा घेंङा बि नम्र लहरिगा ताकि केहतु आदर शुहबी जूंस। छि गेह झांह लहच़ी छा पाप लाहतगा।

⁸ केहतु सेवा लहज़िमी थल्जी गिह्बी ऊई कलीसिया ओ दोरच़ी मदत खोकसिरी। केतिंङ दि कुट्री जूंशी माह तोहई कि झांह लेह गलत शुह।

⁹ दंङ अंऊ मुक्का गेह केतंङ साते तोईग, दंङ गिह्बी ढबाहो कमी शुई, दंङ गेह अतुला टोईच़ी भार माह केईगा छना कुचे विशवासी न्वारे ज़ि, मकिदुनिया नगरंङ अंज़े गिऊ कमी पूरा लहरिर; दंङ गेह छना ठ्रोह ला केहतु थल्जी छना ठ्रोह ला परेशानी बढ़ेक्पिमी दोरच़ी बचेके इलिगा, दंङ अंजा टेमारिंङ ला केहतु टोईच़ी बोझ माह बणेक्पोग।

¹⁰ ध्वांए ए पक्‍का रूपारिंङ छना मसीहू सच्चाई गिऊ अंदरेग तोह, ता अखाया नगरंङ अंऊ दोई गिह्बी दि घमण्डे रोकेक्पोतो।

¹¹ गेह केहतु ढबाह छिल्ले माह लेहपच़ातग? छि गेह दि दिऊ थल्जी लहरिगा छना कुचे गेह केतंङ साते दाह माह लहज़ातग? परमेश्वरे दि ञेंहच़ा कि गेह केतंङ साते दाह लहज़ातग।

¹² पर अंऊ गेह लहज़ातग, दू ए लोहवा लोहग; गेह केहतु मदत माह लेहपोग ताकि गेह दू मीहतिंङ रोकेक्पोग अंऊ दि गप्पा ओ टोईच़ी घमण्ड लहच़िमी थल्जी इच्च़ा मोका जुंज़ातोर कि परमेश्वरो थल्जी दोतु कम ञेंहतु कमो बराबर तोह।

¹³ छना कुचे झांह ठ्रोह मीहरे हप्सी प्रेरित, दंङ छलारंङ साते कम लहज़ा, दंङ मसीहू प्रेरित शुहबिमी हप्सी दावा लहज़ातोर।

¹⁴ दंङ दि हेरानी ओ गप्पा माह छना कुचे शेतान ऐनाह ला परमेश्वरो महिमा ओ इच्च़ा स्वर्गदूत शुहबिमी दिखावा लहज़ा।

¹⁵ झांह लेह अगर दोऊ सेवक ला धर्मिकता ओ सेवकातु ठ्रोह दिखावा लोहतो, दंङ छल्ले मोह्ड़े गप्पा माह, पर दोतु अंत दोतु कमो हिसाबे शोतो।

मसीहू थल्जी दुख उठाएच़ी

¹⁶ गेह यह्च़ा कुट्रातग, अच़िया गिह्बी मुर्ख था समझेक्तुंई; माह ता मुर्ख चेहके गिऊ सहन लंहि, ताकि थोड़े हरे गेह ला घमण्ड ले तरपोग।

¹⁷ दंङ दि बेधड़क रिंङ छिल्ला गेह कुट्रातग झांह ठ्रोह घमण्ड प्रभु दोरच़ी माह, पर ञेंई कि मुर्खता रंङ साते कुट्रातग।

¹⁸ अंऊ कि महस मीहरे दि संसारो मीहतु ठ्रोह घमण्ड लहज़ातोर, दंङ गेह ला घमण्ड लोहग।

¹⁹ केरे ता समझदार शुहचे खुशी रंङ साते मुर्ख दोतु सहन लेह केट्रातंई।

²⁰ छना कुचे अंऊ मुक्का केतिंङ अच़िया परगर बणाके केट्रा, या दू भत्ते लेहपच़े च़रच़ा अंऊ केहतु कछंङ तोह, या केतिंङ धोखा रंड्रा, या सोचेक्च़ातोर कि दोरे केहतु बे महस बेहतर तोतोर, या केहतु मोहतिंङ चटे केट्रा, दंङ केहच़ी सहन लहज़ातंई।

²¹ दंङ केतिंङ छि च़ेहसा कि गिह्बी षेह्द अपि जूंस छना कुचे गेह झांह माहलग? केहच़ी दि गिऊ नादानी चेहतेंई पर अंऊ गप्पातु पाहठी दोरे मीहरे मोह्ड़े गप्पा लहज़ातोर, गेह ला दू गप्पातु पाहठी दू ए लेह तरपोग।

²² छि दोरे ए इब्रानी शुरे? गेह ला शुगाह। छि दोरे इस्राएली शुरे? गेह ला शुगाह; छि दोरे अब्राहमो खानदानो शुरे? गेह ला शुगाह।

²³ छि दोरे ए मसीहू सेवक शुरे आ? (गेह बमजी बराबर कुट्रातग) गेह दोतु बे बढ़कर शुगाह! गेह दोतु बे महस मेहनत लाहतग, दोतु बे महस कैदी बणेंके इलिगा, महस फेरा तेंङसी शुगाह, महस फेरा गिह्बी मौतो सामना लहज़ी लेहती।

²⁴ ङा फेरा गेह यहुदी तु सेंहणातु गुह्ट्र दोरच़ी निहज़ो सह्कु, सस्कुनिज कोड़े जरिगा।

²⁵ षुमु फेरा गेह बेंतें रङ तेंङरिर; इच्च़ा फेरा रह्घ द्रले बहाएक्तिर; षुमु फेरा जहाज़ अंऊ दोऊ टोईच़ी गेह चडेक्तिग, इच्च़ा निरा ए रात गेह समुंद्रा रिंङ केहषा इलिगा।

²⁶ गेह घड़ी-घड़ी यात्रा रिंङ; बेंड़ीऊ खतरारिंङ; डाकू तु खतरारिंङ; घेंङौ जाति दोतंङ साते खतरारिंङ; ऊईजाति साते खतरा; नगरो खतरारिंङ; बंणो खतरारिंङ; समुंद्रो खतरारिंङ; हप्सी विशवासी न्वारेतु बिचंङ खतरारिंङ बंङज़िरी।

²⁷ मेहनत ए कष्ठारिंङ; घड़ी-घड़ी चेहकी बंङज़िमी; योंई ए तिस्करा रिंङ; घड़ी-घड़ी योंई बंङज़िमी थल्जी; सोईरिंङ फ्थरे बंङज़ी बे

²⁸ दंङ दि गप्पो अलावा अतु ऊई वर्णन गेह माह लहज़ातग, भत्ते कलीसिया तु चिंद हर ध्याड़ा गिह्बी तेपचा।

²⁹ अपेहल ला अरिया कमज़ोर शवात दंङ गेह हर फेरा कमज़ोर महसूस लहज़ातग। अपेहल ला अरिया पापारिंङ पड़ेके यवात दंङ गेह महसे परेशान शुहचे यवातग।

³⁰ अगर घमण्ड लहज़ी ज़रूरी तोह, ता गेह घेंङौ कमज़ोर गप्पो टोईच़ी घमण्ड लोहग।

³¹ परमेश्वर, हेंदु प्रभु यीशु मसीहू बाह अंऊ हमेशा धन्य तोह, ञेंहच़ा, कि गेह हप्सी माह कुट्रातग।

³² दमिश्क शहरा रिंङ अरितास रज्ज़ा ओ तरफे अंऊ राज्यपाल तोहई, दोई गिह्बी च़ुमज़िमी थल्जी दमिशिकयोतु नगरा रिंङ पहरा बैठाके ततो

³³ पर मित्रा ज़ि इच्च़ा मोह्ड़े टोकरी ओ अन्द्रेग इच्च़ा लम्हें राह्शी छ़ुह्च़ी ते गिह्बी दोर बिठाके च़रतिर दंङ दोबि भिती ऊ इच्च़ा कलतु ज़रिया शहरो ओ धहकते धरती रिंङ तकशे च़रतिर।