2 कुरिन्थियों 10 - लाहौली बाइबिल

आत्मिक लड़ाई

¹ गेह दू ए पोलुस शुगाह अंऊ केहतु तुईज़ी डरपोक तोतोग, पर थाह्को थले केहतु हखा याहब लहज़ातग; गेह केतंङ साते मसीहू नम्रता, दंङ नगी शुहचे निवेदन लहज़ातग।

² गेह दि बिनती लहज़ातग, कि रें मीहच़ी कुहषी तातोर कि ञेंरे दि संसारो मीहतु ठ्रोह कम लहज़ातंई। झांह लेह अपेहल गेह अपोग दंङ गिह्बी उम्मीद तोह कि गिह्बी दोतंङ साते डगडग शुहचे लेह्पोतो। गेह पक्‍का शुहचे निवेदन लहज़ातग कि अपेहल गेह अपोग दंङ गिह्बी केतंङ साते झांह ठ्रोह व्यवहार लहज़ी जूंशी माह।

³ छना कुचे अगर हेनर दि संसारारिंङ बंङज़ातंई, तांला हेनर हेंदु बैरी तंङ ध्वांए ठ्रोह तेंङज़ातंई माह छना दि संसारो मीहरे तेंङज़ातोर।

⁴ छना कुचे ञेंरे झांह ठ्रोह हथियार तेंङज़ातंई अंऊ दू हथियार बे शत्‌ह तोह, अंऊ दि संसारो मीहरे इस्तेमाल लहज़ातोर। पर दोंङार दह्च़िमी थल्जी परमेश्वरो सामर्थ तोह।

⁵ हेनर हेंदु कल्पनारे, दंङ हर इच्च़ा जोरे गप्पा बि, अंऊ परमेश्वरो पहचानो विरोधारिंङ खड़े शवात, खण्डन लहज़ातंई; दंङ हर इच्च़ा भावनाओ टोईच़ी कब्ज़ा लहच़ी मसीहू आज्ञाकारी बणेंके केट्रातंई।

⁶ दंङ तेयार बंङज़ातंई कि अपेहल केरे भत्ते पाहठी मसीहू आज्ञाकारी शुहचे योंई, दंङ तोग हर इच्च़ा पाहठी आज्ञा माह मनेक्च़िमी दू मीहबी सज़ा रांई।

पोलुसो अधिकार

⁷ केरे धकते कि दिखावट खंड्रातंई, अंऊ टिरो तुईज़ी तोह, अगर अतुआ एनोह टोईच़ी दि विशवास तोह, कि गेह मसीहऊ शुगाह, दंङ दोई दि ला ञेंए च़रतु, कि छना दू मसीहऊ शुह, ध्वांए ञेंरे ला मसीहू शुई।

⁸ छना कुचे अगर गेह दू अधिकारो पाहठी ऊई ला महस घमण्ड लोहग, अंऊ प्रभु ज़ि केहतु विशवास नाश लहज़िमी थल्जी मशत पर केहतु विशवास बढ़ाएच़िमी थल्जी मदत लहज़िमी थल्जी हेंदिंङ रांहषी तोह, दंङ गेह षेहपोग माह।

⁹ दि गेह दिऊ थल्जी कुट्रातग, कि डाकतु दोरच़ी केतिंङ बेई लहज़ा माह ठहरेसोग।

¹⁰ छना कुचे रें मीहच़ी कुट्रातोर, “दोऊ डाकर ता गंभीर ए प्रभावशाली शवाहतोर; पर अपेहल दू एनेह अपत, दू मुक्का दोऊ फुक कमज़ोर तंङफा दंङ दोऊ गप्पा लहज़िमी शाक्ति ना ओ बराबर तोह।”

¹¹ झांह लेह अंऊ दोई झांह कुट्रा, कि दोई दि समझेकी तोह, कि छना थाह्को थले डाको तु अन्द्रेग ञेंहतु वचन तोह, ध्वांए केहतु तुईज़ी ञेंहतु कम ला शोरे।

पोलुसो अधिकारो दाईरा

¹² छना कुचे ञेंतिंङ दि याहब माह कि ञेंरे हेंदु तुलना दोतंङ साते गिनती लोहनि, या दोतंङ साते हेनर ठ्रोहका शोनि, अंऊ एनोह षटणा लहज़ातोर, दंङ एनाबि एनातु ए बिचंङ नाप तोल लहज़ा इदि-अई दिरंङ साते तुलना लहज़ा मुर्ख शोर।

¹³ हेनर ता दू कम बे धह्कते अंऊ परमेश्वरे हेंदिंङ रांहषी तोह घमण्ड बिल्कुल ला माह लोहनि, पर दोर तचेक ए अंऊ परमेश्वरे हेंदु थल्जी ठहरासी तोह, दंङ दोरिंङ केरेला अच़ा अंज़े तोतोंई, दंङ दोऊ ए हिसाबे घमण्ड ला लोहनि।

¹⁴ छना कुचे ञेंरे दोऊ सीमा बे धहकते हेंदिंङ बड़ाएच़ी माह जुंज़ातंई, छना कि केहतु कछंङ पिपिमी मेह हालातरिंङ शवाह, पर केतिंङ मसीहू रूठे खबर सुनाएच़िमी थल्जी कुरिन्थुस शहर तचेक सफर लहज़ा ञेंरे मुण्डो मीहरे तोईनी।

¹⁵ दंङ ञेंरे सीमा बे धहकते ऊईतु मेहनतो टोईच़ी घमण्ड माह लहज़ातंई; पर ञेंतिंङ उम्मीद तोह कि, छना-छना केहतु विशवास बढ़ेक्पा लोहतो ध्वांए-ध्वांए ञेंरे हेंदु सीमाऊ हिसाबे केहतु बिचंङ महस कम लहज़िमी थल्जी बणेंके योंई।

¹⁶ कि ञेंरे केहतु सीमा बे तुंखा शुहचे ऊईतार ओ ठहरि रिंङ ला रूठे खबर सुनाएपोंई, दंङ दि मशत कि, ञेंरे ऊईतु सीमाऊ अंदरेग बणाएषी कमो टोईच़ी घमण्ड लोहनि।

¹⁷ पर छना पवित्रशास्त्रारिंङ च़ेहसी तोह, “अगर अच़िया घमण्ड लेह जुंज़ा ता दोई प्रभु टोईच़ी घमण्ड लोह।”

¹⁸ छना कुचे अंऊ दोई एनोह षटणा लहज़ा, दू मशत, पर अतु बढ़ाई प्रभु ज़ि लहज़ा, दू ए प्रभु नज़रा रिंङ रूठे तोह।