2 कुरिन्थियों 1 - लाहौली बाइबिल

अभिवादन

¹ गेह, पोलुस दि डाक च़ेहच़ी लेहकी तोतोग। गेह परमेश्वरो हिटी रंङ यीशु मसीहू प्रेरित शुगाह। दंङ हेंदु साथी विशवासी तीमुथियुसो तरफे परमेश्वरो दू कलीसिया बि च़ेहच़ी लेहकी तोतोग अंऊ कुरिन्थुस नगरंङ तोह, दंङ परमेश्वरो भत्ते मीहतिंङ अंऊ अखाया ओ नगरंङ बंङज़ातोर।

² गेह प्रार्थना लहज़ातग कि हेंदु बाह परमेश्वर, ए प्रभु यीशु मसीहू दोरच़ी केतिंङ मोह्ड़े दाह ए शांति खोकसा लोहतो।

परमेश्वरो धन्यवाद लहज़ी

³ हेंदु प्रभु यीशु मसीहू बाह परमेश्वरो स्तुति शुहबी जूंस, अंऊ दयाऊ बाह, दंङ हेंदिंङ हमेशा तसल्ली रंड्रा।

⁴ परमेश्वर हेंदिंङ हेंदु भत्ते मुसीबता रिंङ तसल्ली रंड्रा। हेनर ऊईतिंङ ध्वांए ठ्रोह तसल्ली रें तरपोंई छना परमेश्वरे हेंदिंङ तसल्ली रंड्रा।

⁵ छना कुचे मसीहू दुखारिंङ हेनर भागीदार शवातंई, ध्वांए हेंदु तसल्ली ओ थल्जी मसीहू दोरच़ी महस भागीदार शवातंई।

⁶ अगर हेनर क्लेश खोकच़ातंई, दंङ दि केहतु शांति ए उद्धारो थल्जी शुह; दंङ अगर शांति खोकच़ातंई, दंङ दि केहतु शांति ओ थल्जी शुह; अतु प्रभावरंङ साते केरे धीरज़ारंङ साते दू दुख ला ज़कि केट्रातंई, अंऊ ञेंहच़ी ला सहन लहज़ातंई।

⁷ दंङ ञेंहतु उम्मीद केहतु पाहठी पक्‍का तोह; छना कुचे ञेंहच़ी ञेंच़ातंई छना ठ्रोह केरे ञेंहतु दुखारिंङ भागीदार तोतोंई, ध्वांए ठ्रोह केरे ञेंहतु तसल्ली रिंङ ला भागीदार तोतोंई।

⁸ हे गिऊ साथी विशवासी रे, गेह जुंज़ातग कि केरे दू परेशानी तु पाहठी ञेंई च़रतुंई अंऊ आसिया नगरंङ ञेंहतु टोहकठे अंदे, दू महस मोह्ड़े ए ञेंहतु सहन शाक्ति बे मोह्ड़े तोहई, देर तचेक कि ञेंहच़ी श्रींङमी बि उम्मीद ए छोड़ेके चरच़ातेंई।

⁹ यानि कि ञेंहतिंङ झांह चेहसाते, कि ञेंरे सिमी ए तातंई दि दिऊ थल्जी शुई कि हेनर हेंदु थल्जी मशत पर परमेश्वरो टोईच़ी विशवास पक्‍का तोहनि, अच़ि सिमी दोई ला श्रींङमी लहज़ा।

¹⁰ दोई ए हेनर सिमी मोह्ड़े मुसीबतो दोरच़ी बचाएति, ए बचाएपोतो; दंङ दोऊ टोईच़ी हेंदु दि उम्मीद तोह, कि दू तुंखा ला बचाएपा लोहतो।

¹¹ छना कुचे अपेहल केरे ञेंहतु थल्जी प्रार्थना लहज़ातंई दंङ केरे ञेंहतु मदत लहज़िमी थल्जी जुड़ेके य्वातंई। अंऊ आशीष महसे तु दोरच़ी ञेंहतिंङ खोकसिरी, दोऊ वहज़ा ज़ि महस मीहरे ञेंहतु तरफे धन्यवाद लंहि।

रूठे अन्तरात्मा

¹² छना कुचे हेंदिंङ इच्च़ा गप्पो माह घमण्ड तोह, हेंदु अन्तरात्मा हेंदिंङ विशवास रंड्रा कि हेंज़ी मीहतंङ साते छि बर्ताब लहसी तातंई, दू संसारो मीहतु बुद्धिमानो हिसाबे मशत, पर दू सच्चाई ए ईमानदारीऊ हिसाबे तोहई अंऊ परमेश्वरो कृपा ओ वरदान तोहई।

^13-14 ञेंरे केतिंङ सिर्फ दू ए चेहच़ातंई अंऊ केहच़ी पढ़ेकी ए समझेगी तरच़ातंई। हालांकि हेंतेग केरे ञेंहतिंङ रूठे रंङ समझेक्सी माहरच़ातंई गिह्बी उम्मीद तोह कि केरे ञेंहतिंङ रूठे रंङ समझेगी तरपोंई, ताकि हेंदु प्रभु यीशु यह्च़ा अपिमी थल केरे ञेंहतु टोहकठे ध्वांए ए घमण्ड लोहनि छना ञेंरे केहतु टोहकठे घमण्ड लहज़ातंई।

पोलुसो सफरो योजना ओ थल्जी बदलाव

¹⁵ गिह्बी उम्मीद तोहई कि काह गिह्बी समझेगी तरपोन दंङ दिऊ थल्जी गेह कनिंङ भत्ते बे मुण्डा दोईमी सकिम लहतेग। झांह ठ्रोह केतिंङ गिऊ दोरच़ी झुह्ट पाहठी सफरो आशीष खोकच़ातंई।

¹⁶ गिऊ योजना तोहई कि गेह केहतु कछंङज़ि शुहचे मकिदुनिया शहरो हखा योग, दंङ यह्च़ा मकिदुनिया दोरच़ी वापिस अंज़े केहतु कछंङ अपोग; ताकि गेह केतंङ साते यहुदिया शहरो यात्रा ओ थल्जी मदत खोकपोग।

¹⁷ झांह लेह अपेहल गेह इच्च़ा योजना बणाएतिग दंङ छि गेह लापरवाही लहरिगा? या छि लेह जुंज़ातग छि संसारारिंङ मीहतु ठ्रोह लहज़ातग आ, कि अंऊ इच्च़ा टेमारिंङ वोई दंङ थले नाह कुट्रातोर।

¹⁸ छना ठ्रोह परमेश्वर सच्चा तोह, अंऊ ञेंहच़ी केतंङ साते कुट्रातंई दू हमेशा हेले तोह छना वोई ओ मतलब “वोई” दंङ “माह” ओ मतलब “माह” ए शुहबी।

¹⁹ छना कुचे परमेश्वरो योह यीशु मसीह अतु हेंदु दोरच़ी मतलब गिऊ ए सिलवानुस, ए तीमुथियुसो दोरच़ी केहतु बिचंङ प्रचार शुई, दोर्तिंङ, “वोई” ए “माह” झुल्ला माह तोहई; पर देहर तिंङ “वोई” ओ “वोई” शुहचे तोह।

²⁰ परमेश्वरो भत्ते वाईदा मसीह रिंङ “वोई” रंङ साते तोह। दंङ झांह लेह हेंज़ी “अमीन” कुट्रातंई कि, ताकि हेंदु दोरच़ी परमेश्वरो महिमा शोतो।

^21-22 परमेश्वर ए तोह, अंऊ केतंङ साते ञेंतिंङ मसीहरिंङ ढकाह लहज़ा। परमेश्वर हेंदु टोहकठे मोहर लगाके बयाना ओ रूपा रिंङ एनोह आत्मा हेंदु सेहमरिंङ केहच़ी हेंदु अभिषेक लहरी।

²³ परमेश्वर गिऊ दि सच्चाई गेह गवाह तोह कि गेह यह्च़ा कुरिन्थुस शहरंङ दिऊ थल्जी माह अतिगा कि गेह केतिंङ दुख रंड्री माह जुंज़ातेग।

²⁴ दिऊ मतलब दि माह शुह कि ञेंरे केहतु विशवास ओ टोहकठे घेंङौ अधिकार जताएपोग, छना कुचे केरे केनातु विशवासरिंङ पक्‍का बणेंके बंङज़ातंई। पर ञेंरे ता केहतु खुशी रिंङ भागीदार तोतोंई।