1 तीमुथियुस 6 - लाहौली बाइबिल

¹ अंयों विशवासी मीहरे गुलाम तोतोर, दोतिंङ भत्ते तरफे एनातु-एनातु मालिको आदर लेह जूंशी तोह, ताकि ऊई मीहरे परमेश्वरो ए हेंदु शिक्षा ओ अपमान लेह माह जूंस।

² दंङ अतु मालिक विशवासी तोतोर दितिंङ दोरे न्वा ञेंइनि दंङ दोतु आदर लेह जुंशी तोह, बल्कि ऊई ला रूठे तरीका रंङ दोतु सेवा लहज़ी जुंशी तोह, छना कुचे दोतु कमो फायदा उठाएच़ा विशवासी तोतोर, अंऊ दोतिंङ दोच़ी मसीह रिंङ न्वा ओ बराबर दाह लहज़ातोर केई दि गप्पो शिक्षा ए उपदेश रम्मा लोह।

हप्सी शिक्षा ए ढबोह लालच

³ अगर अरिया हप्सी शिक्षा रंड्रा, दंङ हेंदु प्रभु यीशु मसीहू रूठे शिक्षा ए परमेश्वरो भक्ति रंङ सहमत माह शवाह।

⁴ दंङ दुह घमण्डी शुह, दंङ छल्ले माह ञेंहच़ा; झांह ठ्रोह मीह बहसबाज़ी ए बेकारो गप्पारिंङ झगड़ा लहज़ी जुंज़ा, अतु नतीज़ा जलन, ए झगड़ा, निन्दा ओ गप्पा ए मदम शक लहज़ी,

⁵ दंङ झांह ठ्रोह मीहतु बिचंङ हमेशा झगड़ा शवाह, अंऊ दोतु बुद्धि भ्रष्ट शुहचे इलजी तोह, दंङ दोरे सच्चाई बि समझेगी माहरच़ातोर, दंङ दोच़ी सोचेक्च़ातोर कि परमेश्वरो सेवा लहज़ी साहुकार बणेक्पिमी तरीका शुह।

⁶ पर हेंदु थल्जी दि रूठे तोह, कि ञेंहच़ी दुह लोहनि अतंङ साते परमेश्वर खुश शवाह दंङ दोरंङ सन्तुष्ट बंङज़ोंई अंऊ दोई हेंदिंङ रंड्रा।

⁷ छना कुचे अपेहल हेनर जेह्क्तेंई दंङ हेंज़ी छल्ले माह ञेंहनि, दंङ माह ए छा रेंज़ा शिलजि तरपोंई अपेहल हेनर सिओनि।

⁸ दंङ अगर हेंदु कछंङ ज़ेइमी ए लेहच़िमी तोह ता दंङ दिरिंङ ए सन्तुष्ट बङज़ोईं।

⁹ पर अंऊ साहुकार शुहबी जुन्ज़ातोर, दोरे भत्ते पाहठी पाप लहज़िमी थल्जी युरनाह धोखा रंड्रातोर दंङ इच्च़ा जानवरो ठ्रोह फंदारिंङ फसेके यवातोर दोरे दुह कम लहच़ी जुन्ज़ातोर अंऊ दोतु थल्जी मुर्ख ए खतरनाक तोह दंङ दि हिटी दोतिंङ बरबाद लेह केट्रा दंङ पूरी तरह नाश लेह केट्रा।

¹⁰ छना कुचे ढबाहो लालच भत्ते पाहठी बुराई ओ जड़ शुह, रें मीहच़ी सूले-सूले मसीहू शिक्षाओ टोहकठे विशवास लहज़ी बंद लेह केहतोर, छना कुचे दोरे ढबाह बि महस जुन्ज़ातेर, दंङ दोरे महस पाहठी दुखी तोतोर, इच्च़ा झांह ठ्रोह मीह अच़ि एनाबि इच्च़ा हथियार तिरच़ी चरच़तो।

तीमुथियुस बि व्यक्तिगत हुकुम

¹¹ पर हे तीमुथियुस, कांह परमेश्वरो मीह शुनाह, कनिंङ दि भत्ते चीज़ लहच़िमी दोरच़ी बचेक्पी जूंशी तोह, दंङ धर्मिकता, भक्ति, विशवास, दाह, धीरज़, ए नम्रता रिंङ लेहकी बंङज़ु।

¹² छना इच्च़ा रूठे सेनिक लड़ाई रि अपेहल ला हार माह मनेक्च़ा, ध्वांए कनिंङ ला, परमेश्वरो टोहकठे विशवास लहज़ी ए दोऊ हुकुम मनेक्च़ी अपेहल ला ब्याड़ा लहज़ी माह जूंस ताकि कांह ईनामो रूपारिंङ दुह अनंत जीवन खोकपोन, अतु थल्जी परमेश्वरे कांह बुलासी तोतोन, दंङ अपेहल केई महस मीहतु तुईज़ी साफ-साफ कुहतेन कि कांह मसीहू टोहकठे विशवास लहज़ातन।

¹³ परमेश्वरो तुईज़ी अंऊ भत्ते तिंङ ज़िंदगी रंड्रा, दंङ यीशु मसीह अंऊ पुन्तियुस पिलातुस ओ तुईज़ी एनोह पाहठी हेले कुहते, दोकु झुल्लो हाज़िरी रिंङ, गेह केतिंङ दि हुकुम रंड्रातग।

¹⁴ कि केई दुह भत्ते लोह अपि पूरी रीतिरंङ साते लहच़िमी थल्जी परमेश्वरे कनिंङ हुकुम रांहषी ततो, ताकि अरिला प्रभु यीशु मसीहू यह्च़ा वापिस अपिमी तचेक कांह टोहकठे छल्ले गलत लहज़िमी दोष माह लगासी तरपोतो।

¹⁵ परमेश्वर, अंऊ इच्च़ा ए झांह ठ्रोह रज्ज़ा तोह अंऊ तरीफो जोगे तोह, रज्ज़ा तु रज्ज़ा ए प्रभु तु प्रभु तोह। दोई ए ठीक टेमारिंङ मसीह बि प्रगट लोहतो।

¹⁶ सिर्फ दुह ए तोह अंऊ हमेशा ओ थल्जी श्रींङी तोह, दुह धोंण चमकदार छंङीरिंङ बंङज़ा, कि अरिला दोऊ कछंङ अपि मरछा, माह ता दोबि अच़िया मीह खंड्री तरपोतो। दोऊ महिमा ए सामर्थ युगानयुग बंङज़ोतो। अमीन।

¹⁷ दि संसारो साहुकारातिंङ हुकुम रांई कि दोरे घमण्डी थाशुंई दंङ एनोह ढबोह टोहकठे विशवास तंही अंऊ कि महस टेम तचेक माह बंङज़ोतो, पर परमेश्वरो टोईच़ी विशवास लोह, अंऊ हेंदु सुखो थल्जी भत्ते धिर महस रंड्रा।

¹⁸ दोतिंङ भलाई ऊ कम लहज़िमी थल्जी कुह, दंङ ऊईतु थल्जी छिल्ला ज़रूरत तोह दोबि महस खुले सेहमे दान रम्मा लंहि।

¹⁹ अगर दोच़ी झांह लहज़ातोर, दंङ दि झांह तोह छना दोरे स्वर्गारिंङ एनोह ढबाह ठ्रोका लहज़ातोर अंऊ अपेहल योंहषतो माह, दंङ दोरे सच्चा जीवन खोकपोरे अंऊ हमेशा ओ थल्जी तोह।

²⁰ हे तीमुथियुस अंऊ कम परमेश्वरे कनिंङ रांहषी ततो दोतु रखवाली लोह। झांह ठ्रोह भक्तिमेह ए मुर्खता ओ गप्पा ए शिक्षा ओ दोरच़ी ऊईतार बंङज़ु अंऊ परमेश्वरो सच्चे शिक्षा ओ विरोध लहज़ातोर, अतिंङ दोच़ी गलत तरीका रंङ साते “शिक्षा” कुट्रातोर।

²¹ रें मीहच़ी दि हप्सी शिक्षा बि ग्रहण लेह केहतोर, दंङ झांह लेह, दोच़ी हेले शिक्षा ओ टोहकठे विशवास लेह छोड़ेके केहतोर। गेह प्रार्थना लहज़ातग कि परमेश्वरो मोह्ड़े दाह केतंङ साते बणेंके बंङज़ोतो।