1 तीमुथियुस 5 - लाहौली बाइबिल

विशवासी तु बारे ज़िम्मेवारी

¹ अरिला यङदे मीहबी अपमान लहज़िमी ठ्रोह रैहचु था पर दोबि केनोह बाह ओ बराबर चेहके आदरा रंङ समझाएक्तुंई, दंङ जवानातिंङ केनातु न्वा चेहके सलाह रांई।

² दंङ यंङज़ा तिंङ केनातु याह चेहके सलाह रांई; दंङ जवान मेच़िमीतिंङ शुद्ध सेहमे, ध्वांए वर्ताब लंहि, कि दोरे कांह ए रिंङ शोर।

³ दुह रंणी मेच़िमी तु आदर लोह, अतु कछंङ दोतु देखभाल लहज़ा अरिला माह।

⁴ दंङ अगर अतुआ रंणी मेच़िमी ऊ कटु ए जोह्तर पोत्रारारे शोर, दंङ दोरे तुहई एनोह ज़िम्मेवारी पूरा लोहतो, छना इच्च़ा विशवासी बि लेह जूंशी तोह, झांह लेह एनोह याह-बाह ए नाना-नानी देखभाल लहच़ी दोतु थल्जी छा लोहतो। छना कुचे परमेश्वराबि दिए रूठे च़ेहसी।

⁵ दुह रंणी अतु देखभाल लहज़ा अरिला माह, परमेश्वरो टोहकठे ए उम्मीद तहच़ा, दंङ रात-दिन बिनती ए प्रार्थना लहज़ा परमेश्वरो हखा एनोह थल्जी मदत पेट्रा।

⁶ पर दुह रंणी मेच़िमीर अंऊ एनोह भत्ते टेम ऐश-आरामा रिंङ हुंच़ातेर, दोरे फुकारिंङ ता श्रींङे तोतोर पर आत्मिक रूपारिंङ सिए तोतोर।

⁷ विशवासीतिंङ दि गप्पातु ला हुकुम रम्मा लंहि ताकि अच़िला दोतु टोईच़ी दोष लगाएच़ी माहरपोतो।

⁸ पर अरिया एनोह नातातु, खासकर एनोह टबरातु देखभाल माह लोहतो, दंङ दोई विशवास छोड़ेके केहतो, दंङ अविशवासी बे ला मदम बड़ेकी इलज़ा।

⁹ केहच़ी दुह रंणी मेच़िमी मिन दर्ज लंहि अतु उम्र षुमु निंज़ो साह साल बे महस शोतो, दंङ दुह एनोह गगसा रंङ साते वफादार शोतो।

¹⁰ दंङ एनोह रूठे कमो वहज़ा ज़ि दोऊ मिन शोतो, मतलब अच़ि एनोह कटुतु पालन-पोषण रूठे रंङ लहसी शोतो, दंङ पौहना तु सेवा लहसी शोतो, दोई ऊई विशवासी तु सेवा इच्च़ा परगरो ठ्रोह लहसी शोतो, दंङ दुखी मीहतु सेवा लहसी शोतो, दंङ हर पाहठी ऊ रूठे कमरिंङ सेहम लेहकी शोतो।

¹¹ पर जवान रंणी मेच़िमी तु मिन दर्ज थालांही, छना कुचे अपेहल दोतु फुको हिटी इच्च़ा रंणी मेच़िमी रूपारिंङ मसीहू सेवा लहज़िमी वाईदा रंङ साते महस पक्‍का शुहचे यवाह, दंङ दू यह्च़ा ब्याह लहच़ी जुंज़ा,

¹² झांह लेह दोई एनाबि दोषी बणाके च़रच़ा, छना कुचे दोच़ी एनोह दोबारा ब्याह माह लहज़िमी मुण्डो वाईदा माह तहरिर।

¹³ दंङ दिरंङ साते ए साते दोरे चुंङ-चुंङ इलज़ा सुस्त शुहबी सीखेच़ा, पर सिर्फ सुस्त माह शुह चुगली ला लहज़ातोर, दंङ ऊईतु कमरिंङ दखल रंड्रातोर दंङ झांह ठ्रोह गप्पा कुट्रातोर अंऊ दोतिंङ लेह माह जूंस।

¹⁴ झांह लेह गेह दि सलाह रंड्री जुंज़ातोग कि जवान रंणी ब्याह लेह च़रतु, दंङ कटुरे पैदा लेह घरबार सोटेक्तु, दंङ ऊई अरिया विरोधी बि बदनाम लहच़िमी मोका थारांई।

¹⁵ छना कुचे रें जवान रंणी तुहई ए परमेश्वरो दोरच़ी शत्‌ह शुहचे इलजी तोतोर दंङ दोऊ वहज़ा ज़ि शेतानो थले शुहचे इलजी तोतोर।

¹⁶ अगर अरिया विशवासी मेच़िमी ऊ टबरातु बिचंङ रंणी तोतोर, दंङ दोबि एनोह रंणी तु ज़रूरत पूरा लहज़िमी ज़िम्मेवारी कलीसिया बि रंड्री माह जूंस। ताकि कलीसिया दुह रंणी तु ज़रूरत पूरा लेह तरपोतो अतु कछंङ दोतु मदत लहज़ा ऊई अरिला माह।

बचन सिखाच़ा सेंहणा ओ आदर

¹⁷ अंऊ कलीसिया ओ सेंहणार एनोह कम रूठे रंङ लहज़ातोर, दोरे सही आदर ए सही मज़दूरी खोकच़िमी जोगे मनेक्तुंई, खासकर दोरे मीहरे अंऊ परमेश्वरो खबर ए बचनो प्रचार लहज़िमी थल्जी खास मेहनत लहज़ातोर,

¹⁸ छना कुचे पवित्रशास्त्र रिंङ इच्च़ा ठहरिंङ दि च़ेहसी तोह, “क्युर्पा बंङों आह थाह छुरेन, छना कुचे दोई ए दोबि तेयार लहज़ा।”

¹⁹ अगर अरिया कलीसिया ओ सेंहणा ऊ खिलाप पाप लहच़िमी दोष लगाएपोतो, दंङ धोंण तचेक दोबि था मनेक्तुंई, अपेहल तचेक झुह्ट या षुमु मीहरे इच्च़ा गप्पा ओ दोष लगाएपोर माह।

²⁰ अंऊ मीहच़ी पाप लहज़ातोर, कनिंङ दुह मीहतिंङ भत्ते विशवासी तु तुईज़ी रैहच़ी जूंशी तोह, ताकि ऊई विशवासी ला पाप लहच़िमी रंङ साते बेऊर।

²¹ गेह परमेश्वर ए यीशु मसीह, दंङ अंङषी स्वर्गदूतातु हाज़िर ञेंए ते, गेह कनिंङ हुकुम रंड्रातग कि केई छिल्ला लहज़ातन, दोरिंङ अरिला मीहू थल्जी पक्षपात मेह कम लोह।

²² अतुआ टोहकठे गुह्ट्र केट्रा दोबि सेंहणा ओ थल्जी अंङे था च़रतु। अगर केई झांह लहज़ातन ता कांह दोऊ पापो थल्जी ज़िमेवार शोन। मदम गप्पो दोरच़ी केनाबि शत्‌ह तोह।

²³ केरे हेंतेग बे सिर्फ ति ए तुंङज़ंई पर केनोह घड़ी-घड़ी टेहषी शुहबिमी वहज़ा ज़ि थोड़े-थोड़े दाख रस औषद्धो हिसाबे तुंङमा लोह।

²⁴ गेह करंङ साते कुट्रातग कि कलीसिया ओ सेंहणा अंङड्रीमी थल्जी जल्दबाज़ी था लोह, छना कुचे रें मीहच़ी खुले आम पाप लहज़ातोर देर तचेक कि न्याय शुहबिमी तुहई ए दोरे विशवासी तु तुईज़ी दोषी तोईरे। पर रें मीहतु पाप महस टेम तचेक तुईज़ी माह अपा।

²⁵ ध्वांए ठ्रोह, अपेहल मीहच़ी रूठे कम लहज़ातोर, दंङ दुह ऊई विशवासी तु तुईज़ी प्रगट शवाह, अगर माह तोर, दंङ दोरे महसे तचेक ब्याके ला मरच़ि।