1 तीमुथियुस 4 - लाहौली बाइबिल

हप्साड़ शिक्षक

¹ पवित्र आत्मा साफ तरीका रंङ साते कुट्रा कि अंतिम ध्याड़ारिंङ रें मीहरे मसीहू शिक्षा ओ टोहकठे विशवास लहज़ी छोड़ेके दोरे मांजी आत्मा तु शिक्षा स्वीकार लोहर, अंऊ दोतिंङ भटकाएच़ा दंङ दुह हप्सी शिक्षाओ टोईच़ी विशवास लोहर अंऊ मांजी आत्माओ दोरच़ी अपा।

² दोरे हप्सी शिक्षा रंड्रा धोखेबाज़ शुहबी दोरे दि गप्पा माह ञेंहच़ातोर कि दोरे सही लहज़ातोर या गलत, ठीक ध्वांए अंऊ दुह शाह रिंङ छल्ले महसूस माह शुहबी, अंऊ अच़िया ट्रोट्रे निह्लाम रंङ साते रोह्चे केट्री।

³ दुह हप्सी मीहच़ी सिखाएच़ि कि ब्याह लेह ए रें बगत ज़ेई गलत तोह। पर परमेश्वरे हर पाहठी ओ बगत विशवासी तु थल्जी बणाषी शुह, अंऊ हेले ऊ शिक्षा ञेंहच़ातोर, कि धन्यवाद ओ प्रार्थनो थल बगत ज़ंई।

⁴ छना कुचे परमेश्वरो बणाएषी भत्ते चीज़ रूठे तोह, ञेंरे भत्ते पाहठी ओ बगत ज़ै तरपोंई पर परमेश्वरो धन्यवाद लहज़ा ते ज़ै तरपोंई;

⁵ छना कुचे परमेश्वरो वचन ए प्रार्थना दोरच़ी शुद्ध शुहचे यवात।

मसीह यीशु ऊ रूठे सेवक

⁶ अगर कांह भत्ते विशवासीतिंङ लगातार दि हिद गप्पा सिखाएपोंई कि अतु गेह कनिंङ सिखाएकातग, दंङ कांह विशवासो खबरो दोरच़ी ए रूठे शिक्षाओ दोरच़ी पक्‍का लेह केहनि, अतिंङ केई मनेक्च़ातंई, दंङ कांह यीशु मसीहू इच्च़ा रूठे सेवक शुनाह।

⁷ पर दुह बनावटी कथारिंङ केनातु टेम बरबाद थालंही, अंऊ दोरच़ी परमेश्वराबि आदर माह खोकसा। बल्कि हेंदिंङ लगातार सिखासी जूंस, कि हेंदु जीवनो दोरच़ी परमेश्वराबि छना आदर रमोंई।

⁸ छना कुचे फुको कसरत ओ थोड़े फायदा तोह, पर परमेश्वरो भक्ति ओ कसरत भत्ते गप्पो थल्जी फायदेमंद तोह, छना कुचे दि इच्च़ा मीहबी ईनाम रंड्रीमी वाईदा लहज़ा अपेहल दुह दि धरती रिंङ श्रींङी बंङज़ा दंङ सिमी थल ला।

⁹ दंङ दि गप्पा हेले ए हर पाहठी रंङ मनेकच़िमी जोगे तोह।

¹⁰ ञेंरे दि जीवन खोकच़िमी थल्जी ञेंहच़ी मेहनत ए कोशिश दिऊ थल्जी लहज़ातंई कि हेंदु उम्मीद दू श्रींङे परमेश्वरो टोहकठे तोह; अंऊ भत्ते मीहतु खासकर विशवासी मीहतु उद्धार लहज़ा शुह।

¹¹ केई दि गप्पो शिक्षा, हुकुम रंड्रा विशवासीतिंङ सिखाएच़ा लोहु।

¹² अच़िया काह तुच्छ (बेकार) समझेक्सी माह जूंस छना कुचे काह जवान तोतोन पर कांह बोल-चाल ए चाल-चलनारिंङ, ऊईतु थल्जी दाह रिंङ मसीहू टोहकठे कनु विशवासरिंङ दंङ कनु निर्दोष जीवनारिंङ, विशवासी मीहतु थल्जी इच्च़ा उदाहरण बणेंक्तु।

¹³ गिऊ दोर पिचा तचेक विशवासी तु थल्जी पवित्रशास्त्र जोरे पढेक्पी ए याहब रंड्री ए पवित्रशास्त्रा बि सिखासी ए समझासी लेहकी बंङज़ु।

¹⁴ दुह वरदानो थल्जी अंऊ भविष्यवाणी ओ दोरच़ी कनिंङ कलीसिया ओ सेंहणा तु गुह्ट्र केट्रिमी मुक्का कनिंङ खोकसते, दोबि लगातार कनिंङ इस्तेमाल लेह जुंशी तोह।

¹⁵ दि गप्पारे लोहवा लोह दंङ दिरिंङ खास ध्यान रम्मा लोह, ताकि हर इच्च़ा दि खमतो कि कांह केनोह विशवासी जीवनारिंङ बड़ेक्पी लेहकी तोतोन।

¹⁶ दि पाहठी खबरदार बंङज़ु कि कांह छना बंङज़ातन दंङ छि सिखाएक्च़ातन, दि गप्पारिंङ पक्‍का बंङज़ु, छना कुचे अगर झांह लोहवा लोहन, दंङ दिऊ नतीज़ा दि शोतो कि कांह दोरच़ी परमेश्वर एनेह कनिंङ ए कनिंङ रेड्रा दोतिंङ न्यायो दोरच़ी बचाएपोतो।