1 तीमुथियुस 3 - लाहौली बाइबिल

कलीसिया रिंङ मुख्या (बिशप)

¹ दि गप्पा हेले तोह कि अगर अरिया कलीसिया ओ सेंहणा शुहबी जुंज़ा ता दोई रूठे कम लहच़िमी हिटी तहज़ा।

² दंङ दि ज़रूरी तोह कि कलीसिया ओ मुख्या बि दि गुण शुहबी जूंस, कि दुह निर्दोष शुहबी जूंस, दंङ इच्च़ा मेच़ो गगसा शुहबी जूंस, हर हालातरिंङ एनोह टोहकठे काबू लहज़ा, रूठे, ए पौहना तु आदर लहज़ा, दंङ परमेश्वरो बचन रूठे रंङ सिखाएच़ा शुहबी जूंस।

³ दुह इच्च़ा शराबी मीह या झांह ठ्रोह शुहबी मेस अंऊ हमेशा लड़ाई लहज़ी बंङज़ा, पर दयालु ए शांत स्वभावो मीह शुहबी जूंस, दंङ माह ए ढबाहो लालची शुहबी जूंस।

⁴ दुह एनोह टबरातिंङ रूठे रंङ चलाच़ा ठ्रोह शुहबी जूंस, दंङ दोबि एनोह कटुतिंङ सिखासी जूंस कि दोरे भत्ते गप्पा रिंङ आदरा रंङ साते दोऊ हुकुमो भाषे लोहर।

⁵ अगर अरिया एनोह टबरातिंङ रूठे रंङ चलाच़ी माह ञेंहच़ा, दंङ दुह परमेश्वरो कलीसियाओ रखवाली छना लेह तरपोतो?

⁶ दुह इच्च़ा पक्‍का विशवासी शुहबी जूंस, माह ता शुहबी तरपोतो कि दुह घमण्डी शुहचे योतो, दंङ दोबि दुह सज़ा खोकसोतो अंऊ शेतान बि खोकसते।

⁷ दि ला ज़रूरी तोह कि अविशवासी मीहतु बिचंङ ला दोऊ आदर शोतो, झांह शुहबी मेस कि दोऊ बदनामी शोतो दंङ दुह शेतानो फंदारिंङ फसेगी योतो।

सेवको (डिकन) काबलियत

⁸ ध्वांए कलीसिया ओ सेवकातिंङ ला शुहबी जूंस अतु आदर मीहच़ी लोहर, ईमानदार शुहबी जूंस, दंङ शराबी शुहबी मेस, दंङ गलत तरीका रंङ ढबाह कमाएच़िमी लालची शुहबी मेस,

⁹ पर दोऊ समझ साफ शुहबी जूंस, छना दोरे लगातार दुह सच्चाई ऊ शिक्षा ओ टोहकठे विशवास लहज़ातोर, अंऊ परमेश्वरे प्रगट लहसी ततो।

¹⁰ कलीसिया ओ सेवकातिंङ अंङड्रे बे तुहई दोतिंङ दि सबित लेह रांई कि दोतिंङ सही गुण तोह दंङ अगर दोरे निर्दोष हुंचोरे दंङ दोरे सेवको कम लोहर।

¹¹ झांह ए दोतु मेच़ातिंङ ला आदरो जोगे शुहबी जूंस; दंङ ऊईतु पाहठी मदम कुट्रा शुहबी मेस, पर हर हालातरिंङ एनोह टोहकठे काबू लहज़ा, दंङ भत्ते रिति रिंङ विशवासो जोगे शुहबी जूंस।

¹² कलीसिया ओ सेवक इच्च़ा ए मेच़ो गगसा शुहबी जूंस दंङ एनोह कटुतंङ साते एनोह ऊई टबरातु ला रूठे रंङ देखभाल लहज़ा शुहबी जूंस।

¹³ छना कुचे अंऊ सेवको कम रूठे रंङ साते लहज़ातोर, दोरे मीहतु दोरच़ी आदर खोकपोरे, दंङ दोरे यीशु मसीहू टोहकठे एनोह विशवासो पाहठी मीहतंङ साते मोह्ड़े याहबरंङ साते कुट्रातोर।

महान गप्पा

¹⁴ गिह्बी उम्मीद तोह कि गेह युरनाह केहतु कछंङ अपोग, पर दि डाक दिऊ थल्जी च़ेहसी लेहकी तोतोग,

¹⁵ कि अगर गिह्बी अपिमी ख्राह शोतो, दंङ केतिंङ दि गप्पो खबर शुहबी जूंस कि परमेश्वरो टबरातु बिचंङ छना ठ्रोह बरताव शुहबी जूंस। परमेश्वरो टबर श्रींङी परमेश्वरो कलीसिया शुह; दि ध्वांए ठ्रोह हेले शिक्षा ओ साथी रंड्रातोर दंङ दोतिंङ बणाके तहच़ातेर, छना मुयांद ए थम्मे घरबारा बि सहारा रंड्री दंङ दोबि पक्‍का लेह।

¹⁶ दंङ दिरिंङ छल्ले शक माह कि हेंदु विशवासरिंङ पक्‍का भेद तोह, मसीह इच्च़ा मीहू रूपारिंङ प्रगट शुई, दंङ पवित्र आत्माज़ि दुह परमेश्वरो योह साबित लहरी, दंङ स्वर्गदूता ज़ि दुह तंङातेर, दंङ परमेश्वरे दुह स्वर्गंङ रैंज़ा शिली। चेलाज़ि भत्ते ठाहरिरिंङ दोऊ प्रचार लहरिर। दंङ संसारो मीहच़ी दोऊ टोहकठे विशवास लहरिर।